Pagod na raw magsinungaling... YNNA, KUMANTANG PINAKAMAKASALANAN

ni Melba R. Llanera - @Insider | November 16, 2020

Sa mediacon ng Ang Daigdig Ko'y Ikaw nu'ng November 10 sa INC Museum, nakausap namin si Ynna Asistio na siyang bida sa kauna-unahang drama-romantic series ng Net 25.

Napag-usapan namin ang tungkol sa depresyong pinagdaanan niya kung saan pinag-usapan ang inilabas niyang video na iyak siya nang iyak at inamin na marami siyang sikretong kasalanan at pagod na siyang maging sinungaling.

Ayon kay Ynna, may anxiety attacks na talaga siyang nararanasan nu'ng mga panahon na 'yun, pero lalong pinalala ng pandemya. Nakaramdam siya noon ng takot na sa pagiging sobrang relihiyoso ng pamilya ay maliligtas ang mga ito at maiiwan siya, bukod pa sa sumabog na rin siya dahil sa pagtatago ng totoong nararamdaman para hindi mag-alala sa kanya ang kanilang pamilya.

Paglalarawan nga sa amin ni Ynna, ito ang panahon na pakiramdam niya ay namatay ang kanyang kaluluwa at ang paglapit lang niya muli sa Panginoong Diyos ang nagpalinaw sa kanyang isip at kinapitan niya.

Dito rin niya naramdaman na gusto niya uling umarte at nabigyan naman ito ng katuparan dahil dumating sa kanya ang seryeng Ang Daigdig Ko'y Ikaw pagkatapos ng napakatagal na panahon na paghihintay.

Labis ang pasasalamat ni Ynna sa kaparehang si Geoff Eigenmann at sa buong staff ng show dahil naging madali para sa kanya ang lahat sa kabila ng 'di biru-biro ang umarte at umiyak. Papuri nga ni Ynna, mapalad siya na si Geoff ang nakapareha dahil sa kabila ng effort nito para maging komportable silang lahat sa set ay naging napakabait nito sa kanya.

Sa ngayon ay dumaraan muli ang pamilya nina Ynna sa pagsubok matapos lumubog ang kanilang bahay sa baha dahil sa Bagyong Ulysses. Pero sa kabila ng matinding pagsubok na pinagdaraanan, mas matibay at mas matapang na ngayon ang aktres na humarap sa mga pagsubok gaano man ito kabigat.

This is it, Kim!... JULIA, BUKING NA NASA RESORT NI GERALD

ni Melba R. Llanera - @Insider | November 11, 2020

Pagkatapos maging trending ang pagbibiro ni Kim Chiu sa It's Showtime tungkol sa matagal nang nababalitang relasyon nina Gerald Anderson at Julia Barretto, lalong tumibay ang tungkol sa kontrobersiyal na relasyon ng dalawa dahil sa ipinost na larawan ng Kapamilya actress sa kanyang Instagram account, kung saan nasa isa siyang hardin ng mga bulaklak.

May caption itong: "My flowers growing beautifully," at may background ito ng isang bahay-kubo na kaparehung-kapareho ng mga nipa huts sa Hayati Private Resort na pag-aari ni Gerald sa Zambales.

Ipinost din ng isang netizen na nagngangalang Marlon Castro Notob ang mga larawang kuha ni Julia at iniugnay ito sa mga kuha naman ni Gerald sa nasabing private resort.

May mensahe rin ito na isa siyang tagahanga ni Julia at 'di siya naniniwala sa mga balita sa dalawa, pero naguguluhan daw siya kung paano nakapagtanim ang aktres ng naggagandahang bulaklak sa resort diumano ni Gerald.

Iba-iba naman ang reaksiyon ng mga netizens tungkol dito. May ilang nagtanggol at nagsabing hayaan na lang ang dalawa na maging masaya sa kung ano ang meron sila, pero may ilan ding nagsabi na kinumpirma lang nito ang matagal nang nababalitang relasyon nila.

May nagbiro rin na kasalanan ito ni Kim dahil inilabas nito ang katotohanan.

Sa eksklusibong interview din ni Julia sa Mega ay inamin ng aktres na masaya siya ngayon at ang rason ay dahil in love siya.

Madir, kaya 'di raw happy… ANGELICA, TINAWAG NA MALDITANG ANAK

ni Melba R. Llanera - @Insider | November 6, 2020

Hindi napigilang sagutin ni Angelica Panganiban ang isang basher na tinawag siyang "maldita daughter" o "malditang anak."

Nu'ng Oktubre 29 ay nag-post ang actress ng mga larawan nila ng inang si Mrs. Annabelle Panganiban sa Instagram kung saan ngiting-ngiti na nakahilig si Angelica sa ina-inahan habang matipid naman ang ngiti nito. Tanging caption niya: "Mamalab," kasama ang tatlong heart emojis.

Positibo naman ang naging reaksiyon dito ng mga netizens, pero tanging isang basher ang nagkomento nang negatibo sa ipinost ng aktres, kung saan pinuna nito ang matipid na ngiti ng ina ni Angelica.

Sabi ng netizen, malungkot daw si Mommy Annabelle dahil nagpalaki ito ng isang malditang anak.

Buwelta agad ni Angelica, mas gugustuhin na niya na ang ina-inahan ang nagpalaki sa kanya kesa ang naturang basher ang maging kapamilya niya.

Sunud-sunod naman ang komento ng mga netizens na nagtanggol sa aktres. Tinawag nila ang basher na mapanghusga, na punumpuno ng galit sa aktres, na hindi nito personal na kilala si Angelica para sabihing maldita at ito nga ang maldita dahil sa panghuhusga sa aktres.

Matapang naman na sinagot ng naturang basher ang mga komento sa kanya ng mga nagtanggol sa Walang Hanggang Paalam lead star.

Ayon sa basher, ang komento niya ay 'di dahil sa galit o hate, hindi siya maldita at tulad niya ay 'di rin diumano mabait si Angelica.

Dagdag pa nito, hindi lahat ay nakikita sa kamera at nagsasabi lang siya nang totoo.

Ang ending, hindi na sinagot ni Angelica ang basher at pinili na lang na 'wag nang patulan.