10K pulis ikakalat sa Metro Manila

ni Lolet Abania | March 15, 2021

Ipapakalat ang 10,000 pulis sa Metro Manila upang masigurong maipapatupad ang mahigpit na uniform curfew, ayon sa Philippine National Police (PNP).

Ayon kay PNP officer-in-charge Police Lieutenant General Guillermo Eleazar, nagbigay na siya ng direktiba sa police force na ipatupad ang maximum tolerance sa lahat at patuloy na igalang ang karapatang pantao.

"To our personnel on the ground, be reminded of our two rules to avoid unnecessary confrontation to the public -- one, observe maximum tolerance; and two, respect the people's rights. We will be closely monitoring your compliance," ani Eleazar sa isang interview ngayong Linggo.

"And to the public, we also offer a formula to prevent unnecessary confrontation and spare yourself from arrest: one, respect the rules on observance of the minimum health safety standard protocols; and two, respect the authorities that are enforcing these protocols," dagdag pa ng opisyal.

Magsisimula ang curfew bukas, March 15 ng alas-10:00 ng gabi hanggang alas-5:00 ng umaga na tatagal ng dalawang linggo dahil sa biglang pagtaas ng COVID-19 cases sa buong National Capital Region (NCR).

Mga ospital sa Metro Manila, napupuno ng may COVID-19

ni Lolet Abania | March 15, 2021

Ramdam na sa maraming ospital sa Metro Manila ang epekto ng biglang pagtaas ng bilang ng mga kaso ng may COVID-19 sa mga nakalipas na araw.

Una rito ang Philippine General Hospital na nagsabing ang kanilang bed capacity ay umabot na sa 70%.

“Consistently, we are admitting new COVID-19 patients, mga 10 patients a day. Ngayon po, as of the last count ay 121 ang naka-admit na may COVID, pero may pending admissions po. Ito po ay sa loob lamang ng isang linggo ay mabilis lumampas ng 100 pasyente ang na-admit namin,” ani PGH spokesperson Dr. Jonas del Rosario.

Ayon kay Del Rosario, sa ngayon, ang intensive care unit beds ng ospital ay napuno na rin. Gayundin, may kabuuang 82 health workers ng PGH ang nagpositibo sa test sa COVID-19.

Kinumpirma naman ng Quezon City General Hospital na ang kanilang COVID-19 wards at ICU beds ay puno na ng mga may coronavirus.

Noong March 13, umabot naman sa 60% sa San Lazaro Hospital ang COVID-19 beds na okupado ng mga pasyente.

“We can still accommodate 40% but if those patients are critical then we might not be able to put them in the ICU,” sabi ni Dr. Rontgene Solante ng SLH. Sa Lung Center of the Philippines, 60 sa kanilang 81 COVID-19 beds ay okupado na rin ng mga pasyenteng may coronavirus.

“The most difficult is ensuring enough beds for the incoming wave,” pahayag ni LCP hospital director Vincent Balanag, Jr.

MM, balik-curfew sa Lunes

ni Ronalyn Seminiano Reonico | March 11, 2021

Napagkasunduan ng mga Metro Manila mayors ang pagpapatupad ng curfew sa buong rehiyon dahil sa patuloy na paglobo ng kaso ng COVID-19 sa bansa, ayon kay Metropolitan Manila Development Authority (MMDA) Chairman Benhur Abalos.

Ayon kay Abalos, magsisimula ang 2-week curfew hours na 10 PM hanggang 5 AM sa Lunes, March 15, 2021. Sa naganap na pagpupulong ng mga Metro Manila mayors ngayong Huwebes ay dumalo rin ang ilang opisyal mula sa Department of Health at mga miyembro ng OCTA Research upang tumulong sa mga health protocols revisions sa rehiyon, ayon kay Abalos.

Samantala, mayroon nang 247,935 active cases sa capital region, base sa tala ng DOH.