Impresibo si Johnson, Lee nakabawi sa ONE C'Ship 160

ni MC - @Sports | August 28, 2022

Nagdagdag ng panibagong koleksiyon ng world title si dating UFC flyweight world champion Demetrious Johnson nang impresibo nitong mapabagsak si Adriano Moraes at angkinin ang ONE flyweight world title sa kanilang pinakaaabangang rematch kahapon sa Singapore Indoor Stadium.

Naunang masipag sa atake si Johnson sa kaagahan ng round sa bisa ng malalakas na sipa at halos gutayin na si Moraes. Nakasilip ng pagkakataon ang Brazilian na makasipa at mai-takedown nang magpatama si Johnson ng siko sa kilay ni Moraes.

Nagpatama pa si Moraes ng head kick na nagpasuray kay Johnson sa round two.

Sinundan ng Brazilian ng panunuhod sa ulo habang nasa canvas pero nakapiglas si Johnson nang tangkain siya sa choke ni Moraes.

Nagpatuloy ang ex-UFC fighter sa malinis na pagpapadapo ng strikes sa opening minute ng round three. Nagpadapo si Moraes ng mga jabs para kontrolin ang kasagupa pero higit na nagmalupit ang mga suntok at sipa ni Johnson sa kabuuan ng round.

Samantala, muling nabawi ni Mixed martial arts sensation Christian Lee ang ONE featherweight world title kasunod ng second-round technical knockout kontra Ok Rae Yoon sa pinakahihintay din na rematch sa main event ng ONE 160 Biyernes ng gabi Singapore Indoor Stadium.

Mabilis agad ang pagsugod ng 24-anyos na si Lee sa opening round. Sa round 2, nagpakawala si Lee muli ng malupit na right hand para pahinain ang tuhod ng kasagupa. Nasukol na at napako sa gilid ng cage, sinundan agad ni Lee ng malalakas na panunuhod para mapilitan ang referee na itigil na ang bakbakan sa 1 minuto ng round 2.

Habang sa co-main event, si Tang Kai ang naging unang Chinese male ONE Championship world champion nang talunin si Thanh Le sa bisa ng unanimous decision at kunin ang ONE featherweight world title.

Inoue vs. Butler, wala nang atrasan sa Disyembre

Fni MC - @Sports | August 26, 2022

Kasado na sa Disyembre ang undisputed bantamweight showdown sa pagitan ng The RING, WBC, WBA, at IBF world champion na is Naoya Inoue at WBO world champion, Paul Butler.

Ayon sa ulat, sisiklab ang bakbakan ng dalawa sa Disyembre 13 sa Japan. Si Inoue, na nagtataglay ng perpektong rekord na 23-0 na may 20 knockouts, ay nagmula sa isang makabagbag-damdaming second-round technical knockout na tagumpay laban kay Nonito Donaire Jr. noong Hunyo sa Super Arena sa Saitama, Japan.

Si Butler (34-2, 15KOs) naman ay nanalo ng malinaw na unanimous decision kontra kay Jonas Sultan upang angkinin ang WBO interim bantamweight title noong Abril.

Itinaas siya na ganap na kampeon ng sanctioning body nang tanggalan si John Riel Casimero ng kanyang WBO world bantamweight title matapos niyang labagin ang panuntunan ng British Boxing Board of Control na nagbabawal sa mga boksingero na gumamit ng sauna para magbawas ng timbang bago ang laban.

Si Inoue, na tinaguriang no.1 pound-for-pound fighter sa mundo ngayon ng The RING, ang magiging unang hindi mapag-aalinlanganang kampeon ng Japan sakaling malampasan niya si Butler.

Kapado na ni Clarkson ang laro ng Gilas Pilipinas

Fni MC - @Sports | August 24, 2022

Halos wala pang isang linggong nag-eensayo kasama ang Gilas Pilipinas, sinabi ng Samahang Basketbol ng Pilipinas na si Jordan Clarkson ay nakikibagay nang husto sa pambansang koponan bago ang kanilang laro sa Lebanon sa ikaapat na window ng 2023 FIBA World Cup Asian Qualifiers.

Ayon kay SBP executive director at spokesperson Sonny Barrios na komportable na si Clarkson sa mga kapwa manlalaro ng Gilas. “Napakahusay niyang nakaka-adapt at nakaka-relate sa tatlong senior coach: sina Chot (Reyes), Tim (Cone), at Jong (Uichico),” sabi ni Barrios.

“Aside from the high energy na napansin ko prevailing sa buong team, as far as Jordan is concerned, pati ‘yung side interaction nila sa kapwa eh ano siya, very comfortable.”

Para kay Barrios, ang mga nationals na patungo sa Lebanon ay may chemistry na ng koponan.

“As far as cohesion is concerned, magandang-maganda. Very promising at very nice to watch silang magkakasama,” wika nito.

Habang si Clarkson ay saglit lang kasama sa koponan, sinabi ni Barrios na ipinakita na ng Fil-Am NBA player na siya ay magaling gaya ng inaanunsyo. “As expected, ‘yung tinatawag na learning curve niya sa plays eh napakabilis. ‘Yung lahat ng katabi ko na nanonood ng practice, iisa lang ang komento nila, iba talaga ang kilos ni Jordan,” dagdag ni Barrios. “Hindi lang siya one cut above the rest, if I may say without downplaying the ability of our players.”

Sa inihayag ng 13-man lineup, kabilang si Clarkson, noong Lunes, sinabi ni Barrios na magbibigay ng magandang laban ang Gilas laban sa Lebanon. “Mabigat ‘yung Lebanon pero we are confident that we will play well. ‘Di natin puwedeng sabihin na siguradong tatalunin natin, pero siguradong lalaban tayo ng magandang laban.”

Makakalaban ng Gilas Pilipinas ang Lebanon sa Biyernes ng madaling araw (oras ng Maynila).