BF, kalaban sa Maynila, pinatututsadahan… RHIAN, TODO-PAYO KAY SAM NA DEDMAHIN SI ISKO

ni Melba R. Llanera @Insider | Mar. 3, 2025

Photo: Sam Verzosa at Isko Moreno - IG, FB

Aminado si Rhian Ramos na wala sa bokabularyo niya ang kasal noon kung kaya’t wala siyang dream wedding, pero nabago ito nu’ng maging kasintahan niya ang businessman at mayoralty candidate na si Sam Verzosa. 

Pagtatapat ni Rhian sa nakaraang mediacon ng upcoming show niya na Where In Manila, naging komportable lang siya sa ideya ng kasal nang maging sila ni Sam, at kung paano nila matagumpay na nalagpasan ang mga pagsubok at hindi nila pagkakaintindihan o conflicts sa pagitan nila ang nagbukas sa mga mata niya na gusto niyang tumanda na si Sam ang kasama at vice-versa. 

Ito nga rin ang dahilan na bukod sa walang dream wedding ay walang masabing motif o konsepto sa kasal si Rhian Ramos dahil hindi nga niya pinangarap talaga noon na magpakasal.

---

NGAYON nga na kasagsagan na ng kampanya para sa 2025 national elections, mainit na pinag-uusapan ang pagpaparunggitan nina Sam Verzosa at Isko Moreno na magkatunggali bilang mayor ng Maynila. 

Sa isang speaking engagement ni Isko ay nabanggit nito ang isang pabida, Superman na nagpapamudmod ng mga de-lata at bigas sa mga taga-Maynila, pero hindi naman daw naramdaman nu’ng panahon ng pandemya. 

Agad namang nagpakita ng mga resibo si Sam kung saan inilabas nito sa kanyang social media ang mga videos kung saan kasama si Isko ay nagbigay ng donasyon at tulong ang Frontrow International nila ni RS Francisco nu’ng si Isko pa ang nakaupong mayor ng Maynila. 

Tinanong namin si Rhian kung ano ba ang payo na ibinibigay niya kay Sam ngayon na mainit ang pagpapalitan ng mga salita ng kanyang BF at ni Isko. 

Ayon sa Kapuso actress-TV host, sinabihan niya si Sam na bilang public personality ay hindi dapat nito tinitingnan na personal ang atake sa kanya dahil hindi naman siya personal na kilala ni Isko. 

Pagkukuwento rin sa amin ni Rhian, sinabihan niya pa ang boyfriend na walang kahit na sinong tao ang makakapagsabi kung sino talaga ito kundi ang sarili lang nito. 

Pahayag din ni Rhian, kapag may bagong nababasa si Sam ay nagkukuwento ito sa kanya. Binabasa niya ang lumabas na kuwento o isyu at lagi niyang sinasabi kay Sam na dedmahin na lang ito at nakikinig naman daw sa kanya ang boyfriend.

Sa ngayon ay abala rin sa taping ng Sang’gre kung saan gumaganap si Rhian bilang si Metina Cassiopeia, pero bukod dito ay binalikan ni Rhian ang hosting kung saan mapapanood siya sa Where In Manila, isang magazine/lifestyle show sa darating na March 8, tuwing Sabado, sa ganap na 11:30 nang gabi. Excited at masaya si Rhian sa bago niyang show kung saan maipapakita niya ang mga maipagmamalaking tourist spots at mga pagkain sa Maynila at mga kalapit na bayan sa buong Metro Manila.

---

NAGULAT kami sa husay sa pag-arte ng vlogger at bida sa upcoming horror film na Postmortem na si Jai Asuncion, kasama sina Alex Medina, Agassi Ching at Sachzna

Laparan sa ilalim ng panulat at direksiyon ni Direk Tom Nava. 

Isa itong pelikula na umiikot sa pamahiin nating mga Filipino kapag nakakita ng walang ulo o pugot na tao. 

Maganda ang istorya at mahusay ang pagkakadirek ni Direk Tom sa kabila na ito ang kauna-unahang full-length movie niya. Nagsimula at nahasa si Direk Tom sa mga teleserye ng ABS-CBN kung saan nagtrabaho siya bilang cameraman sa mga sumikat na serye ng Kapamilya Network tulad ng Wild Flower, Blood Sisters, atbp.. 

Wala namang maaaring kumuwestiyon sa husay sa pagganap ni Alex Medina na talaga namang kahit na anong role ang ibigay ay tiyak na lulutang at tatatak. 

Bumilib lang kami kay Jai dahil natural na natural at hindi mo aakalaing ito ang kauna-unahang pelikula na ginawa niya. 

Bilib din kami sa propesyonalismo nina Jai at Agassi dahil mag-ex pala ang dalawa at naging magkarelasyon sila sa loob ng 5 taon. 

Hindi rin itinago ni Jai na nu’ng una ay nagdalawang-isip siya nang malaman niya na makakasama niya sa Postmortem si Aga, kung saan bukod sa malalim ay masakit ang naging paghihiwalay nila. 

