Hindi totoong may bumisitang asymptomatic kaya nagka-Covid outbreak – QC Orphanage

ni Jasmin Joy Evangelista | September 9, 2021

Mariing pinabulaanan ng Gentle Hands Inc., ang ahensiyang nagma-manage sa orphanage sa Quezon City kung saan napabalita ang pagpopositibo sa COVID-19 ng 99 kabataan, na may bumisitang asymptomatic sa kanilang pasilidad na siyang nagdulot ng outbreak.

"It is not true that an asymptomatic visitor spread the virus because we have not received any visitors at all, due to the fact that some of the children are immunocompromised and we have prohibited non-members of the staff from going inside the facility," ani Charity Graff, executive director ng Gentle Hands Inc. sa isang pahayag.

"While it is true that several individuals have tested positive in our facility, the source of the infection is still being traced," dagdag niya.

Sinabi ni Graff na binigyang-aksiyon na ang mga pasyenteng nakararanas ng sintomas at siniguro sa publiko na walang pasyenteng nakararanas ng respiratory distress.

Dagdag pa niya, ayaw nilang kumalat ang maling impormasyon na sa isang bisita nagmula ang hawahan ng Covid dahil na-maintain umano nila ang pagsunod sa strict health protocols “beyond the minimum” upang mapangalagaan ang kanilang mga staff at mga kabataan sa loob nito.

Sila raw ay 540 days nang naka-quarantine at walang naglalabas-masok sa pasilidad bago pa bakunahan ang kanilang mga staff noong Agosto 2021.

"In the discussion with the Quezon City Government, we were directed not to disclose the situation publicly, and we have faithfully complied with this directive. However, recent inaccurate news, made without verification with us, have left us no choice but to publicly clarify matters. We are very concerned because we are a child caring agency and we have exerted all efforts to protect the privacy of our children," ayon sa ahensiya.

Si Quezon City Mayor Joy Belmonte ang nagbalita ngayong Huwebes ng umaga na kabilang sa 122 na mga nagpositibo sa COVID-19 ang 99 kabataan sa Great Hands.

Sa press release din ng QC government nagmula ang pahayag ni Dr. Rolando Cruz, City Epidemiology and Surveillance Unit (CESU) chief, na isang asymptomatic umanong bisita ng pasilidad ang pinagmulan ng Covid outbreak.

Dumalo sa event ni QC Councilor Pumaren 86 nagpositibo sa COVID-19

ni Lolet Abania | June 8, 2021

Nasa 86 residente ang nagpositibo sa COVID-19 matapos magtungo sa isang programa ng pamamahagi ng pagkain sa Quezon City ilang linggo na ang nakakaraan, ayon kay Mayor Joy Belmonte.

Sa Laging Handa public briefing, sinabi ni Belmonte na 953 mula sa 6,000 na pumunta para sa food distribution program ni QC Councilor Franz Pumaren sa Barangay Old Balara ay sumailalim sa test kung saan 86 ang positibo sa virus.

“We have so far already identified 86 positive cases out of 953 that were tested doon sa event na ‘yan,” ani Belmonte.

Ayon pa sa alkalde, tinatayang limang lugar sa nasabing barangay ang isinailalim na sa lockdown nang dalawang linggo.

Ang mga residente roon ay ite-test sa COVID-19 habang makatatanggap ng assistance mula sa lokal na pamahalaan.

Sinabi rin ni Belmonte na nasa 200 ang average number ng COVID-19 cases araw-araw sa Quezon City at nasa 4,000 naman ang kanilang itine-test kada araw, habang 3,500 contact tracers ang kanilang ipinakalat para i-track ang mga nakasalamuha ng mga nagpositibo.

Nilinaw naman ng Quezon City Police District na wala umanong nilabag na health safety protocols si Pumaren matapos na 6,000 residente ng Barangay Old Balara ang dumagsa sa community pantry program na kanyang inorganisa.

Ayon sa pulisya, nakipag-coordinate si Pumaren sa mga concerned government agencies gaya ng Quezon City Police District, Batasan Police Station 6, at ang opisina sa Old Balara upang masigurong masusunod ang mga protocols.

3 days nag-party, 54 nagpositibo sa COVID-19 sa QC

ni Mary Gutierrez Almirañez | May 24, 2021

Limampu’t apat ang nagpositibo sa COVID-19 matapos dumalo sa 3-day improvised pool party at inuman session na ginanap sa covered court ng Barangay Nagkaisang Nayon, Quezon City, ayon kay Mayor Joy Belmonte.

Batay sa panayam sa alkalde ngayong umaga, naging super spreader ng virus ang naganap na event, kung saan 610 indibidwal ang dumalo.

Aniya, “Nagkaroon ng improvised pool party. Merong diskuhan, may sayawan, may inuman, may videoke. Kumpleto po at walang nagsusuot ng mask."

Ayon pa sa ulat, kaagad na pinuntahan ng contact tracer ang nasabing lugar upang mag-conduct ng contact tracing at interview sa naging close contacts ng isa na unang nagpositibo sa COVID-19. Doon lamang nila nalaman ang nangyaring 3-day event.

Sabi pa ni Belmonte, "Sa pagko-conduct nila ng interviews sa taumbayan, saka pa lang nila nalaman na nagkaroon pala ng 3-day fiesta celebration from May 9 to May 11.”

Sa ngayon ay mayroon pang 18 results ng RT-PCR swab test ang hinihintay na lumabas upang makumpirma ng City Epidemiology and Disease Surveillance Unit (CESU) ang kabuuang bilang ng mga nagpositibo.

Samantala, dinala naman sa HOPE facilities ang mga nagpositibo upang doon mag-quarantine at maobserbahan ang kondisyon.

Nilinaw pa ni Belmonte na pananagutin pa rin nila ang 54 na nagpositibo, kahit sila ay tinamaan ng virus. Pinadalhan na rin nila ng show cause order ang punong barangay, kung saan mismong fire truck pa ng barangay hall ang naglagay ng tubig sa improvised pool na ipinuwesto sa covered court.

“Lahat ng mga mapapatunayang lumabag sa ating guidelines at mga ordinansa lalo na ‘yung mga nagkukumpulan at nag-iinuman o nagka-karaoke ay iisyuhan ng ordinance violation receipt (OVR) at maaaring makasuhan sa ilalim ng RA 11332,” giit pa ni Belmonte.

Matatandaan namang kasalukuyan pa ring nasa ilalim ng heightened general community quarantine (GCQ) ang buong NCR Plus, kabilang ang Quezon City, kung saan limitado lamang sa 30% capacity ang outdoor activities.