Brownout sa MM at iba pang lugar, start na

ni Lolet Abania | June 2, 2021

Nakatakdang magpatupad ang National Grid Corp. of the Philippines (NGCP) ngayong Miyerkules, Hunyo 2 ng rotational brownouts sa ilang bahagi ng Luzon at Metro Manila dahil sa patuloy na kakulangan ng power supply sa bansa.

Sa isang advisory ng NGCP, posibleng ipatupad nila ang manual load dropping (MLD) mula alas-9:00 ng umaga hanggang alas-10:00 umaga para anila, “maintain the integrity of the power system”, sa mga sumusunod na lugar:

• LUELCO (bahagi ng La Union at Pangasinan)

• QUEZELCO I (bahagi ng Quezon) • CASURECO II (bahagi ng Camarines Sur)

• MERALCO (bahagi ng Metro Manila)

Gayundin, ipapatupad ang MLD mula alas-10:00 ng umaga hanggang alas-11:00 ng umaga sa mga sumusunod na lugar:

• ISECO (bahagi ng Ilocos Sur)

• QUEZELCO I (bahagi ng Quezon)

• APEC (bahagi ng Albay)

• MERALCO (bahagi ng Metro Manila)

Ang rotational brownouts ay ipapatupad din mula alas-11:00 ng umaga hanggang alas-12:00 ng tanghali sa mga sumusunod na lugar:

• CAGELCO II (bahagi ng Cagayan)

• PELCO I (bahagi ng Pampanga)

• APEC (bahagi ng Albay)

• MERALCO (bahagi ng Metro Manila)

Ang MLD ay isang proseso ng pagpuputol ng kuryente sa mga lugar na sinusuplayan na may kaukulang oras lamang dahil ito sa kakulangan ng power supply. “Schedule may be cancelled if system condition improves, such as if actual demand falls below projections,” ayon sa NGCP.

Inilagay ng grid operator ang Luzon grid sa ilalim ng Yellow Alert, ito ay mula alas-8:00 ng umaga hanggang alas-9:00 ng umaga, mula alas-5:00 ng hapon hanggang alas-6:00 ng gabi at mula alas-11:00 ng gabi hanggang alas-12:00 ng hatinggabi; habang ang Red Alert naman ay mula alas-12:00 ng hatinggabi hanggang alas-5:00 ng hapon at alas-6:00 ng gabi hanggang alas-11:00 ng gabi, kung saan mayroong tinatawag na zero ancillary services o generation deficiency exists.

Ayon sa NGCP, mayroon lamang sa ngayon na available capacity na 11,260 megawatts habang ang operating requirement ay nasa 11,976MW, na nagreresulta sa operating margin deficiency na -716.

Hinimok naman NGCP ang publiko na magtipid sa pagkokonsumo ng kanilang kuryente. Una nang sinabi ng grid operator na asahan ang pagkakaroon ng rotational brownouts sa buong unang linggo ng Hunyo sa gitna ng thin power supply o mahinang suplay ng kuryente dahil mula anila sa ‘planned and unplanned outages’ ng maraming power plants.

500 KM bike lanes sa Metro Manila, Cebu at Davao, matatapos na

ni Lolet Abania | June 1, 2021

Target na matapos ngayong buwan ang mahigit sa 500 kilometro ng bike lanes na isinasagawa sa Metro Manila, Metro Cebu at Metro Davao, ayon sa isang opisyal ng Department of Transportation (DOTr).

Ito ang kinumpirma ni Assistant Secretary Steve Pastor sa ginanap na motu proprio investigation ng House Committee on Transportation hinggil sa pagkaantala umano ng konstruksiyon ng proyektong bicycle lanes ngayong Martes.

Ayon kay Pastor, may kabuuang P1.3 bilyong pondo ang inilaan ng gobyerno para sa pagsasaayos ng pedestrian at pagpapatayo ng bicycle lanes sa ilalim ng Bayanihan 2.

Paliwanag ni Pastor, sa nasabing pondo, P1.1 bilyon ang ilalaan para sa bike lanes habang ang natitirang P200 milyon ay ilalaan naman para sa tinatawag na bike sharing stations.

Kinuwestiyon naman ni Samar Representative Edgar Mary Sarmiento, ang panel chairperson, si Pastor kung kailan ang target na petsa ng DOTr para makumpleto ang mga bicycle lanes.

“Magkakaiba po. Para po sa Cebu, matatapos na po ito by June 15. Para po sa Davao, ganoon din po, sa June 15... Para po sa National Capital Region, June 30 po,” ani Pastor.

Sinabi ni Pastor na ang planong haba at layo ng bike lane network sa nabanggit na mga lugar ay ang mga sumusunod:

• Metro Manila - 338.53 kilometers

• Metro Cebu - 129.65 kilometers

• Metro Davao - 54.51 kilometers

Tinanong ni House Minority Leader Joseph Stepen Paduano ang Department of Public Works and Highways (DPWH) kung kayang matapos sa target date ng DOTr ang isinasagawang bike lanes, lalo na sa Metro Manila.

Positibo naman ang naging tugon ni DPWH-NCR Director Eric Ayapana na ito ay matatapos sa oras.

Samantala, magsasagawa ang mga miyembro ng nasabing komite ng actual site inspection sa mga bike lanes sa Metro Manila.

Dine-in resto, tourist spots at outdoor sports, oks na sa NCR Plus at iba pang lugar

ni Mary Gutierrez Almirañez | May 14, 2021

Inilabas na ng Inter-Agency Task Force (IATF) ang mga bagong guidelines na ipatutupad sa ilalim ng general community quarantine (GCQ) ‘with heightened restrictions’ sa NCR Plus Bubble at iba pang lugar simula May 15 hanggang 31, ayon sa inianunsiyo ni Presidential Spokesperson Harry Roque kagabi.

Kabilang sa pinahihintulutan ay ang mga sumusunod:

• 20% capacity sa mga indoor dine-in services at 50% capacity sa outdoor o al fresco dining

• 30% capacity sa mga outdoor tourist attraction

• 30% capacity sa mga personal care services, katulad ng salon, parlor at beauty clinic

• 10% capacity sa mga libing at religious gathering

• Pinapayagan na rin ang outdoor sports, maliban sa may physical contact na kompetisyon

Mananatili pa rin namang bawal ang mga sumusunod:

• entertainment venues katulad ng bars, concert halls, theaters

• recreational venues, katulad ng internet cafes, billiard halls, arcades

• amusement parks, fairs, playgrounds, kiddie rides

• indoor sports courts

• indoor tourist attractions

• venues ng meeting, conference, exhibitions

Higit sa lahat, bawal magtanggal ng face mask at face shield kapag nasa pampublikong lugar. Bawal ding lumabas ang mga menor-de-edad at 65-anyos pataas, lalo na kung hindi authorized person outside residency (APOR).

Patuloy pa ring inoobserbahan ang social distancing sa kahit saang lugar at ang limited capacity sa mga pampublikong transportasyon.

Maliban sa Metro Manila, Bulacan, Rizal, Cavite, at Laguna ay isasailalim din sa GCQ ang Apayao, Baguio City, Benguet, Kalinga, Mountain Province, Abra, Cagayan, Isabela, Nueva Vizcaya, Batangas, Quezon, Puerto Princesa, Iligan City, Davao City, at Lanao del Sur hanggang sa katapusan ng Mayo.

Mananatili naman sa modified enhanced community quarantine (MECQ) ang Santiago City, Quirino, Ifugao, at Zamboanga City.