Ilang lugar sa Manila at QC, balik-lockdown

ni Ronalyn Seminiano Reonico | March 9, 2021

Isinailalim sa localized lockdown ang ilang lugar sa Manila at Quezon City dahil sa patuloy na paglala ng kaso ng COVID-19.

Nilagdaan ni Manila Mayor Isko Moreno ang executive order kung saan nakasaad na isasailalim sa strict lockdown ang 2 barangay at 2 establisimyento simula sa March 11, alas-12:01 AM hanggang March 14, alas-11:59 PM.

Ayon kay Moreno, ang mga sumusunod na lugar ang ila-lockdown:

• Barangay 725 na mayroong 14 active cases;

• Barangay 351 San Lazaro, Tayuman, na mayroong 12 cases;

• Barangay 699, Malate Bayview Hotel Mansion; at

• Barangay 699, Hop Inn Hotel

Mahigpit na ipagbabawal ang paglabas ng mga residente sa mga naturang barangay.

Samantala, exempted sa naturang lockdown ang mga health workers, police at military personnel; government employees; service workers (pharmacies, drug stores, at death care service establishments), barangay officials; at media practitioners na accredited ng Presidential Communications Operations Office and the Inter-Agency Task Force.

Ayon din kay Moreno, nakapagtala ang Manila Health Department ng 154 new active cases at ang total number ng mga aktibong kaso ay 988.

Samantala, sa Quezon City, ayon sa lokal na pamahalaan, 12 na lugar sa 11 barangays ang isinailalim sa special concern lockdown sa loob ng 14 araw at ang mga ito ay ang mga sumusunod:

• Ilang lugar sa Durian Street, Barangay Pasong Tamo simula noong February 25;

• L. Pascual Street, Barangay Baesa simula noong February 26;

• De Los Santos Compound, Heavenly Drive, Barangay San Agustin simula noong March 1;

• No. 46 K-9th Street, Barangay West Kamias expanded to No. 46-50, K-9th Street, Barangay West Kamias simula noong March 3 at 8;

• 49 & 51 E Rodriguez Sr. Ave., Barangay Doña Josefa simula noong March 4;

• Paul Street at Thaddeus Street, Jordan Park Homes Subdivision, Doña Carmen, Barangay Commonwealth simula noong March 4;

• No. 237 Apo Street, Barangay Maharlika simula noong March 4;

• No. 64 14th Avenue, Barangay Socorro simula noong March 6;

• No. 64-B Agno Extension, Barangay Tatalon simula noong March 7;

• No. 90 Gonzales Compound, Barangay Balon Bato simula noong March 8;

• No. 2A – 4 K-6th, Barangay West Kamias simula noong March 8; at

• Portion of Sitio 5, Jose Abad Santos, Barangay Sta. Lucia simula ngayong araw, March 9.

Saad pa ng QC local government, “Mamamahagi ang lokal na pamahalaan ng food packs at essential kits para sa mga apektadong pamilya at sila ay isasailalim sa swab testing at mandatory 14-day quarantine.”

Face-to-face classes sa Manila, aprub kay Mayor Isko

ni Ronalyn Seminiano Reonico | February 5, 2021

Papayagan na ng Manila government ang pagsasagawa ng face-to-face classes sa ilang eskuwelahang nag-aalok ng medical programs, ayon kay Mayor Francisco “Isko Moreno” Domagoso.

Pahayag ni Mayor Isko, “We welcome CEU (Centro Escolar University) for that matter, EAC (Emilio Aguinaldo College), FEU (Far Eastern University), or anybody na may medical school. Malamang sa hindi, papayagan namin.”

Pinag-aaralan din ng local government unit (LGU) na payagan nang magsagawa ng face-to-face classes sa iba pang nursing schools ngunit kailangang masiguro na nasusunod ang mga health protocols at dapat ding payagang magsagawa ng regular na inspeksiyon ang LGU sa mga eskuwelahan.

Sa ngayon, maaari nang magsagawa ng face-to-face classes para sa kanilang medical at allied health programs ang University of Santo Tomas (UST).

Samantala, sasagutin naman ng city government ang regular na swab testing para sa mga medical students na a-attend na ng face-to-face classes.

Saad ni Mayor Isko, “The City of Manila, we have three machines and two laboratories. We can offer [swab test] regularly. Para magkaroon sila ng peace of mind (for their peace of mind), we can submit them to swab testing, and it can be available for free so that it would not add cost to the students.”

Selebrasyon ng Chinese New Year, kanselado

ni Lolet Abania | January 30, 2021

Naglabas ng anunsiyo ang lokal na pamahalaan ng Manila sa pagkakansela sa lahat ng pagdiriwang na may kaugnayan sa Chinese New Year dahil sa COVID-19 pandemic.

Sa ilalim ng Executive Order No. 4, ayon kay Manila Mayor Francisco ‘Isko’ Moreno, ang February 11 hanggang February 12 na selebrasyon ay magiging daan sa mabilis na pagmumulan at pagkalat ng nakahahawang COVID-19 kung hindi ito ikakansela.

“Hangga’t maaari, wala muna tayong mga activities that will encourage assembly of people in an area or public place. Kaya ‘yung ating mga dragon dance, ‘yung mga parada, huwag n'yo po munang gagawin,” ani Moreno.

Ipinagbawal din ng alkalde ang pagbebenta ng alak o alcohol sa Binondo Chinatown area sa panahon ng okasyon.

Gayundin, ang paggamit ng fireworks at pyrotechnic devices ay ipinagbawal. Aniya, “To ensure the health and safety of the public during the entire duration of the celebration of Chinese or Lunar New Year.”