Depressed, tamad na tamad daw… RYZA, NAKATULALA LANG HABANG IYAK NANG IYAK ANG ANAK

ni Melba R. Llanera - @Insider | February 9, 2021

Sa kabila ng maraming netizens ang nakikisimpatya kay Ryza Cenon sa hirap na pinagdaraanan nito ngayon bilang ina, may ilan pa ring negatibo ang reaksiyon sa sitwasyon ngayon ng Kapamilya actress.

Nanganak nu'ng Oktubre 31, 2020 si Ryza courtesy of her non-showbiz partner na si Miguel Antonio Cruz. Aminado si Ryza na naranasan niya ang magkaroon ng post-partum depression kung saan pakiramdam niya noon ay tinatamad na siya sa buhay, nakatulala lang habang hinahayaan ang anak na si Night na umiyak nang umiyak.

Bukod sa hirap na dinanas sa pagle-labor ay kulang sa pahinga at tulog si Ryza dahil sa pagbabantay sa anak. Pero sa ngayon daw, medyo okay na siya.

Sa negatibong komento ng ibang netizens na mahirap talagang maging ina kapag hindi pa handa sa pisikal, emosyonal at pinansiyal na aspeto ang isang babae, bukod pa sa ilang nagsabi na may attitude problem diumano si Ryza, mas mabuti na 'wag na lang magbasa ng mga komento ang aktres. Baka makaapekto pa sa kanya ito lalo't sensitibo ang isang babae 'pag naging ina na.

Sa kabila ng pagkakaroon na nila ng anak ng live-in partner ay wala pa ring balak ang dalawa na magpakasal. Para kasi kay Ryza ay mas maganda na siguradung-sigurado na sila ng kapareha sa lahat dahil sila ng anak ang pinakamaaapektuhan kapag nauwi lang sa hiwalayan ang relasyon nila sa huli.

Movie, pinirata… JOED, NAGPASAKLOLO SA OMB, FB ACCT. NG MGA NAMIRATA NG MOVIE, TATANGGALIN

ni Melba R. Llanera - @Insider | February 3, 2021

Pormal na nagsampa ng reklamo ang producer ng Anak Ng Macho Dancer na si Joed Serrano sa Optical Media Board para sa mga nagpirata ng kanyang pelikula.

Kasama ang cast ng pelikula na sina Ricky Gumera, Miko Pasamonte, Mhack Morales, Neil Suarez at Charles Nathan, desidido ang buong grupo na mahuli at kasuhan ang mga nagpirata ng pelikula.

May ilan na ibinebenta ang pelikula sa halagang P180, P150 at P100 para sa link at may ilan na ring nakuha na cd copies si Chairman Christian Natividad at ibinigay ito kay Joed.

May isang nagbebenta ng link ang nakausap ni Miko kung saan nu'ng nag-video call siya rito ay sumagot. Sinabihan ni Miko ang naturang pirata na irereklamo ito sa OMB at nagmakaawa, nag-iiyak at nagbantang magpapakamatay.

Ayon kay Joed, ang ikinasama ng loob niya ay pinapatay ng pirata ang pelikulang Pilipino, bukod sa tinatanggalan ng kita ang producer na maaaring maging rason para 'di na ito mag-produce pa ng pelikula.

Siniguro naman ni OMB Chairman Christian Natividad na huhulihin at pananagutin ang mga nagpirata lalo't naiintindihan niya ang hinaing ng mga producers.

Pinasalamatan din ng OMB chair ang pamunuan ng Facebook Philippines dahil nangako ito na ida-down ang mga accounts ng mga nagpipirata bilang suporta sa aksiyon ng OMB, PNP at NBI.

Nakakalungkot lang na para sa iba ay wala silang pakialam sa pamimirata dahil ang motibo lang nila ay kumita ng pera at ang ipinapakain nila sa kanilang pamilya ay galing sa nakaw.

Samantala, para naman sa mga nabitin at gustong mapanood ang Anak Ng Macho Dancer, muli itong mapapanood via ktx mula February 5-7, 9-12 midnight sa halagang P169.

May nakita sa phone ng aktres… BEA AT DOMINIC, BUKING NA NI ENCHONG

ni Melba R. Llanera - @Insider | January 29, 2021

Nabuko si Bea Alonzo ng kaibigang si Enchong Dee na ang nababalitang boyfriend na si Dominic Roque ang nasa kanyang "last Facetime video."

Ito ang laman ng vlog ng aktres nu'ng January 23 kung saan kasama niya sa vlog si Enchong.

Hinamon ni Bea ang kaibigan na maglaro sila ng "Show Me Your Phone" challenge. Nang tingnan ni Enchong ang phone ni Bea, napansin nito na isang Nic ang nasa last call log ng aktres.

Inusisa ng aktor si Bea na nu'ng una ay ayaw pang umamin, pero kalaunan ay sinabi rin na si Dominic nga ito.

Natatawang dinagdagan ni Bea ng Ochoa ang isinagot na Dominic para sabihing ang aktor na si Dominic Ochoa ang naka-Facetime niya.

Natawa na lang din si Bea sa nagawang pag-amin at nagbiro na ang init at bakit daw ba nila ito ginagawa ni Enchong.

Nu'ng January 27 naman ay si Dominic ang nag-post ng TikTok video nila ni Bea na kuha pa nu'ng 2019 sa Japan. Meron ding mga artsy videos sina Bea at Dominic sa isang art installation museum sa Tokyo, Japan.

Nu'ng January 19 ay nag-post naman ng larawan niya si Dominic na kuha sa BenCab Museum sa Baguio. May caption itong: "Picture ko, Caption Mo," at may isang fan na nagtanong kung nasaan si Bea, na sinagot naman ni Dominic na ito ang kumukuha sa kanya.

Kinilig ang maraming netizens sa sagot ni Dominic lalo't marami ang boto na magkaroon ng relasyon ang dalawa.

Inamin naman ni Bea sa vlog nila ng kanyang ina na dyodyowain para sa kanya ang tulad ni Dominic pero ang hinihintay pa rin ng marami ay kailan daw kaya aamin ang dalawa sa tunay na estado ng kanilang relasyon.