GCQ hanggang February, pabor sa mga MM mayors

ni Ronalyn Seminiano Reonico | January 28, 2021

Pabor ang mga Metro Manila mayors na i-extend ang general community quarantine (GCQ) hanggang sa February, ayon kay Metro Manila Council (MMC) chairman at Parañaque City Mayor Edwin Olivarez.

“Ang consensus po ng nakakarami, ng lahat, ng buong council, ‘yung 16 na city mayors at isang municipal mayor na irekomenda po sa ating IATF [Inter-Agency Task Force for the Management of Emerging Infectious Diseases] ay manatili po tayo sa GCQ sa darating na February.”

Mas magiging mahirap umano kung lalong dadami ang kaso ng COVID-19 lalo na’t mayroon nang bagong variant na nakapasok sa bansa.

Aniya, “Kung magluluwag po tayo, napakahirap po na magkaroon tayo ng spike lalung-lalo na parating na po ‘yung ating vaccine.”

Metro Manila, game na game na sa COVID vaccine sa Pebrero

ni Lolet Abania | January 27, 2021

Naglabas ng pahayag ang Metropolitan Manila Development Authority (MMDA) ngayong Miyerkules na ang lahat ng alkalde sa 17 local government units (LGUs) sa National Capital Region ay handang-handa na para sa isasagawang COVID-19 vaccination rollout.

Sa isang statement ni MMDA General Manager Jojo Garcia, nakipagpulong na ang lahat ng mayors online sa Inter-Agency Task Force on Emerging Infectious Diseases (IATF) kagabi.

Ayon kay Garcia, tinalakay ng mga alkalde at ni IATF chief implementer at vaccine czar Secretary Carlito Galvez, Jr., ang mga plano sa gagawing vaccination habang nalalapit na ang pagdating ng unang batch ng COVID-19 vaccines.

"Secretary Galvez assured that the initial batch of COVID-19 vaccines will arrive before the end of February. I think they can finalize it in the next few days,” sabi ni Garcia.

Sinabi naman ni Galvez na mahigit sa 1 milyong doses ng COVID-19 vaccines ang inaasahang maide-deliver sa bansa para sa pagsisimula ng vaccination rollout sa Pebrero.

Ang mga COVID-19 vaccines na gagamitin ay galing sa AstraZeneca, Pfizer, at Sinovac.

Ayon pa kay Garcia, nakatuon din ang vaccination program sa mga business districts sa mga rehiyon at iba pang lungsod gaya ng Cebu at Davao para maiangat ang ekonomiya ng mga naturang lugar.

Kasabay nito, sinabi ni Garcia na ang National Task Force against COVID-19 ay bibisita sa mga LGUs sa Metro Manila upang alamin ang ginagawang preparasyon at plano ng mga ito para sa vaccination rollout.

“We all know that these vaccines are sensitive and will require proper handling and storage,” sabi ni Garcia.

Ngayong araw, binisita ng mga opisyal ng gobyerno na itinalaga sa COVID-19 response ang Taguig City para inspeksiyunin ang proseso ng kanilang vaccination habang pinuntahan nila kahapon ang Pasig City.

GCQ hanggang January 31 sa MM at iba pang lugar

ni Ronalyn Seminiano Reonico | December 29, 2020

Extended na naman ang pagsasailalim sa Metro Manila sa general community quarantine (GCQ) hanggang sa January 31, 2021, ayon kay Pangulong Rodrigo Duterte sa kanyang public address ngayong Lunes nang gabi.

Isinailalim din sa GCQ ang Isabela, Santiago City, Batangas, Iloilo, Tacloban City, Lanao del Sur, Iligan City, Davao City at Davao del Norte. Ang iba pang bahagi ng bansa ay isinailalim naman sa modified GCQ.

Pahayag din ni P-Duterte, “The rule is kung maaaring hindi ka lumabas ng bahay, ‘wag ka nang lumabas. Kung marami kang utang, ‘wag kang lumabas talaga, mas lalo na. Kung mayroon kang inano na anak na babae na niloko mo, ‘wag ka ring lumabas talaga.

"So, it’s a stay home if it’s really possible, kung kaya mo lang. It’s for your own good and the washing of hands,” muli pang paalala ng pangulo.