6 rehiyon, binabantayan ng DOH sa biglang pagtaas ng COVID

ni Lolet Abania | July 26, 2021

Anim na rehiyon ang mino-monitor ngayon ng Department of Health (DOH) matapos na magpakita ng tinatawag na “trend reversal”, mula sa negatibo ay naging positibo sa 2-linggong case growth rate na nagresulta sa pagtaas ng COVID-19 infections.

Ayon kay DOH Undersecretary Maria Rosario Vergeire, ang anim na region na kanilang mino-monitor ay Metro Manila, Cagayan Valley, Central Luzon, Calabarzon, Central Visayas, at Northern Mindanao.

Paliwanag ni Vergeire, ang reproduction number ay bilang ng mga tao na bawat isang kaso nito na maaaring maka-infect, kung saan nakapagtala ng 1.009 sa Metro Manila, 0.95 sa Cagayan Valley, 1.12 sa Central Luzon, 0.98 sa Calabarzon, 1 sa Central Visayas, at 0.91 sa Northern Mindanao.

Kapag ang reproduction number ay 1 o mas mataas pa, ibig sabihin, nagpapatuloy ang COVID-19 transmission.

Sa buong bansa, lumabas na tumaas ang mga kaso ng COVID-19 ng 1% nito lamang Hulyo 11 hanggang 24, subalit aniya, dapat na maging maingat sa paggamit ng salitang “surge” para ilarawan ang pagtaas ng infections.

“Ang surge, meron ‘yang definition sa epidemiology which is not what’s happening right now. Tumataas mga kaso — that, we can verify,” paliwanag ni Vergeire.

Ayon din kay Vergeire, ang Cordillera at Ilocos regions ay nakapagtala naman ng isang positive 2-linggong case growth rate nitong anim na linggo lamang, habang ang Northern Mindanao at Davao region ay maingat nilang binabantayan dahil sa mataas na ICU utilization rate.

Mino-monitor din ng DOH ang 26 probinsiya na nakapagtala ng mataas na average daily attack rate at low-risk hanggang moderate-risk sa 2-linggo case growth rate subalit hindi na binanggit ng ahensiya ang mga lugar.

Nakaalerto naman ang mga awtoridad matapos na kumpirmahin ng DOH ang local transmission ng mas nakahahawang Delta variant.

Sa ngayon, nasa 119 kaso na ang tinamaan ng Delta variant, habang 12 ang nananatiling active case.

Delta variant, kalat na... 10 PM-4 AM curfew — MMDA

ni Ronalyn Seminiano Reonico | July 24, 2021

Muling ipatutupad ng Metro Manila Council (MMC) ang curfew hours na 10 PM hanggang 4 AM sa National Capital Region simula bukas, July 25, matapos isailalim ang rehiyon sa general community quarantine (GCQ) “with heightened restrictions.”

Sa ilalim ng Metropolitan Manila Development Authority (MMDA) Resolution No. 21-13 Series of 2021, napagkasunduan ng 17 Metro Manila mayors na baguhin ang dating 12 midnight hanggang 4 AM na curfew hours dahil sa patuloy na pagtaas ng kaso ng COVID-19 sa rehiyon at upang makontrol ang transmission ng Delta variant.

Saad ni MMDA Chairman Benhur Abalos, "We need to limit the movement of the public through the imposition of longer curfew hours. Since the Delta variant spreads exponentially, we should not let our guards down and implement necessary restrictions to contain the virus.”

Samantala, sa pinakabagong ulat ng Department of Health (DOH), naitala ang 17 bagong kaso ng Delta variant sa bansa kung saan 12 ang local cases. Sa kabuuan ay pumalo na sa 64 ang naitalang Delta variant sa bansa.

Naitala rin ng DOH ang 6,216 karagdagang kaso ng COVID-19 ngayong Sabado at sa kabuuang bilang ay umabot na sa 1,543,281 ang total cases sa bansa.

Gumaling naman sa Coronavirus disease ang 6,778 pasyente at sa kabuuang bilang ay umabot na sa 1,461,749 ang recoveries. Nadagdagan naman ng 241 ang bilang ng mga pumanaw at sa kabuuan ay pumalo na sa 27,131 ang death toll sa bansa.

Metro Manila, isinailalim sa GCQ “with heightened restrictions”

ni Ronalyn Seminiano Reonico | July 23, 2021

Inaprubahan na ni Pangulong Rodrigo Duterte ang rekomendasyon ng Inter-Agency Task Force (IATF) na isinailalim sa general community quarantine (GCQ) “with heightened restrictions” ang Metro Manila simula ngayong araw, July 23 hanggang sa July 31, ayon kay Presidential Spokesperson Harry Roque.

Isinailalim din sa GCQ “with heightened restrictions” ang mga probinsiyang: Ilocos Norte, Ilocos Sur, Davao De Oro, at Davao Del Norte.

Ang Davao Del Sur naman ay isinailalim sa GCQ mula sa modified ECQ classification, simula rin ngayong araw hanggang sa July 31, ayon kay Roque.

Samantala, isinama na rin ang Malaysia at Thailand sa ipinatutupad na travel ban dahil sa mataas na kaso ng COVID-19.

Saad pa ni Roque, “Inaprubahan po ng ating presidente na ang lahat po ng mga biyahero na galing sa Malaysia or Thailand or mayroong history of travel sa Malaysia o Thailand sa nakalipas na 14 days ay hindi po puwedeng papasukin ng Pilipinas. Ito po ay magsisimula nang 12:01 AM of July 25 hanggang 11:59 PM ng July 31.”