World class pole vaulters Nilsen, Braz at Duplantis, lalaro sa bansa

ni VA / MC - @Sports | September 24, 2022

Sasabayan ng husay ni Pinoy Ernest John "EJ" Obiena bilang world's No. 3 ang mga world-class pole vaulting colleagues na dadalhin niya sa bansa sa isang invitational competition sa 2023.

Iimbitahin na makarating sa Pilipinas sina world No. 2 Chris Nilsen, Rio 2016 Olympics gold medalist Thiago Braz lalo na si world and Olympic champion at world record holder Armand Duplantis.

Sa unang pagkakataon, ang tatlo at iba pang world class pole vaulters ay magpapakita ng mga high-flying acts sa harap ng Pinoy fans.

“The objective is to bring them here after the outdoor season’s over,” saad ni Obiena kay Philippine Olympic Committee President Rep. Abraham “Bambol” Tolentino sa isa nilang pag-uusap habang nasa bakasyon sa bansa ang world championships bronze medalist kasama ang nobya na German long jumper na si Caroline Joyeaux.

Aprubado ito ni Tolentino at hahanapan na ito ng POC head ng venue.

“The Picnic Grove here could be an ideal venue,” saad ni Tolentino, hinggil sa paboritong destinasyon ng local at foreign tourists sa Tagaytay City.

Itutulad ang setup na parang sa Europe, isang street venue kung saan ang runway, box, crossbars at landing area ay portable o collapsible. “With the Taal Volcano as backdrop, what more could you ask for—a world-class pole vault action in one of the most picturesque tourist attractions in the country,” saad ni Tolentino. “Every jump will be postcard-perfect.”

Ang European outdoor season ay magtatapos sa unang linggo ng Setyembre at ang Asian Games sa Huangzhou ay naka-set sa parehong buwan sa 2023. Napipisil nina Obiena at Tolentino ang last part ng Setyembre o early mid-October bilang petsa. “The event will be a spectator-friendly event, and it’s planned that it be sanctioned by World Athletics,” ani Obiena.

Mayweather-McGregor 2, kasado na; Phoenix Suns ng NBA, ibinebenta na

ni MC - @Sports | September 23, 2022

Nilinaw ni retired US boxing champion Floyd Mayweather na ikinakasa na nila ang pangalawang paghaharap nila ni UFC star Conor McGregor.

Ayon kay Mayweather, magaganap ang kanilang nilulutong laban sa 2023. Nilinaw din ni Mayweather na ang kanilang pangalawang paghaharap ay isang uri ng exhibition match imbes na actual boxing match.

Kung matatandaan, sa una nilang paghaharap noong 2017, pinatumba ng 45-anyos na si Mayweather ang dating UFC Irish fighter. Nanatiling walang talo si Mayweather mula ng magretiro na may 50 wins at lumaban na ng ilang ulit sa mga exhibition fight.

Aminado naman si McGregor na target nitong lumaban muli sa mixed martial arts matapos ang pagkatalo noon kay Dustin Poirier. Ayon kay UFC President Dana White, target niyang makabalik sa octagon si McGregor hanggang sa katapusan ng taon o sa 2023.

Samantala, matapos parusahan at pagmultahin ng $10M ng NBA ang may-ari ng Phoenix Suns na si Robert Sarver dahil sa akusasyong misogynist at racist, inihayag nito na na ibebenta na niya ang koponan.

Kasunod ng mga parusang ipinataw noong nakaraang linggo, nanawagan si NBA players union chief Tamika Tremaglio na ipagbawal si Sarver habang buhay at idineklara ng mga NBA stars na sina LeBron James at Chris Paul na hindi sapat ang mga parusa.

Sinabi ng major sponsor na PayPal na hindi nito ire-renew ang deal nito sa team kung sangkot pa rin si Sarver at nanawagan si Suns vice chairman Jahm Najafi na magbitiw si Sarver.

Sinabi ni NBA commissioner Adam Silver na hindi niya inaasahan na dahil sa parusa ay ibebenta ni Sarver ang club tulad ng ginawa noon sa dating may-ari ng Los Angeles Clippers na si Donald Sterling dahil sa pagiging racist.

New MMA Warriors, hanap ng Team Lakay

ni MC - @Sports | September 22, 2022

Paghahanap ng bagong mga hahangaang bituin mula sa serye ng Philippine Mixed Martial Arts ang pakay ni coach Mark Sangiao, ang master ng Team Lakay habang tinutupad ang bagong papel sa ONE Warrior Series Philippines.

Planong maging bahagi sa 16 na MMA artists mula sa umaangat na stable ng mixed martial arts (MMA) scene na Team Lakay ang bagong tutuklasin kasabay ng pagtupad ng mga pangarap na makasabak sa ONE Championship.

Malaking tulong ayon kay dating fighter at coach ang serye sa mga nangangarap na fighters na mapabilang sa Team Lakay at magkaroon ng mga laban sa Circle.

Kaya naman binuksan ang ONE Warriors Series upang magbukas ng oportunidad sa mga promising athletes at magkaroon ng pagkakataon na makilala at sumikat sa MMA. "Apart from that, OWS also shows the harsh reality of being an MMA athlete -- that it's not easy, it's not just a test of physical strength and endurance but a supreme test of character, spirit, and of how far you can go and do to fight for your dream," saad ni Sangiao sa ABS-CBN news.

Hindi maikakailang pinaka-astig ngayong MMA coach si Sangiao hindi lang sa Pilipinas kundi sa buong mundo kung saan lima sa kanyang mga hawak na mandirigma ay nakapagwagi na ng ilang world titles sa ONE Championship.

Unang naging kampeon sa Team Lakay si Honorio Banario sa ONE Championship sa Featherweight division. Habang noong 2016, sinimulan naman ni Eduard Folayang na maghari sa ONE Lightweight World Champion.

Pagdating ng 2018, apat na kampeonato mula sa Team Lakay ni Sangiao ang nasungkit sa ONE Championship. Nagkampeon sa ikalawang pagkakataon ni Folayang sa lightweight, si Joshua Pacio ay naging ONE Strawweight World Champion, nakopo ni Geje Eustaquio ang ONE Flyweight World Title, habang si Kevin Belingon ay ONE Bantamweight World Champion.