2M doses pa ng Sinovac, dumating na sa ‘Pinas

ni Ronalyn Seminiano Reonico | June 24, 2021

Dumating na sa Pilipinas ang karagdagang 2 million doses ng Sinovac COVID-19 vaccine ngayong Huwebes nang umaga.

Ayon sa ulat, 400,000 doses nito ay binili ng lokal na pamahalaan ng Maynila habang ang iba pa ay binili ng national government.

Lumapag sa Ninoy Aquino International Airport Terminal 2 ang Cebu Pacific flight na may lulan ng naturang bakuna kaninang alas-7:26 nang umaga.

Sina Health Secretary Francisco Duque III, Vaccine Czar Carlito Galvez Jr., at Manila Mayor Isko Moreno ang sumalubong sa pagdating ng Sinovac COVID-19 vaccines.

Samantala, ayon sa datos ng Department of Health (DOH), mahigit 8 million COVID-19 vaccine doses ang naipamahagi na at 2.6 million Pinoy na ang nakakumpleto ng bakuna.

Pila ng SAP sa Maynila at QC, inabot nang hatinggabi

ni Mary Gutierrez Almirañez | April 7, 2021

Inabot nang hatinggabi ang pamimigay ng ayuda sa mga benepisyaryo ng Social Amelioration Program (SAP) sa Maynila at Quezon City nitong Miyerkules, Abril 8.

Batay sa ulat, tig-30 na benepisyaryo lamang ang pinapayagang pumunta sa covered court ng Maynila upang tumanggap ng ayuda, habang ang iba nama’y sa kani-kanyang bahay naghihintay na matawag ang pangalan. Kumbaga, binigyan na sila ng numero at iniaanunsiyo lang sa public address system ang mga pupunta sa covered court. Kani-kanyang bitbit din sila ng ballpen at papel na nakapangalan sa kanila.

Ngayong Huwebes ay mahigit 60,000 na benepisyaryo pa ang target mabigyan ng ayuda sa lungsod.

Kaugnay nito, daan-daang SAP beneficiaries naman ng Barangay Batasan Hills, Quezon City ang matiyagang pumila sa Batasan National High School para makuha ang kanilang ayuda.

Ayon pa sa tauhan ng Department of Social Welfare and Development (DSWD), nag-umpisa ang verification process sa mga tatanggap ng ayuda bandang alas-11 nang umaga kahapon, subalit pasado alas-4 nang hapon na nag-umpisa ang mismong payout dahil kinailangan pa umano nilang iimprenta ang payroll ng mga beneficiaries kaya inabot nang hatinggabi ang pila.

Sa ngayon ay kabilang na rin ang mga empleyado ng city hall na namimigay ng ayuda sa prayoridad mabakunahan kontra COVID-19 dahil tumaas ang exposure nila sa virus.

Samantala, inaprubahan na ng Department of Health (DOH) at Food and Drug Administration (FDA) ang pagtuturok sa mga senior citizens gamit ang bakunang Sinovac, kaya magtutuluy-tuloy na ang vaccination rollout.

Barangay official, positive sa COVID-19, 6 barangay, ini-lockdown

ni Mary Gutierrez Almirañez | March 17, 2021

Simula na ang 4-day lockdown sa anim na barangay sa Maynila ngayong Miyerkules nang hatinggabi hanggang Sabado dahil sa pagtaas ng COVID-19, ayon kay Chairman Santiago Calizo.

Batay sa ulat, kabilang sa mga naka-lockdown ang Barangay 185 sa Tondo, Barangay 374 sa Sta. Cruz, Barangay 521 sa Sampaloc, Barangay 628 sa Sta. Mesa, Barangay 675 sa Paco at Barangay 847 sa Pandacan, matapos pare-parehas makapagtala ng mahigit 10 aktibong kaso ng COVID-19 ang bawat barangay.

Aniya, mayroong 13 na quarantine facilities ang lungsod at nasa 80% na ang occupancy rate ng anim na pasilidad, habang ang 3 nito ay hindi ipinapagamit dahil kinukumpuni pa.

Inaasahang isasailalim sa swab test ang iba pang kasama ng mga nagpositibo sa compound, maging ang mga kawani ng barangay kung saan isang barangay official ang positibo rin sa virus.