8PM-4AM curfew sa Metro Manila simula sa Agosto 6

ni Lolet Abania | August 2, 2021

Mas mahabang curfew hours ang ipapatupad sa Metro Manila simula sa Agosto 6, kasabay ng pagsasailalim sa enhanced community quarantine (ECQ) sa naturang rehiyon.

Ayon kay Metropolitan Manila Development Authority chairperson Benhur Abalos, ang curfew hours ay magsisimula nang alas-8:00 ng gabi hanggang alas-4:00 ng umaga simula sa Biyernes, Agosto 6.

Matatandaang noong Hunyo 15, pinaigsi ang curfew hours sa Metro Manila mula alas-12:00 ng hatinggabi hanggang alas-4:00 ng umaga. Sa ngayon, nasa general community quarantine (GCQ) “subject to heightened and additional restrictions” pa ang National Capital Region (NCR) hanggang Huwebes, Agosto 5.

Agad na naglabas ng mas mahigpit na quarantine classification ang pamahalaan at ipapatupad ang ECQ sa Agosto 6 dahil sa patuloy na pagtaas ng mga kaso ng COVID-19 at bilang pag-iingat na rin sa mas nakahahawang Delta variant.

Cash aid at public transport sa ECQ, ‘di pa sure — Roque

ni Lolet Abania | July 30, 2021

Maglalabas pa lamang ang Malacañang ng guidelines hinggil sa cash aid at public transportation sa Metro Manila kaugnay ng muling pagsasailalim nito sa pinakamahigpit na quarantine protocol sa loob ng dalawang linggo ng Agosto sa gitna ng panganib ng Delta COVID-19 variant.

Ang Metro Manila ay isasailalim sa enhanced community quarantine mula Agosto 6 hanggang 20 na sa nasabing protocol, essential trips at services lamang ang pinapayagan.

“We expect to grant the same amount of cash aid earlier given to Iloilo province, Iloilo City and Gingoog City, and I have talked to Budget Secretary Wendel Avisado and he told me, hahanapan at hahanapan ng paraan,” ani Presidential Spokesperson Harry Roque sa isang interview.

Tinukoy ni Roque ang mga lugar na nasa ilalim ng ECQ mula Hulyo 16 hanggang Agosto 7, na ang tugon aniya ng gobyerno mula sa kasalukuyang polisiya ay magbibigay ng cash aid sa mga mahihirap na pamilya sa ECQ areas.

Nasa P1,000 kada tao o maximum na P4,000 cash aid kada pamilya ang ayuda na inaprubahan nitong Hulyo 29.

“The President will not allow an ECQ implementation na walang ayuda ang mamamayan,” sabi ni Roque.

Matatandaang nang unang ipinatupad ang ECQ sa NCR noong Marso 16 hanggang May 14, 2020, ang mga public transportation ay ipinagbabawal.

Nang ang NCR ay muling isailalim sa ECQ mula Marso 29 hanggang Abril 11, 2021, ang mga empleyado ng essential at non-essential sectors ay pinayagang pisikal na mag-report sa trabaho at naglaan ng public transportation subalit limitado lamang.

Sa ngayon, hindi masabi ni Roque kung papayagan pa rin ang pampublikong transportasyon kapag sumailalim muli sa ECQ.

“We will let the Transportation department decide on this, may panahon pa naman,” wika ng kalihim.

Bakuna, tuloy kahit ECQ sa MM

ni Lolet Abania | July 30, 2021

Magpapatuloy ang COVID-19 vaccination program ng pamahalaan sa Metro Manila sa kabila ng isasailalim ito sa enhanced community quarantine (ECQ) mula Agosto 6 hanggang 20.

“Yes, definitely [it will proceed]. Details will be provided in due course of the COVID-19 vaccination committee,” ani Roque.

Ang pagpapatupad ng ECQ ay inianunsiyo isang araw matapos makapagtala ang bansa ng tinatayang 97 kaso ng mas nakahahawang Delta variant.

Ayon kay Roque, nasa 18 milyon doses ng COVID-19 vaccine ang kanila nang na-administer. Sa bilang na ito, 7.8 milyon indibidwal na ang fully vaccinated.

“For the past three days, we already breached 600,000 level of jabs administered in a day,” dagdag ng kalihim.

Plano ng gobyerno na agarang mabakunahan ang 58 milyon indibidwal sa mga lugar na highly urbanized bago matapos ang taon bilang proteksiyon sa nasabing populasyon dahil ito sa limitadong supply ng bakuna laban sa sakit, subalit target pa rin ng pamahalaan ang mas maraming mabakunahan na nasa 70% hanggang 80% ng kabuuang 109 milyong populasyon ng bansa upang makamit ang herd immunity kontra-COVID-19.