Vaccination site sa Manila, dinagsa dahil sa 'no vaccine, no ayuda'

ni Lolet Abania | August 5, 2021

Kinansela ni Manila Mayor Isko Moreno ang kanyang oath taking sa Aksyon Demokratiko ngayong Huwebes nang hapon matapos ang nangyari sa vaccination site sa nasabing lungsod.

“Mayor Isko Moreno Domagoso decided to put off the Aksyon oath taking which was scheduled this afternoon,” ayon sa pahayag ng kampo ni Moreno. “The chaos in some NCR vaccine centers, especially in Manila this morning, requires utmost collective attention,” dagdag pang statement.

Dumagsa ang napakaraming tao sa COVID-19 vaccination centers sa National Capital Region ngayong Huwebes bago ang pagpapatupad ng enhanced community quarantine (ECQ). Agad namang ipinakansela ng mga awtoridad ang pagbabakuna ng COVID-19 vaccine sa isang mall sa Manila na hiniling na rin ng management nito dahil napuno ng mga taong nais na magpaturok matapos kumalat ang impormasyong “no vaccine, no cash aid”.

Gayunman, agad na niresolba ito ni Moreno habang pinaimbestigahan na ng Metro Manila Development Authority at ng Department of Interior and Local Government (DILG) ang naturang insidente. Nakatakda sana ang oath taking ni Moreno kay Atty. Robbie Pierre Roco, anak ng party founder na si Senator Raul Roco.

Ang Aksyon Demokratiko ay ang partido rin ni Pasig City Mayor Vico Sotto. Sa isang liham nitong Agosto 4 na naka-address kay NUP secretary general Representative Narciso Bravo, naghain ng resignation si Moreno sa partido bilang vice-chairman for political affairs at miyembro na rin. "I am very thankful to the party for giving me the chance to serve it the best way possible," ani Moreno.

Para sa Eid’l Adha… 800 katao, sama-sama sa mosque sa Maynila

ni Lolet Abania | July 20, 2021

Umabot sa 800 indibidwal ang pinayagang makapasok sa Golden Mosque sa Manila para sa paggunita ng Eid’l Adha o ang Arabic Festival of Sacrifice na ipinagdiriwang ngayong araw, Hulyo 20, sa kabila ng pandemya ng COVID-19.

Subalit para sa mga kababayang Muslim na hindi na nakapasok sa mosque, inusal na lamang nila ang kanilang morning prayer sa kahabaan ng Globo de Oro at Elizondo Streets.

Gayundin, marami ang nagtipun-tipon sa lugar ngayong Martes nang umaga upang makiisa sa umagang panalangin para sa mahal nilang si Allah at bilang bahagi ng kanilang pasasalamat dito.

8 Pinoy, positibo sa Delta variant

ni Ronalyn Seminiano Reonico | July 20, 2021

Walong Pinoy ang nagpositibo sa COVID-19 Delta variant matapos sumailalim sa RT-PCR retesting, ayon sa Department of Health (DOH) ngayong Martes.

Ayon kay Health Undersecretary Maria Rosario Vergeire, asymptomatic ang mga ito at sa naturang bilang, 4 ang mula sa Cagayan de Oro, isa sa Manila, 1 sa Misamis Oriental, at dalawa ang returning overseas Filipinos.

Saad pa ni Vergeire, “Lahat sila ay walang sintomas. Sila ay mino-monitor ngayon hanggang matapos nila ang 14-day quarantine.”

Sa ngayon ay 35 na ang naitatalang kaso ng Delta variant sa bansa kung saan 3 ang naiulat na nasawi habang ang iba pa ay nakarekober na.