Asawa ni Noli de Castro, pumanaw na

ni Ronalyn Seminiano Reonico | July 31, 2021

Pumanaw na ang asawa ni Noli de Castro na si Arlene Sinsuat ngayong Sabado nang umaga, ayon sa kumpirmasyon ng anak nilang si Katherine.

Post ni Katherine, general manager ng People’s Television Network sa Facebook, “Thank you for your prayers.

“As of now, we are still finalizing plans for her burial.”

Aniya pa, “I feel so down. My head hurts and my tears never seem to stop.”

Samantala, hindi binanggit kung ano ang sanhi ng pagkamatay ni Arlene.

Nag-umpisa ang media career ni Arlene noong 1981 sa MBS-4 (Maharlika Broadcasting System).

Naging bahagi rin siya ng ABS-CBN Corp. bilang executive producer at noong 1990s, na-promote siya bilang Vice President of the Current Affairs Department ng naturang network.

Bakuna sa media, BPO, etc., sinimulan na

ni Ronalyn Seminiano Reonico | June 7, 2021

Sinimulan na ngayong Lunes ang COVID-19 vaccination sa mga economic frontliners o A4 priority group.

Nagsagawa ang pamahalaan ng symbolic vaccination sa 50 katao mula sa tourism, transportation, mass media, food service, business process outsourcing (BPO) industry, atbp. sa Pasay City.

Kabilang ang TV hosts na sina Iya Villania at Drew Arellano sa mga nakatanggap ng first dose ng bakuna kontra COVID-19 na itinurok ni Department of Health (DOH) Secretary Francisco Duque III.

Samantala, uunahin ang pagbabakuna sa mga A4 group na nasa Metro Manila, Bulacan, Cavite, Rizal, Laguna, Pampanga, Batangas, Cebu, at Davao.

Taga-media, ipinauuna na rin sa bakuna

ni Ronalyn Seminiano Reonico | April 13, 2021

Isasama na ang mga media workers sa ipaprayoridad ng pamahalaan na mabakunahan laban sa COVID-19, ayon kay Testing Czar Secretary Vince Dizon ngayong Martes.

Pahayag ni Dizon, “Nakausap ko si National Economic and Development Authority (NEDA) [Acting] Secretary Karl Chua kahapon at ire-revise nila ang listahan na kasama na ang media sa A4.

“Ang media ay frontliners kaya dapat makasama sa A4.”

Noong Lunes, inilabas ng pamahalaan ang listahan ng mga manggagawang isasama sa 4th priority group ng vaccination program na sumunod sa mga healthcare workers, senior citizens at mga may comorbidities.

Samantala, si Senator Joel Villanueva ang nagsulong na isama ang mga media workers sa listahan ng prayoridad ng pamahalaan na mabakunahan laban sa COVID-19 dahil sila umano ang nagsisilbing "information frontliners" ngayong panahon ng pandemya.

Sa naganap namang press briefing, pahayag ni Presidential Spokesperson Harry Roque, Jr., “Hintayin natin ang susunod na IATF meeting, ako na po ang maglalabas [ng listahan] pati po ang klasipikasyon ng mga mamamahayag.”