Arbois tinapos ang paghahari ni Flores sa Manila Marathon

ni Anthony E. Servinio @Sports | June 14, 2026

Photo: Kampeon ng 2026 Galaxy Manila Marathon 42km run si Arlan Arbois Jr. (2:13.15) at Elias Taiswa. (A. Servinio)

Bagong ruta, bagong kampeon sa Galaxy Manila Marathon 2026 kahapon sa MOA. Winakasan ni Arlan Arbois Jr. ang dalawang taong paghahari ni Eduard Flores sa 42.195 kilometrong karera na tampok sa unang pagkakataon ang kahabaan ng EDSA.

Malupit ang bantayan ng dalawa subalit tuluyang iniwan ni Arbois si Flores sa Ayala Underpass pabalik ng MOA galing sa u-turn sa SM North Annex. Gusto sana ni Arbois na magtala ng bagong personal na marka pero hindi niya itinuloy bunga ng sobrang init at mahalumigmig na panahon.

Umoras si Arbois ng 2:31:15 na 25 segundo lang ang agwat sa 2:31:40 ni Flores na kampeon noong 2024 at 2025. Pangatlo si Edsel Moral sa 2:34:51.

Kampeon sa kababaihan si Jewel de Luna sa 3:22:07. Pangalawa ang beteranang si Jocelyn Elijeran na 3:29:29 at pangatlo si May Angelie Mag-aso sa 3:37:08.

Tanging si Elias Taiswa ng Kenya ang ginawaran sa Men's International dahil siya lang ang umabot sa takdang oras na 2:45:00 na 2:34:18. Dalawa ang pumasa sa 3:15:00 ng kababaihan na pangkalahatang pinakamabilis ang balikbayan na si Eloisa Cusi ng Estados Unidos na 3:13:03 at Lily Jeruto ng Kenya sa 3:14:40.

Mga pambansang atleta na sina kampeon Sonny Wagdos at Artjoy Torregosa at pangalawa si Richard Salano ang bumida sa 21.1 kilometro Half-Marathon. Galing pa sila ng New Clark at bumalik agad doon para sa ICTSI National Open.  

Kabuuang 25,000 ang lumahok sa Marathon, Half-Marathon, 10 at limang kilometro. Matagumpay din ang ginawa ng MMDA at mga dinaanang lungsod upang maayos ang daloy ng trapiko sa pagsara ng bahagi ng EDSA ng walong oras hanggang 8:00 AM.

Bula, water gun at Dyesebel sa masayang TPSK Water Run

ni Anthony E. Servinio @Sports | June 8, 2026

Photo: Ang masayang media launch ng Takbo Para sa Kalikasan Water Run sa SM Manila na pinangungunahan ng organizers na sina Ernie at Jenny Lumba ng Green Media Events na idaraos sa Hulyo 26 sa Quirino Grandstand, Manila. (Bulgarsportspix)

Bubulaga ng maraming bula sa kakaibang Takbo Para Sa Kalikasan 2026 Water Run ngayong Hulyo 26 sa Quirino Grandstand. Ito ang pangalawa sa apat na karera ngayong taon na tunay na nagsusulong sa pag-alaga sa Inang Kalikasan hatid ng Green Media Events.

Ang tampok na kategorya ay 18, 10 at limang kilometro. Dahil Water Run ang pamagat, masusubukan ang kakayahan ng mga kalahok at pupunuin ang kalsada ng bula, may kani-kanyang water gun ang mga kalahok at makikita si dyesebel sa isang aquarium.  

Tulad ng mga obstacle sa unang yugto na Fire Run noong Mayo, hindi obligado na sumugod sa bula at papayagan na iwasan ito lalo na yung mga puntiryang magkamit ng kampeonato. Sisiguraduhin na ligtas ang paraan ng paglatag nito.

Matapos ang karera, maliban sa kinagawiang t-shirt, medalya at regalo galing sa sponsor, tatanggap ang lahat ng malaking tuwalya. Eksakto ito para mapunasan ang nabasang mga runners.

Bilang dagdag sa kasiyahan, hinihimok ang mga may gusto na magdamit na may temang tungkol sa pag-alaga ng katubigan at yaman-dagat. Sa nakalipas na mga taon, ang mga nalikom na pondo sa Water Run ay napunta sa mga proyekto na alagaan at paramihin ang mga pawikan kasabay ang pagtanim ng puno upang maiwasan ang pagbaha at pagguho ng lupa.

Ginaganap na ang pagpapalista online at sa mga piling sangay ng Chris Sports. Maaari ring lumahok sa virtual race para sa mga hindi makakapunta sa araw ng karera kung saan matatamasa rin ang parehong mga gantimpala.

Ang iba pang yugto ay ang Air Run sa Setyembre 20 at Earth Run sa Nobyembre 15. Ang BULGAR ay nagbabalik bilang opisyal na media partner ng buong serye.

Fernandez at Paraase champ sa TPSK Fire Run 2026 16 KM

ni Anthony E. Servinio @Sports | May 25, 2026

Photo: Hawak ang tropeo nina (kaliwa) 2nd place Carter Artiola, Champion (gitna) Asia Paraase at 3rd place Melody Lantad sa 16KM Female Division ng Takbo Para sa Kalikasan Fire Run sa Quirino Grandstand kahapon. (Gen Villota)

Hinirang bilang kampeon sina Jay Fernandez at Asia Paraase sa matagumpay na pagtatapos ng Fire Run, ang una sa apat na yugto ng Takbo Para Sa Kalikasan 2026, kahapon sa Quirino Grandstand. Muling nagpakita ng pinag-isang suporta ang komunidad sa pangunahing fun run na sumusulong sa pag-alaga ng Inang Kalikasan hatid ng Green Media Events.

Umoras sa Fernandez sa tampok na karerang 16 kilometro o 10 milya ng 1:03:36 upang iwanan si Jaspher Delfino sa 1:04:11. Malayong pangatlo si John Gabriel Uy na 1:08:44.

Wagi sa kababaihan si Paraase sa 1:11:26. Matapos maging madalas na kampeon sa nakaraang mga taon ng TPSK, pangalawa lang ngayon si Melody Lantad sa 1:17:35.

Hawak ang tropeo nina (kaliwa) 2nd place Jasper Delfino, Champion Jay Fernandez (gitna) at 3rd place John Gabriel Uy sa 16km Male Division ng Takbo Para sa Kalikasan Fire Run sa Quirino Grandstand kahapon. (Gen Villota)

Makapigil-hininga ang katapusan ng 10 kilometro at tatlong segundo lang ang naghiwalay sa kampeon na si Joepher Delfino (40:33) sa karibal na si Jave Flores (40:33). Pumangatlo si Sean Ken Garcia sa 41:51.

Umani ng parangal sa kababaihan si Carizza Joy Sotalbo (50:22). Sinamahan siya nina Alexandra Lee (54:46) at Issabela Castaneda (56:52).

Pinakamabilis sa limang kilometro sina King Agas, Renz Mirasol at Jayson Conde. Sina Elena Camu, Jhazelyn Lapuz at Kim Avid ang sa Women's. Bahagi ng nalikom na pondo ay mapupunta sa Million Trees Foundation. Ang susunod na yugto ay ang Water Run sa Hulyo 26.

Ang BULGAR ay opisyal na media partner sa serye. Ilang mga mapapalad na tumakbo ay tumanggap ng regalo.