Pagtugon sa malinis na hangin target ng TPSK Air Run 2026

ni Anthony Servinio @Sports | August 18, 2026

Photo: Ang masayang paglulunsad ng TPSK Air Run na magiging makulay ang event sa Setyembre 20, 2026 sa Quirino Grandstand kung saan opisyal na media partner ang BULGAR. (GFpix)

Aabangan ang pinakamakulay na fun run ng taon sa ika-apat na yugto seryeng Takbo Para Sa Kalikasan 2026 - Air Run - ngayong Setyembre 20 sa Quirino Grandstand.

Muling magtitipon ang komunidad ng mananakbo sa pagpapakita ng kanilang pagmamahal sa Inang Kalikasan lalo na ang laban para sa malinis na hangin. Tampok ngayon ang 21.1 kilometro o Half-Marathon. May mga karera pa rin sa 10 at limang kilometro.

Sa nais maghain ng panibagong hamon na maiba sa mga nakaraang taon, ang Air Run ay isa nang Color Run kung saan magsasaboy ng mga makulay na pulbos sa buong ruta.

Walang dapat isipin at ang mga pulbos ay ligtas at maaaring kainin. Bilang dagdag, maliban sa kinagawiang medalya na gawa sa kahoy at t-shirt ay tatanggap din ang lahat ng espesyal na medyas at sunglass.

Kasalukuyang ginaganap ang pagpapalista online at sa mga piling sangay ng Chris Sports. Sinasabayan ang salita ng kongkretong gawa ng tagapangasiwa ng patakbo na Green Media Events na sina Mr and Mrs. Jenny at Ernie Lumba.

Makikita ng mga tumakbo ang mga proyektong pinondohan ng kanilang pagsali. Matapos ang Air Run ay tutuldukan ang taon ng Earth Run sa Nobyembre 15 sa parehong lugar. Ang BULGAR ang opisyal na media partner ng TPSK 2026.

Women's Run PH Series sa tatlong lungsod

ni Anthony Servinio @Sports | July 31, 2026

Photo: Ipinaliliwanag ni race organizer Nicole dela Cruz ang hinggil sa muling pagbubukas ng pampublikong rehistrasyon ng Women's Run PH sa Oktubre 25 sa Ayala Triangle Gardens sa Makati City na may temang "Mas Malaki. Mas Matapang. Mas Malakas." Ito ay para sa pambansang Kamalayan sa Buwan ng Kalusugan ng Kababaihan na pinalawak na rin hanggang sa Iloilo at Davao. (A. Servinio)

Magbabalik ang nangungunang patakbo na inorganisa ng mga kababaihan para sa kababaihan na mas pinalaki ngayong taon. Lalarga ang Lactacyd Women's Run PH Series sa tatlong lungsod para maipamalas ang lakas at husay ng Pinay.

Magsisimula ang serye sa Ayala Triangle, Makati ngayong Oktubre 25. Susundan ito ng mga karera sa Davao sa Enero 17 at Iloilo sa Hulyo 18 sa susunod na taon.

Sa Makati ay maaaring lumahok sa 10, lima at isang kilometro. May karagdagang 16 kilometro sa Davao at Iloilo.

Inaasahan na mahigit 12,000 ang lalahok sa Makati pa lang. Kasalukuyang ginaganap ang pagpapalista online sa Race Roster.

Tatanggap ang mga kalahok ng singlet, numero at maaaring kumuha ng karagdagang t-shirt. Oras na makumpleto ang karera ay gagawaran ng medalya na maaaring ikabit sa ibang medalya ng serye, t-shirt at bag na may mga regalo buhat sa sponsor.

Ang mga damit at medalya ay dumaan sa mabusising proseso ng paglikha. Ito ay para matiyak na pareho itong makakatulong sa maaliwalas na pagtakbo kasabay ng pagiging kaakit-akit sa mata.

Mula nang itatag ay naging ligtas na espasyo ang Women's Run. Nasaksihan ang kababaihan na tinutulungan at magsisilbing inspirasyon sa kanilang kapwa kababaihan. 

Fernandez at Lantad mga hari at reyna ng TPSK Water Run

ni Anthony Servinio @Sports | July 30, 2026

Photo: NAGKAMPEON sa 18km run ng TPSK Water Run sina Jay Fernandez at Melody Lantad. (vyrfbpix)

Umani ng pangalawang kampeonato si Jay Fernandez sa Water Run, ang ikalawang yugto ng seryeng Takbo Para Sa Kalikasan 2026 sa Quirino Grandstand noong Linggo. Kasunod ito ng kanyang tagumpay sa Fire Run noong Mayo.

Umoras si Fernandez ng 1:07:21 sa tampok na karerang 18 kilometro at sinundan nina Lubren Banzon Jr. (1:09:22) at Jaspher Delfino (1:14:10). Wagi rin si Fernandez sa Fire Run na 16 kilometro.

Sa panig ng kababaihan, pinakamabilis si Melody Lantad sa 1:35:37 at dinaig sina Kimberly Borja (1:36:30) at Sophia Vasquez (1:38:10). Pangalawa si Lantad sa 16 kilometro ng Fire Run.

Itinanghal na mga kampeon sa 10 kilometro sina Neil Maramba (37:57) at Elena Camu (50:07). May karera rin sa limang kilometro at lahat ng kategorya ay hindi nakatakas sa matinding basaan ng tubig at bula sa buong ruta sa Roxas Boulevard at CCP Complex.

Ang susunod na patakbo ng TPSK ay ang Air Run sa Setyembre 20. Tutuldukan ang taon ng Earth Run sa Nobyembre 15. Ang BULGAR ay opisyal na media partner ng serye. Naghatid ng saya at regalo sa mga tumakbo.

.