Road closures at alternatibong ruta sa Maynila para sa inagurasyon ni Marcos

ni Lolet Abania | June 27, 2022

Sinimulan na ng mga awtoridad ang pagpapatupad ng road closures nitong Linggo ng gabi bilang bahagi ng security measures para sa June 30 inauguration ni President-elect Ferdinand “Bongbong” Marcos Jr.

Sa ulat ngayong Lunes, alas-11:00 ng Linggo ng gabi, Hunyo 26, inumpisahan nang isara ang mga sumusunod na kalsada sa paligid ng National Museum sa Maynila sa mga motorista:

• Padre Burgos Avenue

• Finance Road

• Maria Orosa St. mula TM Kalaw hanggang Padre Burgos General Luna St., mula Padre Burgos-Muralla St.

Sarado ang mga nabanggit na kalsada sa trapiko hanggang alas-11:00 ng gabi ng Hunyo 30, ang nakatakdang araw ng panunumpa ni Marcos bilang ika-17 pangulo ng Pilipinas sa National Museum.

Ang mga sumusunod na kalsada sa Maynila na isasara mula alas-4:00 ng madaling-araw hanggang alas-11:00 ng gabi sa Hunyo 30:

• Ayala Boulevard

• Victoria Street mula Taft Avenue hanggang Muralla Street

Ayon sa Metropolitan Manila Development Authority (MMDA), ang mga apektadong motorista ay maaaring dumaan sa mga sumusunod na ruta:

Mula Roxas Boulevard northbound:

• Turn right sa UN Avenue o TM Kalaw Avenue

• Turn left sa Taft Avenue

Mula Roxas Boulevard eastbound:

• Left sa TM Kalaw o UN Avenue

• Right sa Taft Avenue

Ang mga sumusunod na kalsada naman na malapit sa Malacañang at sa Philippine International Convention Center (PICC) sa Pasay City ay isasara rin sa mga motorista sa sumusunod na mga petsa:

• Mendiola Street: Hunyo 29, 12:01AM, hanggang Hunyo 30, 11PM

• Jalandoni St., PICC, Pasay City: Hunyo 30, 4AM-11PM

• Legarda Street mula San Rafael hanggang Figueras St., Manila: Hunyo 30, 1-11PM

Ayon sa MMDA, magde-deploy sila ng 2,000 personnel upang magmando sa trapiko sa Hunyo 30.

Bukod sa mga MMDA traffic enforcers, ang mga personnel mula sa Manila Police District (MPD), National Capital Region Police Office (NCRPO), City Government ng Manila, at ang Presidential Security Group (PSG) ay itatalaga rin sa parehong araw upang tiyakin ang security, peace, and order sa nasabing okasyon.

Samantala, ang National Museum ay sarado sa publiko hanggang Hulyo 5.

Ayon naman sa NCRPO, ipinagbabawal ang pagpapalipad ng drones mula sa loob ng one-kilometer radius ng National Museum.

Ika-161 anibersaryo ng kapanganakan ni Dr. Jose Rizal, ginunita

ni Lolet Abania | June 19, 2022

Ginunita ng lokal na pamahalaan ng Lungsod ng Maynila ang ika-161 anibersaryo ng kapanganakan ni Dr. Jose Rizal sa pagsasagawa ng wreath-laying ceremony sa kanyang bantayog sa Rizal Park, ngayong Linggo, Hunyo 19.

Ang okasyon ay pinangunahan ni Vice Mayor Honey Lacuna, kasama ang iba’t ibang personalidad, organisasyon, at mga kaanak ni Rizal na naghandog ng mga bulaklak sa pambansang bayani.

“Bilang mga Pilipino, karapatan natin na alalahanin at pahalagahan ang pagbuwis ng dugo at buhay ng ating mga bayani sa pangunguna ni Dr. Jose Rizal,” pahayag ni Expedito Laurente Gonzales ng Crusaders for the Upliftment of our Faith.

“It’s important for us to cherish not only the memory but also the legacy he has built for us as we can see today,” saad ni Teodoro Kalaw IV ng Grand Lodge of Free and Accepted Masons of the Philippines.

Marami ring naroon sa Rizal Park ang sandaling napahinto sa paglalakad at pamamasyal habang nag-oobserba sila sa ginanap na selebrasyon.

60-anyos na lalaki patay sa sunog sa Maynila

ni Lolet Abania | June 1, 2022

Isang senior citizen ang nasawi matapos sumiklab ang sunog sa isang residential area sa Sta. Mesa, Manila ngayong Miyerkules ng madaling-araw.

Ayon sa Bureau of Fire Protection (BFP), alas-4:30 ng madaling-araw nagsimula ang sunog sa kahabaan ng V. Mapa Street, kung saan namatay ang 60-anyos na lalaki.

Nagising na lang ang mga residente nang kalampagin ng isang kapitbahay ang kanilang mga pinto para ipaalam sa mga itong nasusunog na ang kanilang mga bahay.

Marami sa kanila ang hindi na nailigtas ang ilang kasangkapan dahil kumalat na ang apoy sa mga kabahayan. Alas-5:53 ng madaling-araw, idineklara naman itong fire out ng BFP. Patuloy pang iniimbestigahan ng mga awtoridad ang dahilan at sanhi ng sunog.

Sa pagtaya ng BFP, aabot sa P500,000 ang halaga ng pinsala sa mga ari-arian ang naturang sunog.