Simbahan at iskul sa QC, oks gamitin para sa COVID vaccination

ni Lolet Abania | January 28, 2021

Inaprubahan na ng Department of Health (DOH) ang 24 vaccination sites sa Quezon City, ayon kay Mayor Joy Belmonte.

"As of today's presentation, we have secured 24 sites so all of these sites, I just want to emphasize, kailangan kasi ng DOH approval kasi may flow 'yun, eh. Marami kaming ipine-present sa DOH na iba't ibang mga sites and then the DOH tells us which is appropriate and not appropriate," sabi ni Belmonte sa press briefing ngayong Huwebes.

"So at the moment, ito 'yung mga inaprubahan ng DOH and these are the ones with sure staff and personnel available," dagdag ng alkalde.

Bukas pa rin ang lokal na pamahalaan na magdagdag ng mga inoculation center para sa vaccination program ng lungsod.

Ayon kay Belmonte, ang mga simbahan at academic institutions gaya ng Ateneo De Manila University at Sienna College ay nag-alok ng kanilang pasilidad para gamitin bilang vaccination centers.

Ang Quezon City ay isa sa mga local government units na pumirma sa tripartite agreement sa AstraZeneca at sa national government patungkol sa pagkuha ng COVID-19 vaccines.

Sinabi rin ni Belmonte na ang pagbabakuna sa mga empleyado na nag-oopisina sa Quezon City ay kinokonsidera nilang isama.

Pinayuhan naman si Belmonte ng vaccine czar na si Secretary Carlito Galvez, Jr. na makipag-ugnayan ang lungsod sa mga private sectors para sa pagkuha ng mas maraming COVID-19 vaccines na ibibigay sa mga empleyado.

"This has been considered very seriously and as soon as we get the proper guidance as to how to go about with this, definitely Quezon City is very open to doing this," sabi ni Belmonte.

Mga nakasabay ng Pinoy na nagpositibo sa new COVID-19 variant, na-trace na

ni Ronalyn Seminiano Reonico | January 16, 2021

Na-trace na at kasalukuyang nasa isolation ang mga pasaherong nakasabay ng residente ng Quezon City na idineklarang unang kaso ng bagong variant ng COVID-19 sa Pilipinas, ayon kay Mayor Joy Belmonte.

Noong Miyerkules, inanunsiyo ng Department of Health (DOH) at Philippine Genome Center na ang unang kaso sa bansa ng bagong variant ng COVID-19 na mula sa UK ay isang Pinoy na nanggaling sa United Arab Emirates noong January 7.

Ayon sa DOH, ang pasyente ay isang lalaking residente ng Quezon City na pumunta sa Dubai noong December 27 para sa business purposes.

Pahayag naman ni Belmonte, “Based on the DOH information, they have already contact-traced majority of passengers in this flight (Emirates Flight No. EK 332).

“Walo sa mga pasahero ay taga-Quezon City. Sa walo, pito ang na-contact traced — first and second generation contact tracing. Isa ang nawawala [kasi], mali ang contact info n’ya... lahat ay na-swab na at isolated na. Hinihintay lumabas ang mga resulta.”

Nilinaw din ni Belmonte na hindi kailangang isailalim sa lockdown ang Barangay Kamuning kung saan naninirahan ang naturang pasyente dahil kaagad naman itong nadala sa quarantine hotel at isolation facility nang dumating sa bansa.

Aniya pa, “We have already contact traced 143 individuals. These are comprised of close contacts na kasama ang malapit sa pasyente at second generation contacts — ito naman ang kasama ng close contacts.

“Doon sa first generation contacts, kasama ang mga pasahero na taga-QC na kasama niya, health workers, staff na nag-alalay at tumulong sa pasyente na pumuntang hotel hanggang isolation facility.

“More than half of them have already been swabbed, and all of them are already on quarantine. Wala pa pong results.”

Samantala, isinailalim na rin umano sa COVID-19 testing ang mga miyembro ng pamilya ng naturang pasyente bilang “precautionary measure” kahit na walang naganap na physical contact, ayon kay Mayor Belmonte.

550k taga-kyusi, unang tuturukan ng COVID vaccine

ni Lolet Abania | January 12, 2021

Isinasagawa na ng lokal na pamahalaan ng Quezon City ang renovation ng mga vaccination centers sa lungsod bilang bahagi ng inoculation program para sa COVID-19.

Ayon kay Mayor Joy Belmonte sa isang panayam ngayong Martes, "We have already identified 24 here in Quezon City with the help of the third party. We are now in the process of renovating these centers and we have also identified a cold storage facility for the vaccinations."

May kabuuang 1.1 milyong AstraZeneca vaccines ang tiyak na makukuha ng city government para sa mga residente ng lungsod.

Ayon pa kay Belmonte, inaasahang mabebenepisyuhan ng nasabing vaccine ang tinatayang 550,000 residente.

Aminado naman si Belmonte na mayroong takot at pagdududa mula sa mga residente tungkol sa COVID-19 vaccines. Kinakailangan lang daw na ipaliwanag sa kanila nang husto ang pagiging epektibo ng bakuna laban sa sakit.

"They're undecided based on fear. If you can just reassure them on the safety and efficacy of the vaccines, I think it will change their minds," ani Belmonte.

Isa ang Quezon City sa lokal na pamahalaan ng Metro Manila na nakasama sa tripartite agreement ng national government at AstraZeneca upang makakuha ng vaccines na gagamitin para sa kanilang nasasakupan.