Sabik nang pakasalan ang gf… Tibo, problemado kung paano ipagtatapat ang kalagayan sa pamilya

ni Sister Isabel del Mundo - @Mga kuwento ng buhay at pag-ibig | Marso 14, 2024

Dear Sister Isabel,

Ang problemang idudulog ko sa iyo ay tungkol sa kasarian ko. Maniwala man kayo o hindi, dalawa ang sex organ ko. 

Noon, hindi ko matanggap ang sitwasyon ko, lagi kong kinukuwestiyon ang sarili ko kung bakit hindi ako normal, nag-research ako tungkol sa kalagayan ko at kalaunan ay natanggap ko rin ang ang pagkatao ko. 

Ayon sa aking pananaliksik, isa pala akong anghel na nabuo sa sinapupunan ng aking ina.

Puwede akong maging isang lalaki o babae. Kaya lang, hindi alam ng pamilya ko ang aking sikreto. Ang buong akala nila ay isa akong babae, maganda at sexy kasi ako kaya hindi nila nahahalata ang aking pagkatao. 

Isa akong tomboy at mas nangingibabaw ang aking pagiging lalaki. Sa ngayon ay may girlfriend ako at desidido akong pakasalan siya sa ibang bansa. Payag din naman ang girlfriend ko, pero paano ko kaya sasabihin sa pamilya ko ang bagay na ito, lalo na sa mga magulang ko? Paniguradong hindi nila matatanggap ang sasabihin ko, payuhan n’yo ako, Sister Isabel.

Nagpapasalamat,

Kabs

Sa iyo, Kabs,

Bagama’t rare lang ang case mo, naniniwala akong masuwerte ka sa lahat ng nilalang. Puwede mo rin naman ma-enjoy ang dalawa mong kasarian, depende sa iyong gagawin. Naniniwala rin ako na isa kang anghel na binuo sa sinapupunan ng iyong ina. 

Gawin mo kung ano ang gusto mong gawin. Sa palagay ko ay alam na ng ina mo ang iyong pagkatao. Pagsilang mo pa lang sa mundo, aware na siya sa kalagayan mo, kaya wala ka dapat ipag-alala. Ipinaubaya na niya sa Diyos ang iyong kapalaran at hinihintay na lang niya kung ano ang ipagtatapat mo. 

Siya na rin marahil ang bahalang magpaliwanag sa buong pamilya n’yo. Don’t worry, gagabayan ka naman ng Diyos sa buhay na itinakda niya sa iyo.

Sumasaiyo,

Sister Isabel del Mundo

Ginang, inggit sa kapitbahay na wa’ problema

ni Sister Isabel del Mundo - @Mga kuwento ng buhay at pag-ibig | Marso 11, 2024

Dear Sister Isabel,

Hindi ko na alam ang gagawin ko, madasalin at palasimba naman ako, pero bakit punumpuno pa rin ako ng problema? 

Mabuti pa itong kapitbahay namin laging masaya 

kahit na nagto-tongits lang maghapon kesa na magsimba.  Wala rin siyang trabaho, wala rin ginawa maghapon kundi ang tumambay at ito pa ang malupit, miyembro pa sila ng 4Ps. Kuntento na sila roon. Kung makapag-videoke  araw-araw, akala mo mayaman, pero nasa unahan ng pila kapag may ayuda.

Samantalang ako non-stop ang problemang dumarating sa akin. ‘Di pa tapos ang isa, meron na naman. Sadya kayang baliktad ang mundo? Kung sino pa ‘yung madasalin siya pa ang madaming pasanin? 

Hindi ko na iisa-isahin ang mga problema ko dahil masyado itong mahaba at magulo.

Gusto ko lang na gumaan ang kalooban ko sa pamamagitan ng mga ipapayo n’yo.

Alam kong kayo lang ang makakapagpalubag ng loob ko. Hihintayin ko ang payo n’yo.

Umaasa,

Digna ng Nueva Ecija

Sa iyo, Digna,

Sa mundong ating ginagalawan, sadyang ganyan ang buhay. Dapat mong tanggapin sa iyong kalooban ang buhay ng tao ay parang isang pelikula, tayo mismo ang mga artista na gumaganap sa entablado ng ating buhay. 

