Utos ng ERC sa Meralco: P9.5B sobrang singil, ibalik sa konsyumer

ni Jeff Tumbado @News | August 3, 2026

Photo: File

Mahigit walong milyong consumers ng Manila Electric Company (Meralco) ang makatatanggap ng kabuuang P9.5 bilyong refund matapos iutos ng Energy Regulatory Commission (ERC) na isauli nito ang mga sobrang paniningil o over recoveries.

Ayon sa ERC, ipatutupad ang refund sa loob ng anim na buwan, kung saan makikinabang ang lahat ng customer classes sa average na bawas na P0.3448 kada kilowatt-hour (kWh) sa kanilang singil sa kuryente hanggang sa tuluyang maibalik ang kabuuang halaga.

Mas malaki naman ang matatanggap na refund ng mga residential customers, na aabot sa P0.5861 kada kWh.

Katumbas ito ng humigit-kumulang P117.22 na bawas sa buwanang bayarin ng isang kabahayang kumokonsumo ng 200 kWh kada buwan.

Ipinaliwanag ng ERC na ang refund ay bunga ng isinagawang regulatory review na nagpakitang may sobrang nakolektang distribution charges ang Meralco.

Layunin ng komisyon na maibalik sa mga consumer ang labis na nakolektang halaga at matiyak na ang singil sa kuryente ay nananatiling patas, makatarungan, at naaayon sa umiiral na mga regulasyon.

Para sa higit na transparency, lalabas ang refund bilang hiwalay na item sa buwanang billing statement ng mga kostumer.

Inatasan din ng ERC ang Meralco na magsumite ng regular na ulat hinggil sa pagpapatupad ng refund hanggang sa tuluyang maibalik ang buong P9.5 bilyon sa mga consumer.

System loss sa kuryente, 'wag ipasa sa konsyumer... MVP kay PBBM: Sino'ng magbabayad?

ni Mervin Reyes @News | July 30, 2026

Photo: Manny V. Pangilinan at Pangulong Bongbong Marc - FB Circulated - SONA 2026 PCO

Nagpahayag ng pag-aalala ang Meralco sa panukala ni Pangulong Ferdinand Marcos Jr. na alisin ang system loss sa singil sa kuryente ng mga konsyumer, at iginiit na kailangang malinaw kung sino ang sasagot sa naturang gastos.

Ayon kay Meralco Chairman at Chief Executive Officer Manuel V. Pangilinan, nakahanda ang kumpanya na makipagtulungan sa pamahalaan sa planong pag-amyenda sa Electric Power Industry Reform Act (EPIRA), ngunit binigyang-diin na likas sa transmission ng kuryente ang pagkakaroon ng system losses.

“Inherent in any operation that involves transmission... will involve some losses... The real question is who bears the cost?” ani Pangilinan.

Dagdag pa niya, kung tuluyang aalisin ang system loss charge sa mga konsyumer, maaaring ang mga distribution utility ang mapilitang sumalo sa lahat ng gastos na dulot ng naturang pagkawala ng kuryente sa kanilang network.

Meralco kay PBBM: System loss sa kuryente, 'di maiiwasan

ni Jeff Tumbado @News | July 29, 2026

Photo: File

Sinabi ng Manila Electric Co. (Meralco) na may bahagi ng system loss na hindi maiiwasan sa pamamahagi ng kuryente, kasunod ng panawagan ni Pangulong Ferdinand Marcos Jr. na alisin ang nasabing charges sa electric bills.

Ayon kay Meralco Executive Vice President at COO Ronnie Aperocho, handa silang makiisa sa pagtalakay ng mga panukalang pagbabago sa Electric Power Industry Reform Act (EPIRA).

Gayunman, sinabi niyang likas sa operasyon ng power distribution ang pagkakaroon ng ilang technical losses.

Ang system loss charge ay bumubuo ng humigit-kumulang 5% ng bayarin sa kuryente at sumasaklaw sa pagkawala ng kuryente dahil sa technical at non-technical factors, kabilang ang illegal connection at jumper.

Iginiit din ng kumpanya na patuloy silang namumuhunan sa modernisasyon ng sistema at napapanatili nilang mas mababa sa 6.5% cap ng Energy Regulatory Commission (ERC) ang kanilang system loss.

Samantala, sinabi ng ERC na suportado nito ang panukala ng Pangulo at handa itong makipagtulungan sa Kongreso, Department of Energy, at iba pang sektor upang maipatupad ang mga reporma habang pinananatiling maaasahan at abot-kaya ang serbisyo ng kuryente.