Nagdesisyon ang dalawa na ihiwalay ang personal nilang buhay sa kanilang trabaho at magpokus na lang sa kani-kanilang career kung saan kilala rin sila bilang mga vloggers.

Ang Postmortem ay mapapanood na sa darating na March 19 sa mga paborito nating sinehan at ito ay produced ng WeCamp Entertainment at Square One Studios. 

Gusto rin naming magpasalamat sa aming nanay-nanayan na si ‘Nay Cristy Fermin sa imbitasyon kung saan ang mediacon na ito ay naging get-together na rin ng mga anak sa showbiz ni ‘Nay Cristy at ginanap pa ito sa Mga Obra ni Nanay na malapit sa puso ng bawat isa sa amin.

Kapag wala na ang marka ng pambubugbog… NETIZENS, NANINIWALANG BABALIKAN NI JELLIE SI JAM

ni Melba R. Llanera @Insider | Feb. 28, 2025

Photo: Jellie Aw at Jam Ignacio - IG

Sa kabila ng binitawang salita ni Jellie Aw na hindi na matutuloy ang kasal nila ng dating fiancé na si Jam Ignacio na ex-boyfriend ni Karla Estrada, marami pa ring mga netizens ang naniniwala na lumipas lang ang panahon na maghilom ang pisikal at emosyonal na sugat dala ng pisikal na pananakit at lumamig lang ang isyu ay malaki ang tsansa na sa huli ay magkabalikan pa rin ang dalawa. 

Sa ngayon nga ay lumipad na pa-Japan si Jam pagkatapos na personal itong humarap sa tanggapan ng NBI upang kausapin si NBI Director Jaime Santiago at ilang opisyal nu’ng February 21 pagkatapos na hindi nito siputin ang itinakdang araw na dapat ay magtungo siya sa tanggapan noong February 20 kaugnay ng physical abuse case na isinampa sa kanya ni Jellie. 

Sa kanyang social media account naman ay nagbigay ng update si Jellie na kasalukuyang naghihilom na ang kanyang sugat. May pasa pa siya sa mata at basag pa ang ngipin pero may schedule na siya para maayos ito ng kanyang dentista.

Masalimuot at masakit ang itinakbo ng relasyong Jam at Jellie pero marami ang naniniwala na sa lalim ng pagmamahal na nararamdaman ng DJ-social media influencer sa mapapangasawa ay hindi ganoon kabilis at kadali para mamatay ang damdamin nito kay Jam sa kabila ng pisikal na pananakit sa kanya. 

‘Ika nga, abangan na lang ang susunod na kabanata kung may balikan bang magaganap o wala, lalo’t may sarili nga raw batas ang puso na tanging mga taong nagmamahal lang ang nakakaunawa.

---

BUKOD sa parehong mahuhusay at de-kalibreng mga aktres, kapansin-pansin din na walang sapawang naganap sa mga eksena nina Dimples Romana at Iza Calzado sa pelikulang The Caretakers (TC) ng Regal Films at Rein Entertainment. 

Parehong giving o mapagbigay bilang mga aktres, wala sa bokabularyo ng dalawa ang manapaw ng mga nakakaeksena, sa kabila ng katotohanang sa husay nila ay kayang-kaya nilang gawin ito.  

Masaya rin dahil ang pelikulang TC ang nagbukas ng pagkakaibigan sa kanilang dalawa. Papuri nga ni Dimples kay Iza ay mabait itong tao onscreen at offscreen man at nakita niya ito lalo na nang maging isa na itong ina. 

Sa presscon proper ay nabanggit nga ng Kapamilya actress na nadagdagan ang mga superstars niyang kaibigan sa katauhan ni Iza. Dalawa kasi sa malalapit na kaibigan ni

Dimples sa industriya ay sina Angel Locsin at Bea Alonzo. 

Kinumusta namin kay Dimples si Angel kung may balak na ba itong bumalik sa show business gaya ng hiling ng mga tagahanga nito, at ayon sa aktres ay wala siya sa posisyon para magsalita tungkol dito at binibiro niya nga sina Neil at Angel na siya na ang tumatayong spokesperson ng mag-asawa dahil hindi nagpapakita sa publiko ang mga ito. Para lang sa Kapamilya actress, anuman ang maging desisyon ng mga kaibigan niya ay lagi niyang susuportahan ang mga ito at kung saka-sakali ngang magbalik sa show business si Angel ay tiyak ang suporta niya sa kaibigan.  

Samantala, isa sa mga pinakamahuhusay na supporting actress natin sa ngayon sina Dimples at Iza at kung mapapanood lang ang TC ay masasabi nating sa kahit na anong roles o genre ng isang proyekto ay lalabas at lalabas talaga ang galing at brilyo ng isang artista. 

Nagsimula nang mag-showing kahapon, February 26, masasabi naming sulit ang ibabayad ng sinumang manonood ng TC dahil bukod sa husay ng mga gumanap at pagkakadirek ng pelikula ay maganda ang mensahe na gustong ipaabot ng The Caretakers na matuto nating mahalin at alagaan ang ating kalikasan.

