Smart Araneta Coliseum, gagawing mega vaccination site ng QC

ni Mary Gutierrez Almirañez | May 13, 2021

Magsisilbi bilang COVID-19 mega vaccination site ng Quezon City ang Smart Araneta Coliseum, kung saan kaya nitong i-accommodate ang mahigit 1,000 hanggang 1,500 indibidwal simula sa ika-15 ng Mayo, ayon kay Mayor Joy Belmonte.

Aniya, "It is a suitable site for a massive and critical government health drive since it offers adequate space and accessibility to both our healthcare workers and the public."

Tugon naman ni Araneta Group SVP Antonio Mardo, "We are very pleased to accommodate the QC LGU's vaccination campaign inside the Smart Araneta Coliseum. This is our contribution to the government's efforts to control the surge of COVID-19 cases in the city and to improve public health.”

Sa ngayon ay 2,539,693 indibidwal na ang mga nabakunahan kontra COVID-19. Tinataya namang 514,655 ang mga nakakumpleto ng dalawang turok, habang 2,025,038 ang nabakunahan ng unang dose.

'Di raw nagpaalam para sa community pantry... Angel, inilaglag ni Mayor Belmonte

ni Lolet Abania | April 24, 2021

Hindi umano inabisuhan ng aktres na si Angel Locsin ang lokal na pamahalaan ng Quezon City sa pagsasagawa nito ng community pantry na naging dahilan umano ng pagkamatay ng isang lolo.

Sa isang pahayag kay QC Mayor Joy Belmonte, binanggit nitong maaaring naiwasan ang insidente kung nagsabi lamang ang aktres tungkol sa gagawing community pantry.

Labis na ikinalungkot ng alkalde ang nangyari kasabay ng paalala nito sa lahat ng pantry organizers na dapat makipag-ugnayan sa mga lokal na opisyal para matulungan at maserbisyuhan sila nang maayos.

Gayunman, ayon kay Belmonte, patuloy pa rin ang suporta ng lungsod sa mga itinatayong community pantries subali't dapat na makiisa sa mga hakbang at may koordinasyon sa barangay at LGU ang lahat ng organizers nito para hindi na maulit pa ang insidente.

Matatandaang namatay ang isang senior citizen na si Rolando dela Cruz. Hinimatay ito habang nakapila sa community pantry ni Locsin sa Holy Spirit Drive sa Bgy. Holy Spirit, Quezon City at kalaunan ay idineklarang dead-on-arrival sa ospital.

Nagpaabot naman ng pakikiramay ang aktres sa pamilya ng 67-anyos na balut vendor. Sinabi ni Locsin na habambuhay siyang hihingi ng kapatawaran sa naiwang pamilya ni Mang Rolando. Nakahanda namang tulungan ng lokal na pamahalaan ng Quezon City ang pamilya ng biktima.

Ipinahayag ni Belmonte na sasagutin nila ang mga gagastusin sa burol habang magbibigay ng tulong-pinansiyal sa pamilya nito.

Community pantries, hihigpitan bago mamigay ng pagkain

ni Mary Gutierrez Almirañez | April 24, 2021

Nagpatupad na ng guidelines ang lokal na pamahalaan ng Quezon City hinggil sa mga dinarayong community pantries sa iba’t ibang lugar sa lungsod. Ito'y upang maiwasan ang hawahan ng COVID-19.

Ayon sa inilabas na memorandum ng lungsod, kailangang makipag-coordinate muna ang organizer sa barangay para mabigyan sila ng written notice. Nakasaad sa notice ang pangalan ng responsable sa pantry at ang magiging lokasyon nito.

Kailangan ding sumunod sa health protocols ang mga staff ng pantry, partikular na ang ‘no face mask, no service’ policy.' Mahigpit ding oobserbahan ang one-meter distance o social distancing.

Lilimitahan din mula alas-5 nang madaling-araw hanggang alas-8 nang gabi ang operasyon ng pantry. Higit sa lahat, dapat ay sariwa at malayo pa sa expiration date ang mga ihahandang pagkain.

Ang mga nabanggit na guidelines ay mula sa napagmitingan ng bawat departamento sa Kyusi kasama si Maginhawa Community Pantry Organizer Anna Patricia Non.

Paliwanag pa ni Mayor Joy Belmonte, "While reiterating the city’s full support for such endeavors that promote the spirit of 'bayanihan' to overcome difficulties due to the COVID-19 pandemic... Law enforcement shall refrain from intervening except in cases of manifest breach of health or safety protocols."

Sumang-ayon naman si Department of the Interior and Local Government (DILG) Undersecretary Martin Diño sa pagpapatupad ng koordinasyon sa pagitan ng organizer at barangay upang maiwasan ang mahabang pila, katulad ng nangyari sa inorganisang community pantry ng aktres na si Angel Locsin, kung saan isang senior citizen ang namatay.

“Dahil talagang maraming nangangailangan lalung-lalo na ‘pag nai-announce mo 'yan, meron mang stub o wala, talagang magpupuntahan at magbabaka-sakali. Kung nand'yan ang ating mga barangay tanod, tapos meron tayo sa Quezon City na Task Force Disiplina, papauwiin na natin 'yung hindi talaga mabibigyan,” giit pa ni Diño.