‘No contact apprehension’ policy, papatay sa kabuhayan ng mga tsuper — Transport groups

ni Jasmin Joy Evangelista | September 11, 2021

Nagsagawa ng kilos-protesta sa Bonifacio Shrine ang ilang grupo para ipanawagan ang pagbabasura ng "no contact apprehension" policy sa Maynila.

Kabilang sa mga nagkasa ng protesta ay ang mga miyembro ng PISTON, Laban TNVS, Defend Jobs Philippines, Metro Manila Taxi Operators Association, Manibela at Bangon TNVS.

Dagdag-pasanin anila ang polisiya sa mga maliliit na driver at operator lalo na ngayong may pandemya.

Giit pa nila, ‘wag naman daw sanang magpatulad ng patakaran na siya ring papatay sa kanilang kabuhayan.

“Ang problema dito hindi mo na maipagtatanggol 'yung sarili mo dahil camera na 'yung kukuha sa'yo... Ang transport serbisyo rin, nagseserbisyo kami sa mamamayan, eh, ‘di dapat tulungan kami hindi dapat pahirapan ng local at national [government]," ani PISTON National President Modesto Floranda.

Nanawagan din sila na babaan ang halaga ng multa lalo na sa mga simpleng violation.

Nakikiusap din ang mga grupo kay Manila Mayor Isko Moreno na huwag na itong ipatupad.

Patuloy na umaasa ang mga transport group na pakikinggan ang kanilang mga hinaing.

Alamin: Mga panuntunan sa bagong quarantine scheme sa Metro Manila

ni Jasmin Joy Evangelista | September 11, 2021

Provisionally approved" na ang mga panuntunan sa quarantine alert level system na ipatutupad sa Metro Manila simula Setyembre 15.

Ito ay matapos muling isailalim sa modified enhanced community quarantine ang Kamaynilaan.

Dalawang quarantine classification lang ang gagawin sa mga lugar na sakop ng Metro Manila; ang ECQ at GCQ, ayon kay Presidential Spokesperson Harry Roque.

Magkakaroon daw ng apat na alert level ang pagpapatupad ng GCQ:

Sa Alert Level 4, o pinakamataas na alert level, bawal ang mga sumusunod:

* Mass gathering

* Indoor dining

* Personal care services

* Paglabas ng mga nasa edad 18 pababa at mga 65 pataas, mga may comorbidity at buntis.

20% lang din ang magiging kapasidad ng mga opisina ng gobyerno sa level na ito.

Sa Alert Level 3, papayagan ang "three C activities" o ang mga aktibidad na gagawin sa crowded na lugar, may close contact, at nasa closed o indoor areas nang may 30% capacity.

Nasa 30% naman ang papayagang capacity sa mga government office sa level na ito.

Kung Alert Level 2 naman ay papayagan ang 50% capacity, at full capacity naman kung Alert Level 1.

Nasa 50% naman ang papayagang capacity sa government offices sa alert level na ito.

Minimum onsite capacity naman ang paiiralin sa mga pribadong negosyo. Pero papayagang pumasok ang mas maraming empleyado sa Alert Level 1.

Mayroon daw option ang IATF na magdeklara ng mas mahigpit na lockdown sakaling tuluyang lumala ang sitwasyon.

Mula Setyembre 8-30...Metro Manila, GCQ na

ni Lolet Abania | September 6, 2021

Isasailalim ang Metro Manila sa general community quarantine (GCQ) simula Setyembre 8 hanggang 30 sa kabila ng COVID-19 pandemic, pahayag ng Malacañang ngayong Lunes.

Ayon kay Presidential Spokesperson Harry Roque, ang granular lockdown ay sisimulan sa Metro Manila sa panahon ng GCQ bagaman aniya, “wala pang guidelines na inilalabas” hinggil dito.

“There are no guidelines yet since the Inter-Agency Task Force is yet to adopt a Resolution on granular lockdown,” ani Roque, kung saan ang ahensiya ang siyang policy-making body ng gobyerno sa pagtugon sa pandemya.

Matatandaang ang Metro Manila ay isinailalim sa enhanced community quarantine (ECQ), ang pinakamahigpit na quarantine classification, mula Agosto 6 hanggang 20 sa gitna ng pagdami ng kaso ng mas nakahahawang Delta COVID-19 variant.

Gayunman, ang quarantine classification sa Metro Manila ay ibinaba na sa modified enhanced community quarantine (MECQ) na naging epektibo hanggang Setyembre 7.

Sa ilalim ng MECQ bahagyang pinapayagan ang non-essential services na mag-operate.

Samantala, umaabot na sa mahigit sa 20,000 kada araw ang bagong kaso ng COVID-19 sa bansa matapos na makapagtala ang Department of Health (DOH) sa nakalipas na tatlong sunod na araw ng naturang bilang.