Todo-tanggal sa anak noon… VILMA, TODO-THANK YOU NA ABSUWELTO SA ESTAFA SI LUIS

ni Melba R. Llanera @Insider | August 11, 2023

Isang thank you ang mensaheng ipinadala sa amin ni Luis Manzano nang i-message namin siya dahil inabsuwelto ng National Bureau of Investigation o NBI ang pangalan niya sa kasong syndicated estafa laban sa presidente at pamunuan ng Flex Fuel.

Sinampahan ng NBI sa Taguig Prosecutor’s Office ang presidente ng kumpanya na si Ildefonso C. Medel, Jr. o kilala sa tawag na “Bong” na itinuring na matalik na kaibigan ni Luis at labing-isa pang opisyal ng Flex Fuel.

Ayon sa NBI, hindi nila kinakitaan na may kinalaman sa kaso si Luis kahit isa siya sa mga incorporators dahil nag-resign na ito at hindi na konektado sa kumpanya nu’ng 2021 — ang taon kung kailan nagsimulang mag-invest ang mga nagreklamo.

Nagsampa na rin ng reklamo si Luis laban sa Flex Fuel dahil pati siya ay nawalan ng P66 milyong investment.

Kung matatandaan ay naging emosyonal at ‘di napigilan ni Vilma Santos na mapaiyak sa guesting niya sa Fast Talk with Boy Abunda nang tanungin tungkol sa isyu at sinabing kailanman ay hindi magagawang manloko ni Luis ng ibang tao.

Sa pagpapalitan nga namin ng mensahe kahapon ng Star for All Seasons, nagpadala ito ng pasasalamat, na mabuti talaga ang Panginoon at kilala niya ang anak.

Si Edu Manzano naman sa panayam namin noon ay positibo na malalagpasan ng anak ang pinagdaraanan dahil alam niya kung gaano katatag si Luis at kumpiyansa siya na haharapin nito ang problema.

Tiyak na mas masaya at mas payapa ang damdamin sa ngayon nina Luis at Jessy Mendiola at mas mae-enjoy nila ang anak na si Baby Peanut ngayong nalinis na ang pangalan ng TV host sa kaso.

LYNN, ‘DI PA RIN NAKAKA-MOVE ON SA PAGKAMATAY NG ANAK NILA NI TIRSO

ni Melba R. Llanera @Insider | August 5, 2023

Para kay Lynn Ynchausti Cruz (misis ni Tirso Cruz III), hindi tamang sabihin na nag-move on at mas magandang sabihin na nagmu-move forward na sila sa pagkamatay ng panganay na anak na si Teejay Cruz nu’ng November 2018 dahil sa sakit na lymphatic cancer.

Paglalarawan ni Lynn sa mabigat na pinagdaanan ng kanilang pamilya dahil sa pagpanaw ng anak, may sugat siya sa puso na nilagyan ng band-aid at kung aalisin ito ay nandu’n pa rin ang sugat at sariwa pa rin.

Para nga kay Lynn, sa sandaling tawagin na siya ng Diyos at magkita sila ng anak sa langit, alam niya na roon pa lang tuluyang gagaling ang sugat. Kamakailan nga ay nagbakasyon ang pamilya nina Lynn at Tirso kasama ang kanilang mga anak.

Pagkukuwento ni Lynn, nu’ng maliliit pa ang mga anak ay ugali na talaga nila ang mag-out of town o mag-out of the country para mag-bonding pero nang mamatay si Teejay ay mas siniguro nila na regular nila itong nagagawa para magkaroon ng quality time sa isa't isa.

Proud na proud naman siya sa asawang si Tirso dahil bukod sa aktibo pa rin ito sa acting ay nakaupo ito ngayon bilang chairman ng FDCP (Film Development Council of the Philippines).

Siniguro naman ni Lynn na prayoridad ng kanyang asawa ang pagiging FDCP chair, pero natutuwa siya na naipapakita pa rin nito ang talento sa pag-arte. Magkasama sila sa pelikulang When I Met You in Tokyo kung saan ginagampanan ni Tirso ang role bilang matalik na kaibigan ni Christopher de Leon, habang siya ay bilang malapit namang kaibigan ni Vilma Santos sa istorya.

