11 medalya, hinalibas ng Pencak Silat sa India

ni MC - @Sports | October 18, 2022

Nakapagbulsa ang Pilipinas ng kabuuang labing isang medalya, mula sa isang ginto, 2 silver at 8 bronze medals sa 6th Senior Asian Pencak Silat Championship 2022 na idinaos sa Sher-i Kashmir Indoor Stadium sa Srinagar, India noong Biyernes.

Nanguna sina Alfau Jan Abad at Almohaidib Abad sa men's double artistic (Seni Ganda Putra) event para sa gold medal habang ang dalawang silver naman ay nasungkit nina Edmar Tacuel sa men's solo artistic (Seni Tunggal Putra), at ang women's trio artistic (Seni Regu Putri) ay naibulsa nina Jessa Dela Cruz, Ziara Mari Oquindo, at Franchette Anne Tolentino.

Dumagdag ng bronze si Jan Abad sa men's solo artistic (Seni Bebas Putra) event. "We're happy because all the artistic athletes that came here won medals," ani Inier Candor, ang Philippine Pencak Silat Association secretary general sa isang online interview.

Bronze din sa Male Tanding sina Jaciren Abad - Class C; Mark James Lacao - Class D; Ian Christopher Calo- Class E; Alvin Campos - Class E; Joash Mariño Cantoria - Class G; sa Female Tanding sina Angeline Viriña - Class A at Ziara Mari Oquindo - Class B.

Ang ilang 150 athletes mula sa Malaysia, Indonesia, Vietnam, Singapore, Kazakhstan, Nepal, Philippines, at host India ay naging bahagi sa six-day tournament.

Brownlee naturalization, minamadali; h'weight champ Wilder, may 2 pang target

ni MC - @Sports | October 18, 2022

Minamadali na umano ang proseso ng naturalization ni PBA import Justin Brownlee para agad itong mabigyan ng Filipino citizenship at makapaglaro sa Gilas Pilipinas sa susunod na taon.

Ayon sa ulat, target ng Samahang Basketbol ng Pilipinas (SBP) na maging naturalized Filipino si Brownlee upang palalasin ang Gilas Pilipinas na sasabak sa Fiba World Cup.

Ipapalit si Brownlee sa pwesto ni Filipino-American player Jordan Clarkson na meron pang commitment sa NBA team nito na Utah Jazz hanggang sa susunod na taon.

Matatandaang nag-sorry si Brownlee kay Senator Francis Tolentino, ang chaiman ng Senate Committee on Justice, na siyang namamahala sa naturalization hearings dahil sa pagkadelay ng ilang niyang dokumento na isusumite sa kongreso.

Inamin ng 34-anyos na Ginebra import na na-delay ang processing ng kanyang mga dokumento dahil sa pagpanaw ng kanyang agent.

Bukod kay Justin, pinapaspasan din ng SBP ang naturalization process sa isa pang PBA import mula sa TNT na si Cameron Oliver para maging reinforcement din ng Gilas Pilipinas basketball World Cup.

Samantala, inamin ni dating longtime heavyweight champion Deontay “The Bronze Bomber” Wilder na may dalawa siyang target na gustong makalaban matapos niyang mapatumba sa unang round si Robert “The Nordic Nightmare” Helenius sa WBC Heavyweight title Eliminator.

Ayon sa ulat, ito ang unang laban niya mula ng talunin siya ng ng tigasing si Tyson Fury sa ikatlong pagkakataon na kanilang paghaharap noong Oktubre 9, 2021.

Naging strategy umano ni Wilder ang pag-atake kapag bumabanat si Helenius.

Isiniwalat ni Wilder matapos ang laban na nais niyang makasagupa ang dalawang boksingero sa listahan niya — si Oleksandr Usyk at Andy Ruiz Jr para sa heavyweight division.

Hall of Famer NBA player Mutombo, may brain tumor

ni MC - @Sports | October 17, 2022

Sumasailalim sa serye ng gamutan ngayon si Basketball Hall of Fame inductee Dikembe Mutombo matapos ma-diagnosed na may brain tumor, ayon sa NBA.

Naglaro ang dating center ng 18 season sa NBA sa anim na koponan at nakakuha ng reputasyon bilang isa sa mga pinakamahusay na shot blocker ng liga at nagtamo ng Defensive Player of the Year award ng apat na beses sa kanyang karera.

Ginugol ni Mutombo ang pangunahing taon ng kanyang career sa Denver Nuggets, na nag-draft sa kanya noong 1991 at Atlanta Hawks – kung saan ang parehong koponan ay nagretiro sa kanyang numerong 55 jersey.

Naglaro rin siya para sa Philadelphia 76ers, New Jersey Nets, New York Knicks at Houston Rockets. “Si Dikembe Mutombo ay kasalukuyang sumasailalim sa gamutan para sa isang tumor sa utak. Siya ay tumatanggap ng pinakamahusay na pangangalaga na posible mula sa isang collaborative team ng mga espesyalista sa Atlanta at nasa nasa magandang kalagayan ngayon habang siya ay nagsisimula sa pagpapagamot,“ sabi ng NBA sa isang pahayag.

“Humihingi si Dikembe at ang kanyang pamilya ng privacy sa panahong ito para makapag-focus sila sa pangangalaga sa kanya. Nagpapasalamat sila sa inyong mga panalangin at mabuting hangarin.”

Ang 56-anyos, na may taas na 7'2" ay walong beses na All-Star at pangalawa sa lahat ng oras na listahan ng mga block sa career. Ang kanyang "iconic finger wag” matapos ang isang matagumpay na block ay ginagaya ng ilang manlalaro.