Gamot ng Merck vs COVID-19, mabisa raw kahit sa ibang variant tulad ng Delta

ni Jasmin Joy Evangelista | October 3, 2021

Mabisa raw laban sa lahat ng variant ng COVID-19, kabilang ang mas nakahahawang Delta variant, ang gamot na "molnupiravir" ng pharmaceutical firm na Merck.

Batay daw sa pag-aaral ng Merck, mas epektibo ang gamot kapag naibigay ito kaagad sa pasyente sa simula pa lang na mahawahan.

Target ng gamot ang enzyme na ginagamit ng virus para magparami.

Sa ulat ng Reuters, naibaba raw ng molnupiravir ng hanggang 50 porsiyento ang tsansa na maospital ang pasyente, at maging ang mamamatay para sa mga pasyenteng severe case.

"This is going to change the dialogue around how to manage COVID-19," ayon kay Robert Davis, chief executive officer ng Merck.

Plano ng Merck at partner nitong Ridgeback Biotherapeutics na humingi ng US emergency use authorization para sa gamot sa lalong madaling panahon.

Magsusumite rin sila ng aplikasyon sa iba't ibang bansa, at kung papayagan, ang molnupiravir ang magiging unang oral antiviral medication para sa COVID-19.

Sa clinical trial, pinainom ng naturang gamot ang mga kasaling pasyente tuwing ika-12 oras sa loob ng limang araw.

"Antiviral treatments that can be taken at home to keep people with COVID-19 out of the hospital are critically needed,” sabi ni Wendy Holman, CEO ng Ridgeback.

Gayunman, hindi binanggit ng kompanya kung mayroong side effect ang molnupiravir.

Pills kontra COVID-19, pinag-aaralan

ni Mary Gutierrez Almirañez | May 28, 2021

Isinasagawa ng American multinational pharmaceutical company na Merck & Co Inc. ang Phase 3 trial ng Molnupiravir o pills kontra COVID-19.

Ayon sa ulat, 1,850 pasyente ang sumalang sa trial, kung saan ipinapainom sa mga ito ang 800 milligrams ng Molnupiravir dalawang beses kada araw sa loob ng 5 days. Inaasahan namang lalabas ang resulta ng trial sa September o October.

Sabi pa ni Merck's Chief Scientific Officer Daria Hazuda, “Viruses are basically little machines and they need certain components to replicate themselves."

Dagdag naman ng infectious diseases physician na si David Hirschwerk ng Northwell Health, "It's great that we have vaccine rollout that has been significant, but it certainly will not be taken by everybody in our population, and not everybody who takes the vaccine will have a full response to it.”

Sa ngayon ay patuloy ang pag-aaral ng mga eksperto sa lahat ng gamot at bakuna na maaaring pumuksa sa lumalaganap na COVID-19 sa buong mundo.