24-anyos na tulak, huli sa akto... Vape na may droga, for sale sa mga bagets

ni Mervin Reyes @News | September 5, 2026

Photo: MPD

Arestado ang isang 24-anyos na lalaki matapos mahulihan ng marijuana oil at kush na nagkakahalaga ng halos P500,000 sa buy-bust operation sa Tondo, Maynila, madaling-araw nitong Huwebes, Setyembre 3.

Isinagawa ang operasyon matapos makatanggap ng impormasyon ang mga awtoridad mula sa isang informant kaugnay ng umano’y ilegal na gawain ng suspek.

Nakuha sa kanya ang 120 assorted rechargeable vape cartridges na naglalaman ng humigit-kumulang 1.2 litro ng marijuana oil, gayundin ang mga pakete ng kush na may kabuuang bigat na nasa 120 gramo.

“Mayroon tayong pinag-aralan ito ng ating intelligence,” pahayag ni Police Major Manuel Calleja, chief Admin at duty Officer of the Day ng Abad Santos Police Station.

“‘Yun nga, at nu’ng nag-positive na nga, akala namin na simpleng drugs lang na... ‘Yung vape na ang gamit ay oil ng marijuana. Hindi namin akalain na almost na… kulang-kulang half a million ang halaga,” dagdag niya.

Ayon sa pulisya, target umano ng suspek na ibenta ang mga ilegal na droga sa mga edad 16 hanggang 20 bilang “party drugs.”

“Puwede nating payuhan ‘yung mga magulang na pakibantayan ‘yung mga anak nila. Baka akala nila or ordinaryong vape lang pero marijuana na pala,” ani Calleja.

Kasalukuyang nakakulong ang suspek sa custodial facility ng Abad Santos Police Station at nakatakdang isailalim sa inquest proceedings.

P12 M marijuana, kumpiskado sa Isabela

ni Eli San Miguel - Trainee @News | November 29, 2023

Nakumpiska ng pulisya ang 100 kilo ng hinihinalang marijuana na nagkakahalaga ng P12 milyon mula sa apat na drug pusher sa isinagawang buy-bust operation sa Purok 1, Brgy. Abut, Quezon, Isabela ngayong Martes.

Arestado ang mga suspek na mula sa Kalinga matapos silang magbenta ng marijuana sa isang pulis na nagkukunwaring buyer.

Nakuha sa kanila ang anim na kahon na may 66 na tumpok ng marijuana, isang caliber 9mm, isang magasin, mga bala, at ang boodle money.

Nasa pangangalaga na ng Philippine Drug Enforcement Group (PDEG)-Special Operations Unit-2 (SOU-2) ang mga suspek.

Dinala naman ang kontrabando sa Philippine National Police-Crime Laboratory sa Roxas, Isabela para sa wastong pagsusuri.

DOH Chief, pabor sa medical marijuana

ni BRT @News | August 8, 2023

Nagpahayag ng pag-apruba si Department of Health Secretary Teodoro 'Ted' Herbosa para sa legalisasyon ng medikal na paggamit ng marijuana ngunit hindi para sa pagtatanim at pagmamanupaktura nito sa bansa.

Kung ang medical cannabis ay magiging legal, maaari itong magamit ng mga pasyente na dumaranas ng cancer, glaucoma, seizure disorders, at iba pang mga sakit.

Inulit din ni Herbosa na ang medical marijuana ay magagamit na, ngunit para lamang sa mga pasyente na nabigyan ng “special permit” ng Food and Drug Administration.

Samantala, ayon kay Herbosa hindi pa niya makukumpirma kung dito ima-manufacture sa bansa ang gamot kasi maeengganyo ang mga mamamayan sa pagtatanim nito.

Aniya, mas mainam kung iangkat nalang ang medical cannabis sa ibang bansa.