Malusog si Pangulong Duterte – Malacañang

ni Lolet Abania | February 4, 2022

Malusog para sa kanyang edad si Pangulong Rodrigo Duterte, ito ang paniniyak ng Malacañang ngayong Biyernes.

Ginawa ni acting presidential spokesperson Karlo Nograles ang pahayag isang araw matapos niyang ianunsiyo na sumailalim sa quarantine si Pangulong Duterte makaraang ma-expose sa nagka-COVID-19 nitong kasambahay at nagtungo sa ospital para naman sa kanyang regular checkup, base na rin sa order ng doktor nito.

“Okay naman si Pangulo,” sabi ni Nograles sa isang news conference ngayong Biyernes.

“He is as healthy as any healthy individual at his age could be,” giit pa ni Nograles.

Si Pangulong Duterte ay 76-taong gulang na.

Ayon kay Nograles, batay sa naging assessment ng doktor ng Pangulo, lumabas na ang COVID-19 case exposure nito ay noong Enero 28.

“Upon the assessment of the physician, even if another household staff tested positive [for COVID-19] last Sunday, the President was not in close contact as per the circumstances,” ani Nograles.

“That is why his quarantine was cut short and ended yesterday, February 3,” sabi pa ng opisyal.

Kinumpirma naman ni Nograles na nagtungo ang Punong Ehekutibo para sa kanyang checkup sa Cardinal Santos Medical Center sa San Juan City, subalit hindi nito binanggit kung kailan ito naganap.

Nitong Huwebes, naglabas ng larawan si Senador Christopher “Bong” Go na ipinakitang si Pangulong Duterte ay naka-personal protective equipment (PPE) habang nakasuot din ng face mask at face shield sa loob ng isang kotse.

Sinasabing ang larawan ay kinuha nitong Huwebes ng hapon sa isang lugar sa Metro Manila.

Matatandaan na paulit-ulit na dini-dismiss ng mga aide ni Pangulong Duterte ang panawagan ng publiko para mag-isyu ang Palasyo ng medical bulletin hinggil sa kalusugan ng Pangulo, anila, “the Constitution only demands disclosure in the event of a serious sickness.”

Naganap ang huling public appearance ng Pangulo sa kanyang Talk to the People address noong Enero 24.

Ani Nograles, “presumably on Monday”, ang susunod na public appearance ni Pangulong Duterte.

Simula Pebrero 16... Foreigners na ‘di bakunado, bawal na sa ‘Pinas – Palasyo

ni Lolet Abania | January 28, 2022

Ipagbabawal na ang pagpasok ng mga foreign nationals o dayuhan na hindi fully vaccinated kontra-COVID-19 simula Pebrero 16, kasunod ng pagrebisa ng gobyerno ng kanilang protocols para sa mga international travelers at returning overseas Filipinos, ayon sa Malacañang.

Sinabi ni acting Malacañang Spokesman at Cabinet Secretary Karlo Nograles na base aniya ito sa pandemic inter-agency task force’s (IATF) Resolution No. 157.

“Sorry to say pero by Feb. 16, ‘pag hindi fully vaccinated, hindi natin papapasukin,” ayon kay Nograles sa isang televised public briefing ngayong Biyernes.

Aniya, inaprubahan ng pamahalaan ang tinatawag na dropping facility-based quarantine para sa mga fully-vaccinated international travelers at returning overseas Filipinos (ROFs).

Ang mga fully-vaccinated nationals mula sa mga non-visa requiring countries, sa ilalim ng Executive Order 408, series of 1960 ay papayagan na ring pumasok sa bansa simula Pebrero 10, 2022.

Gayundin, batay sa nakasaad sa EO, pinapayagan nito ang pagpasok ng mga fully-vaccinated international travelers kaugnay naman sa pagnenegosyo at turismo.

“’Yung under EO 408, kailangan fully vaccinated, makikita natin na we are only allowing foreign nationals coming in na fully vaccinated,” paliwanag ni Nograles.

“Kapag hindi fully vaccinated, hindi po puwede, pero absolutely sa 16 tama po ‘yun, wala nang foreign nationals na makakapasok dito na hindi fully vaccinated,” sabi pa ng opisyal.

Nabuo ang naturang polisiya matapos na simulan ng gobyerno na ipagbawal ang mga unvaccinated na mga indibidwal na pasakayin sa mga public transport sa National Capital Region (NCR).

Disenyo ng 3 bayaning Pinoy... P1,000 bill, hindi ide-demonetized – Malacañang

ni Lolet Abania | December 14, 2021

Isa lamang test circulation ang bagong P1,000 banknote design na nagpapakita ng Philippine eagle kapalit ng tatlong Filipino war heroes, ayon sa Malacañang.

“Our P1,000 bill that shows the faces of our heroes and martyrs will not be demonetized,” sabi ni acting Presidential Spokesperson Karlo Nograles sa isang press briefing ngayong Martes.

“This new design with polymer material is only for test circulation,” dagdag pa ni Nograles, nang tanungin na kung buburahin ang mga bayani sa Philippine banknotes ay magiging polisiya na ngayon ng administrasyong Duterte.

Maraming mambabatas at mga personalidad ang kumuwestiyon sa bagong disenyo ng P1,000 banknote, kung saan ang mga mukha nina Josefa Llanes Escoda, Vicente Lim at Jose Abad Santos ay inalis. Sina Escoda, Lim at Santos ay pinatay ng mga Japanese forces noong World War II, na nakipaglaban para sa kalayaan ng Pilipinas mula sa mga colonizers.

Ayon kay Nograles, batay aniya sa Bangko Sentral ng Pilipinas (BSP), ang test circulation ng bagong P1,000 bill ay magsisimula sa Abril 2022.

“The test circulation will be done to validate if the polymer material is environment friendly, more hygienic considering we are still facing a pandemic, or if it is more secure,” ani opisyal.

Gayunman, hindi pa batid ni Nograles kung hanggang kailan ang test circulation na ipapatupad, at kung ang mga mukha ng tatlong bayani ay muling ire-restore matapos ang test circulation period.

“The new design for banknotes is cyclical and is done in validating advantages of the polymer material, with the assurance that the existing P1,000 bill with the faces of our heroes will not be demonetized,” paliwanag pa ni Nograles.