Proud na proud si Lynn na kasama siya sa cast ng comeback movie ng tambalang Vi-Boyet na ang malaking porsiyento ng pelikula ay kinunan sa Japan. Nagpapasalamat din siya na sa kabila ng ilang aberya na pinagdaanan nila habang isinu-shoot ang pelikula gaya ng pag-ulan ay tinulungan sila ng Diyos para mairaos nila nang maayos at matapos nang maganda ang pelikula na umaasang mapabilang sa 2023 Metro Manila Film Festival.

Pareho ring kaliwete… ANAK NINA LUIS AT JESSY, SI VILMA ANG MAS KAMUKHA

ni Melba R. Llanera @Insider | July 30, 2023

Kinatutuwaan ng mga netizens ang mga posts ni Ms. Vilma Santos-Recto kung saan ipinapakita niya ang mga larawan nila ng apong si Isabella Rose o Baby Peanut at kapansin-pansin ang malaki nilang pagkakahawig.

Madalas, parehong naka-headband ang mag-lola sa pinagtabing larawan kung saan kitang-kita ang resemblance nilang dalawa.

Sa interview namin sa Star for All Seasons sa nakaraang pictorial para sa pelikulang When I Met U In Tokyo, masayang nagkuwento ang aktres na bukod sa pareho silang mahilig mag-headband ng apo ay pareho pala silang kaliwete.

Lolang-lola na ibinahagi sa amin ni Ate Vi na isa sa mga nagbibigay ng inspirasyon sa kanya ang apo, pero ayaw din niyang solohin ang apo dahil sa edad nitong anim na buwan ay alam niya na gusto ng mga magulang nito na mas makasama si Baby Peanut.

Nagpasalamat din si Ate Vi sa manugang na si Jessy Mendiola sa naging pahayag nito na labis ang pasasalamat niya sa kanyang mga in-laws dahil anumang oras na kailangang may pag-iwanan sa anak ay laging available ang mga ito, bukod pa sa nakikita niya kung paano alagaan at mahalin ng mga ito ang kanilang anak ni Luis Manzano.

Siniguro rin ni Ate Vi na anumang oras na kailanganin nina Luis at Jessy ng suporta at tulong ay lagi siyang available para sa mga ito.

Nakita rin ng aktres kung gaano kalaki ang ipinag-mature ng anak na si Luis mula nang dumating sa buhay ng mag-asawa si Baby Peanut.

Pagmamalaki nga ni Ate Vi ay moment na maituturing 'yung video ni Luis kung saan tila ayaw payagan ni Baby Peanut ang ama para magtrabaho.

Samantala, masaya at sobrang excited si Vilma sa pagpapalabas ng comeback project ng love team nila ni Christopher de Leon, ang When I Met U In Tokyo. Hiling ng marami ay masama sana bilang isa sa mga entries sa 2023 Metro Manila Film Festival ang pelikula.

Para kay Ate Vi, ipinauubaya na lang niya sa tadhana kung nakatakda bang mapasama sila sa MMFF, pero alam niya na magandang mapabilang sila rito dahil ito ang pagkakataon na may pera ang tao at nanonood talaga sa mga sinehan.

Natutuwa rin siya na walang nakitang pagbabago sa chemistry nila ni Boyet at hanggang ngayon ay nandu'n pa rin 'yun. Biro nga sa amin ni Ate Vi, kung tutungtong kaya sila ni Boyet sa edad na otsenta'y singko ay may mag-aalok pa rin kaya sa kanila ng pelikula?

Puring-puri rin ni Ate Vi ang lahat ng bumubuo sa When I Met U In Tokyo mula sa mga kapwa artista, staff at production crew na ayon sa kanya ay naitawid nila nang maayos ang pelikula kahit pa nga may mga aberya silang napagdaanan habang nagsu-shoot sila sa Japan ng malaking porsiyento ng pelikula.