‘Ika nga sa kasabihan, “Life is what we make it.” Hindi porke pala-simba at madasalin ka, exempted ka na sa mga problema. Hindi makukuha ng dasal at pagsisimba ang pinapangarap mong tahimik na buhay at walang problemang pinapasan. Nakadepende na lang ‘yan kung paano mo haharapin ang buhay mo. Katulad na lang ng kapitbahay mo, kuntento na sa kanyang sitwasyon. 

Faith, determination and patience ang dapat mong ipatupad. Huwag mong ikumpara ang buhay mo sa ibang tao. Sa halip, taimtim kang humingi ng tulong sa Diyos.

Sumasaiyo,

Sister Isabel del Mundo

Ina, inis sa kapitbahay na maingay

ni Sister Isabel del Mundo - @Mga kuwento ng buhay at pag-ibig | Pebrero 22, 2024

Dear Sister Isabel,

Kahit saan ako pumunta hindi ako makatagpo ng katahimikan. Dati akong nakatira sa probinsya, ang ingay ng kapitbahay namin. Sa harap pa mismo ng bahay namin sila naglagay ng mga silya, nagtsi-tsismisan at nag-iinuman. Mabuti na lang ay nakabili ng bahay ang anak ko sa Laguna, at ako ang caretaker niya. 

Natuwa ako dahil malayo na ko sa ingay ng kapitbahay namin, pero hindi pa rin pala. Dikit-dikit ang bahay sa nilipatan ko, ang liit lang ng pagitan sa kapitbahay, maski ang kalampag ng pinto nila ay dinig na dinig sa bintana ko. 

Ang masaklap pa, ‘yung kulungan ng aso nila sa tabi pa ng bintana ko nilagay. Binging-bingi na ko sa kakakahol ng mga ito. Minsan, umaalulong pa na para bang may nakikitang masamang espiritu. Hay buhay! 

Paglabas ko pa ng gate nagkalat ang dumi ng mga asong gala. Hinahayaan din pala dito ang asong gala. ‘Yun namang hindi gala, dala-dala ng amo nila at dito pa sa harap ng gate ko pinapaihi. Sa sobrang inis, nasigawan ko tuloy sila. 

Kailan kaya ako magkakaroon ng katahimikan sa aking kapaligiran? Physically and emotionally depressed na ako. Ano kaya ang dapat kong gawin? 

Nagpapasalamat,

Nanay Dory ng Laguna

Sa iyo, Nanay Dory,

‘Ika nga sa kasabihan, “Patay lang ang walang problema”. Sa kaso mo, gusto mo na bang mamatay? 

Sa palagay ko ay hindi pa, buhay ka pa kaya harapin mo ng buong katalinuhan, buksan mo ang iyong isipan sa mga problema. Ikaw na ang mag-adjust at mag-isip ng tamang paraan para libangin ang iyong sarili. 

Maging busy ka sa mga bagay na nagpapasaya sa iyo. Magpatugtog ka ng music sa loob ng bahay mo para ‘di mo marinig ‘yung kahol ng aso. 

Mamasyal ka sa mall, mag-window shopping ka kung naiinip ka na sa inyo o kaya naman makipag-bonding ka sa mga kaibigan mo, sumama sa mga gimmick nila para maging masaya ka hindi ‘yung lagi kang nasa bahay lang. 

Marami pang ibang bagay na puwede mong gawin para hindi ka ma-stress sa kapaligiran mo. Huwag mong kunsumihin ang iyong sarili. Lahat ng bagay na nagpapa-stress sa iyo ay  may katapat na solusyon, basta’t gamitin mo lang ang iyong isip at talino kung ano ang dapat gawin. 

Daanin mo sa diplomasya huwag sa init ng ulo, at higit sa lahat mas mabuti kung magiging busy ka sa gawaing pang-simbahan. Sumali ka sa church organization. Kung maaari, maglingkod ka sa simbahan. Ngunit, kung maganda naman ang boses mo, sumali ka sa choir, kung okey ka namang magsalita, mag-lector ka. 

Kayang-kaya mo ‘yan. Malaki ang maitutulong sa iyo ng mga bagay na sinabi ko para harapin mo nang buong sigla ang buhay sa mundo. Hanggang dito na lang. Pagpalain ka nawa ng Diyos sa iyong pang-araw-araw na pamumuhay.

Sumasaiyo,

Sister Isabel del Mundo