Covid cases sa NCR, aabot ng 43 K— DOH

ni Jasmin Joy Evangelista | September 4, 2021

Nakikita ng Department of Health na maaaring umabot sa 17,000 hanggang 43,000 ang kaso ng COVID-19 sa Metro Manila sa katapusan ng Setyembre.

Ito ay dahil umano sa patuloy na pagkalat ng Delta variant sa bansa.

“With all of these assumptions, 'pag nagbigay tayo ng projections, it doesn’t mean na mangyayari. Ginagamit 'yan for planning purposes. Para alam namin ilan 'yung darating na kaso and we can be able to prepare for that," ani Health Undersecretary Maria Rosario Vergeire.

Dahil dito, patuloy na ipinapayo ng mga eksperto ang pagsunod sa minimum health protocols, pag-a-isolate sakaling makaramdam ng sintomas, pagbibigay-alam sa mga nakasalamuha sakaling magpositibo sa virus, at pagkain ng masusustansiyang pagkain.

Dahil nga sa paglaganap ng Delta variant, patuloy na nakaantabay ang mga eksperto rito, ayon sa World Health Organization.

Habang patuloy daw kasi ang hawahan ay nariyan ang posibilidad ng mutation.

"Talagang mataas pa ang transmission ng virus kaya mataas pa ang mutation. Importante talaga na ma-stop na natin ang transmission na 'yan," ani Dr. Nina Gloriani ng Vaccine Expert Panel.

Supreme Court lang ang bukas… Mga korte sa MECQ areas, sarado hanggang sa Sept. 7

ni Ronalyn Seminiano Reonico | August 28, 2021

Mananatiling sarado ang mga korte sa mga lugar na isinailalim sa modified enhanced community quarantine (MECQ) katulad ng Metro Manila hanggang sa Setyembre 7 maliban sa Supreme Court, ayon sa Office of the Court Administrator (OCA) ngayong Sabado.

Sa ilalim ng Circular No. 114-2021, base sa utos ni Chief Justice Alexander G. Gesmundo, saad ni Court Administrator Jose Midas Marquez, “All courts in the NCR and identified areas under MECQ, except the Supreme Court, shall be PHYSICALLY CLOSED to court users for the duration of the MECQ. They shall continue to operate online and conduct videoconferencing hearings only for urgent incident and cases, such as, but not limited to, applications for bail, releases due to dismissal of cases or acquittal, habeas corpus, applications for temporary protection orders for Violence Against Women and Children cases, and analogous circumstances."

Paglilinaw naman ng OCA, maaaring sumangguni ang publiko sa hotlines at email addresses na naka-post sa website ng Supreme Court na https://sc.judiciary.gov.ph/.

12.87 M Pinoy fully vaccinated na — NTF

ni Lolet Abania | August 19, 2021

Nasa tinatayang 41 porsiyento na ng eligible population sa Metro Manila ang fully vaccinated laban sa COVID-19 hanggang nitong Agosto 18.

Ayon kay National Task Force Against COVID-19 deputy chief implementer Vince Dizon sa Palace news conference ngayong Huwebes, may kabuuang 3.2 milyong vaccine doses na ang kanilang na-administer sa National Capital Region ngayong Agosto o nasa 178,000 jabs ang average kada araw.

Tiwala rin si Dizon na ang target na inoculation rate na 50% ay makakamit ng bansa hanggang sa Agosto 31.

Ayon sa Department of Health (DOH), mula noong Marso 1, 2021 ay nakapag-administer na ang pamahalaan ng 29,127,240 shots, kung saan nasa 16,250,043 ang nakatanggap ng unang doses habang ang bilang ng mga fully vaccinated na Pilipino ay nasa 12.87 milyon hanggang Agosto 18.

Samantala, sinabi ni Dizon na nakapagsasagawa naman ang bansa ng average na 60,000 COVID-19 tests kada araw mula ito noong Agosto 11 hanggang 17 at umaabot din ang mga tests ng 67,000 sa loob ng isang araw.

Subalit, ayon sa testing czar, hindi pa ito sapat habang plano niyang kausapin ang Philippine Health Insurance Corp. (PhilHealth) hinggil sa reimbursement ng mga gastusin ng mga accredited testing laboratories.

“We will communicate with PhilHealth in the coming days to facilitate the reimbursement so that these laboratories will be able to purchase supplies and conduct tests more quickly,” ani Dizon.