Dami ng mga sasakyan sa EDSA, nabawasan — MMDA

ni Lolet Abania | March 25, 2022

Nabawasan na ang dami ng mga sasakyan na bumibiyahe sa EDSA, ang pinakaabalang kalsada sa Metro Manila, dahil sa sunud-sunod na matinding pagtaas sa presyo ng produktong petrolyo, ayon sa Metropolitan Manila Development Authority (MMDA).

Sa Laging Handa briefing ngayong Biyernes, sinabi ni MMDA director Neomi Recio na ang araw-araw na volume ng mga sasakyan sa kahabaan ng EDSA ay bumaba ng 372,000 mula sa 396,000 bago ang pagtaas sa presyo ng langis.

“Nagkaroon ng effect ang mataas na presyo ng gas kaya hindi masyadong lumabas ang mga kababayan natin,” ani Recio.

Simula pa lang ng taon, nagtaas na ang presyo ng mga produktong petrolyo, na umabot sa 11 magkakasunod na linggo bago nagpatupad ang mga kumpanya ng langis ng isang big-time rollback ngayong linggo.

Ayon sa opisyal, nang isailalim sa Alert Level 1 ang National Capital Region (NCR) nitong umpisa ng buwan, ang araw-araw na dami ng mga sasakyan sa kahabaan ng EDSA ay kulang pa rin at hindi naabot sa pre-COVID-19 pandemic level.

“Hindi pa rin natin narating ang pre-pandemic level, especially sa EDSA. Noong pre-pandemic ang volume natin diyan ang pinakamataas 405,000,” saad ni Recio.

Sa kabila ng mababang volume ng mga sasakyan sa EDSA, ayon sa MMDA pinag-aaralan naman nila ang pagkakaroon ng daylight saving time sa NCR.

Sa kasalukuyan, ipinatutupad ang number coding sa kahabaan ng EDSA mula alas-5:00 ng hapon hanggang alas-8:00 ng gabi, kung saan sinimulan ito noong Nobyembre 2021 dahil sa naranasang matinding trapiko sa lugar.

Gayunman, ayon kay Recio, tinanggihan na nila ang mga panawagan para sa pag-expand ng number coding scheme dahil aniya, hindi pa bumabalik sa pre-pandemic levels at ang volume ng mga sasakyan na bumibiyahe sa EDSA ay kakaunti lamang.

“Based on our data, this is not the right time na mag-expand tayo kasi based doon sa volume and sa travel time, travel speed na nakukuha ng travel engineering center ng MMDA, still manageable ‘yung traffic and hindi pa naman tayo bumabalik sa pre-pandemic na sitwasyon natin,” paliwanag pa ni Recio.

Sabit at nakatayo sa bus at jeep, bawal — MMDA

ni Lolet Abania | March 1, 2022

Ipinagbabawal sa mga jeep at bus ang mga nakatayo at nakasabit na pasahero sa ilalim ng Alert Level 1, habang pinapayagan lamang ang mga ito para sa full seating capacity, ayon sa Metropolitan Manila Development Authority (MMDA).

Sa isang interview ngayong Martes kay MMDA officer-in-charge at General Manager Romando Artes, tinalakay na nila ang isyung ito sa Land Transportation Franchising and Regulatory Board (LTFRB).

“Hindi papayagan ‘yung tayuan dahil ang nakalagay po sa guidelines ng IATF ay full seating capacity, meaning ‘yung kapasidad lang po ng sasakyan kung saan ang pasahero ay nakaupo. ‘Yun lamang po ‘yung papayagan except po sa MRT... sa capacity ‘yung nakatayo kasi kung makikita niyo ang MRT naman po, LRT, designed po na kaunti lang ang nakaupo at mas maraming nakatayo. Except po doon, sa mga buses at jeepneys po, full seating capacity lang,” paliwanag ni Artes.

Una nang isinailalim simula Marso 1 hanggang 15, ang National Capital Region (NCR) at 38 pang lugar sa bansa sa Alert Level 1, ang pinakamababang COVID-19 risk classification.

Sa ilalim ng Alert Level 1, ang intrazonal at interzonal travel ay pinapayagan na anumang edad at mayroong comorbidities. Lahat ng establisimyento, mga indibidwal, o aktibidad, ay pinayagang na ring mag-operate, magtrabaho, o magkaroon ng full on-site o venue/seating capacity subalit dapat na ipinatutupad pa rin ang minimum public health standards.

Sa ngayon, ayon kay Artes, ang implementasyon ng full capacity sa mga public transport ay naging maayos. Aniya, ang mga pasahero ay mas disiplinado na at self-regulating na rin.

“Sa ngayon, maayos naman po yung pagpapatupad. Sa tingin naman po namin nadisiplina na yung mga tao at nagse-self-regulate din po,” ani Artes.

60 personnel ng MMDA, may COVID-19

ni Lolet Abania | January 5, 2022

Ipinahayag ni Metropolitan Manila Development Authority (MMDA) General Manager Romando Artes na nasa 60 personnel ng MMDA ang nagpositibo sa test sa COVID-19.

Sa Kapihan sa Manila Bay forum ngayong Miyerkules, sinabi ni Artes na 100 empleyado ng MMDA ang sumailalim sa COVID-19 testing nitong Martes at nang lumabas ang kanilang resulta, tinatayang 60 indibidwal ang tinamaan ng coronavirus.

“Right now po, mayroon po tayong infections... in fact kahapon po nagpa-swab tayo ng may mga symptoms, out of 100, it was reported this morning, ‘yung na-swab kahapon, ay nasa 60 plus po ‘yung positive,” ani Artes.

Ayon sa opisyal, karamihan sa mga kaso ay mild at asymptomatic, kung saan halos lahat ng mga empleyado at workers ng MMDA ang nabakunahan na kontra-COVID-19.

Aniya, patuloy naman ang MMDA na nagsasagawa ng booster shots para sa kanilang mga manggagawa. Gayundin, nitong Martes, nakapag-administer sila ng booster shots para sa 680 personnel. Sinabi rin ni Artes na mayroong tinatayang 8,000 empleyado ng MMDA.