Iwas-dumog… No walk-in policy sa pagpapabakuna

ni Lolet Abania | August 6, 2021

Napagdesisyunan ng mga Metro Manila mayors na ipatupad ang ‘no walk-in policy’ sa mga COVID-19 vaccination sites habang ang rehiyon ay sumasailalim sa 2-linggong lockdown upang maiwasan ang pagkalat ng nakahahawang Delta variant.

Sa Laging Handa briefing ngayong Biyernes, ayon kay Department of Interior and Local Government (DILG) Undersecretary at Spokesperson Jonathan Malaya, ang bagong polisiya ay napagkasunduan ng mga alkalde at ng Metropolitan Manila Development Authority (MMDA).

“The LGUs (local government units) will strictly enforce the no walk-in policy during the lockdown to prevent people from swarming vaccination sites, which could cause a superspreader event,” ani Malaya.

Binanggit din ni Malaya na ang mga may kumpirmadong appointments na ang tatanggapin sa mga vaccination centers.

Ang Metro Manila ay nasa ilalim ngayon ng enhanced community quarantine (ECQ), ang pinakamahigpit na quarantine upang labanan ang pagkalat pa ng COVID-19 sa bansa, na nagsimula ngayong Agosto 6 at tatagal nang hanggang Agosto 20.

Gayundin, inaasahan sa nasabing rehiyon ang pag-administer ng 250,000 COVID-19 shots kada araw kahit pa ECQ.

Vaccination sites, dinumog… “No vaccine, no ayuda”, fake news — MMDA

ni Lolet Abania | August 5, 2021

Mariing pinabulaanan ni Metropolitan Manila Development Authority (MMDA) Chairperson Benhur Abalos at sinabing “fake news” ang impormasyong kumakalat na ang indibidwal na hindi pa nabakunahan kontra-COVID-19 ay hindi makatatanggap ng cash aid sa ilalim ng enhanced community quarantine (ECQ).

Sa isang ceremonial event ng COVID-19 task force, binalaan ni Abalos ang sinumang nasa likod ng pagpapakalat ng maling impormasyon matapos na maraming mga tao ang nag-panic at dumagsa sa mga vaccination sites sa Metro Manila ngayong Huwebes nang umaga. “Ang sinabi po ba naman na kung wala kang bakuna ay wala kang matatanggap na ayuda. Nag-panic ang mga tao. Nagpuntahan nang umaga sa mga vaccination center. Nagkagulo,” saad ni Abalos.

Ayon kay Abalos, natanggap niya ang mga report ng naturang insidente mula sa Manila, Masinag sa Antipolo City, at Las Piñas. Babala pa ni Abalos sa pasimuno ng fake news na nag-iimbestiga na ang National Bureau of Investigation (NBI) hinggil sa insidente at titiyakin nilang papatawan ng parusa ang sinumang mahuhuling nagsagawa nito.

Ngayong Huwebes nang umaga, naiulat na nagkaroon ng mahabang pila sa maraming COVID-19 vaccination sites sa Metro Manila, isang araw bago simulan ang 2-linggong ECQ period. Sa pagpapatupad ng ECQ, ang mga low-income residents ay makatatanggap ng P1,000 hanggang P4,000 cash aid mula sa national government.

Delta variant, kalat na... 10 PM-4 AM curfew — MMDA

ni Ronalyn Seminiano Reonico | July 24, 2021

Muling ipatutupad ng Metro Manila Council (MMC) ang curfew hours na 10 PM hanggang 4 AM sa National Capital Region simula bukas, July 25, matapos isailalim ang rehiyon sa general community quarantine (GCQ) “with heightened restrictions.”

Sa ilalim ng Metropolitan Manila Development Authority (MMDA) Resolution No. 21-13 Series of 2021, napagkasunduan ng 17 Metro Manila mayors na baguhin ang dating 12 midnight hanggang 4 AM na curfew hours dahil sa patuloy na pagtaas ng kaso ng COVID-19 sa rehiyon at upang makontrol ang transmission ng Delta variant.

Saad ni MMDA Chairman Benhur Abalos, "We need to limit the movement of the public through the imposition of longer curfew hours. Since the Delta variant spreads exponentially, we should not let our guards down and implement necessary restrictions to contain the virus.”

Samantala, sa pinakabagong ulat ng Department of Health (DOH), naitala ang 17 bagong kaso ng Delta variant sa bansa kung saan 12 ang local cases. Sa kabuuan ay pumalo na sa 64 ang naitalang Delta variant sa bansa.

Naitala rin ng DOH ang 6,216 karagdagang kaso ng COVID-19 ngayong Sabado at sa kabuuang bilang ay umabot na sa 1,543,281 ang total cases sa bansa.

Gumaling naman sa Coronavirus disease ang 6,778 pasyente at sa kabuuang bilang ay umabot na sa 1,461,749 ang recoveries. Nadagdagan naman ng 241 ang bilang ng mga pumanaw at sa kabuuan ay pumalo na sa 27,131 ang death toll sa bansa.