Ibinulgar ng BFF na si Neil, nangangamoy-balikan… KATHRYN AT DANIEL, NAG-UUSAP NA ULI

ni Melba R. Llanera @Insider | Feb. 22, 2025

Photo: Kathryn Bernardo at Daniel Padilla - Instagram

Sa kabila ng pisikal na pananakit ni Jam Ignacio sa fiancée na si Jellie Aw, isa naman sa mga makakapagpatunay na hindi nakaranas ng physical abuse si Karla Estrada na dating kasintahan ni Jam, ay si Neil Coleta. 

Malapit na kaibigan at ninong ng bunsong anak nina Neil at Chinkee Brice si Daniel Padilla. Kaya naman, hiningan namin ng reaksiyon si Neil — na ngayon ay tumatakbong konsehal sa bayan ng Dasmariñas, Cavite — sa balitang pambubugbog ng ex ni Karla na si Jam, kay Jellie.

Ayaw magsalita ng aktor tungkol sa nabalitang pambubugbog ni Jam sa fiancée nito dahil baka mabigyan ng ibang interpretasyon kung anuman ang magiging komento niya at bumalik sa kanya. Pero aminado siya na ikinagulat niya nu’ng lumabas ang balita. 

Ayon kay Neil, ang gusto niya ay maging balanse sa panig nina Jam at Jellie. Pero bilang isang lalaki, hindi raw niya nagawa at magagawang manakit ng kahit na sinong babae, at mali talaga ito. 

Siniguro rin ni Neil na hindi nasaktan ni Jam si Karla dahil bukod sa sanay na sa buhay ang aktres ay alam niyang hindi papayag ang mga anak nito — lalo na si Daniel na isang Padilla na may mataas na respeto sa mga babae — na masaktan ang ina.

Si Neil ang nagkumpirma noon na mukhang may problemang pinagdaraanan ang relasyon nina Daniel Padilla at Kathryn Bernardo, bago pa man kinumpirma ng dalawa ang kanilang breakup. 

Hindi man nila napag-usapan ni Daniel ang tungkol dito dahil ayaw niyang magtanong ng personal sa kaibigan, ramdam niya na dinamdam at nasaktan si Daniel sa paghihiwalay nito at ni Kathryn dahil hindi rin naman biru-biro ang siyam na taon na pinagsamahan ng dalawa.

“Move on’ ang tanging nasabi ni Neil sa kaibigan na alam niyang ginagawa naman nito sa ngayon dahil pokus ito sa kanyang career, lalo na sa taping ng Incognito. 

Sa balita namang nagkakausap na raw sa ngayon sina Kathryn at Daniel at naniniwala ang iba na malaki ang tsansa na magkabalikan ang dalawa, “Mukha nga” ang isinagot sa amin ni Neil, at kung mabibigyan ng pagkakataon at gugustuhin ng dalawa na magkabalikan ay magiging masaya siya.

Samantala, tumatakbo bilang konsehal ng Dasmariñas, Cavite, at kabilang sa tinatawag na “F4 ng Dasmariñas” na kinabibilangan din nina Arnel del Rosario, Kagawad Vlad Maliksi at Tutuy Perez, pare-parehong tumatakbong independent ang apat na ang plataporma ay para sa ikauunlad at ikabubuti ng mga kababayan nila tulad ng livelihood, edukasyon, sports, at mental health awareness. 

Sa tanong kung bakit nagdesisyon si Neil na pasukin ang pulitika, ikinuwento ng aktor na noon pa man ay naging ugali na niya ang magbigay ng tulong sa mga nangangailangan at ilang charitable institutions, at naniniwala siya na mas magkakaroon siya ng mas malaking oportunidad na mas gawin ito kapag nakapasok siya sa public service.

---

NAPAKAKULAY ng buhay ni Jojo Mendrez, kung saan dumaan pala ito sa isang mahirap at malungkot na kabataan. 

Nanggaling sa isang mahirap na pamilya, naranasan ni Jojo ang gumawa ng walis-tingting at magbenta nito para makatulong sa pinansiyal na pangangailangan ng kanilang pamilya. 

Sinuwerte sa pagnenegosyo, unang napakinggan ang singer ding si Jojo sa revival ng kantang Handog na nanalong Revival Recording of the Year sa 11th Star Awards for Music, at sumunod niyang ini-revive ang kantang Somewhere In My Past ni Julie Vega na ngayon ay mayroon nang 45 million views. 

Pumirma ng kontrata sa Star Music ng ABS-CBN, sigurado kami na ang isa sa magko-compose ng mga susunod na aawitin ni Jojo ay ang mahusay na composer ng Star Music na si Jonathan Manalo.

Sa interbyu noon ng mga hosts ng radio station na Easy Rock (ER), natanong si Jojo kung ano kaya ang sasabihin o ipapayo niya sa dating Jojo Mendrez. 

Ayon sa Revival King, sasabihin niya sa sarili na huwag mawalan ng pag-asa sa iyong pangarap at ang mga ito ay mangyayari sa tamang panahon na itinakda ng tadhana at ng Nasa Itaas para sa iyo.