Community pantry, hinahanapan lang ng butas – VP Robredo

ni Mary Gutierrez Almirañez | April 26, 2021

Sinopla ni Vice- President Leni Robredo ang mga opisyal na nagsasabing komunista ang mga organizers ng community pantry at ang ilan na pilit itong hinahanapan ng butas, batay sa kanyang weekly radio program.

Aniya, “May lugar at panahon para sa lahat. Ngayon na maraming nagugutom, maraming nawalan ng hanapbuhay, malaki ‘yung pangangailangan, dapat nga, ‘pag may mga ganitong activities ay sinusuportahan. ‘Di ba dapat nga, gayahin na lang nila, kaysa nag-aaksaya sila ng panahon na maghanap ng diperensiya?”

Kaugnay ito sa napabalitang ‘red-tagging’ umano kay Maginhawa Community Pantry organizer Ana Patricia Non at sa nangyaring insidente sa pantry ng aktres na si Angel Locsin.

Dagdag pa ni VP Robredo, “Napaka-misplaced, napaka-irresponsible ‘yung ginagawa ng ibang mga opisyal ng pamahalaan, na sa pahanong gaya nito, eh, ‘yan ang iniisip nila… Instead na maging thankful na merong isang bata pa na nakaisip ng napakahusay na activity, hinahanapan pa ng diperensiya.”

Samantala, humingi naman ng paumanhin si VP Robredo sa nangyaring delay sa kanyang free medical teleconsultation program.

Paliwanag pa niya, "Pasensiya na po kung mayroong delays, kasi talagang grabe po iyong volume ng requests na pumapasok. Sinusubukan po nating matugunan as soon as possible, pero hirap po talaga."

Sa ngayon ay mayroong 600 volunteer doctors at 1,900 non-medical volunteers ang Bayanihan E-Konsulta na itinayo ng Office of the Vice-President. Maaaring ma-access ang libreng konsultasyon hinggil sa COVID-19 at iba pang sakit sa pamamagitan ng pakikipag-ugnayan sa kanilang Facebook page.

Pumila sa community pantry, lumabag sa curfew, pinagmumulta

ni Lolet Abania | April 22, 2021

Ilang residente ang natikitan dahil sa paglabag sa curfew ng Quezon City Task Force Disiplina matapos na pumila sa Maginhawa Community Pantry sa Quezon City ngayong Huwebes ng madaling-araw.

Isang misis na nagkakalakal ang nagsabing dahil sa hirap ng buhay lalo na at pandemya, tatlong beses na umano silang pumilang mag-asawa sa Maginhawa Community Pantry, kung saan natikitan at pagmumultahin pa sila.

Ikinalungkot din ng iba pang mga natikitan ang nangyari sa kanila. Anila, sana ay itinaboy o pinagsabihan na lamang sila ng mga awtoridad.

Pinagmumulta ang mga nahuli ng P300 dahil sa paglabag sa curfew sa nasabing lungsod. Agad namang inako ni Mayor Joy Belmonte ang multa ng mga natikitan.

Sa isang text message, binanggit ni Belmonte na bilang konsiderasyon sa ilang residenteng natikitan na lumabag sa curfew na pumila sa Maginhawa Community Pantry, siya ang magbabayad nito.

“An ordinance has been violated, OVRs have been issue[d] so the penalty must be paid. But taking into consideration the circumstances they are in, I will be the one to pay the penalty in their behalf with a very strict warning not to repeat the violation,” ani Belmonte.

Permit sa community pantry, ‘di na kailangan

ni Mary Gutierrez Almirañez | April 21, 2021

Nilinaw ni Quezon City Mayor Joy Belmonte na hindi kailangan ng permit upang isagawa ang community pantry sa Kyusi, bagkus ay isang guidelines na dapat sundin ng mga residente at bawat organizer upang maiwasan ang pagkukumpulan sa pantry na maaaring magdulot ng hawahan sa COVID-19.

Batay sa naging panayam kay Belmonte ngayong umaga, "Maybe we should have some guidelines at least. The barangay can provide you with needs that you might have difficulty in providing for yourself.”

Iginiit din niya ang seguridad na puwedeng ibigay ng kanilang lungsod sa bawat community pantry.

Aniya, “For example, security. The barangays can help with that. We can also have somebody look at the food as well because we have to take care of food safety... but other than that, ayoko talaga magkaroon ng regulation.”

Sa ngayon ay bukas na muli ang Maginhawa Community Pantry. Matatandaang isinarado iyon kahapon ng organizer na si Ana Patricia Non dahil nangangamba ito sa seguridad ng mga volunteer workers bunsod ng red-tagging at iba pang insidente.

Sa kahiwalay na panayam nama’y nanawagan si Non kay Pangulong Rodrigo Duterte.

Aniya, "President Duterte, nananawagan po ako na sana, maging wake-up call po na hindi po sapat ang kita ng Pilipino, ang ayuda at tulong po. Sana po, nakikita natin na hindi naman po sila pipila kung hindi kailangan. Nararanasan po siya sa buong bansa."

Kaugnay nito, kaagad namang binawi ni Department of the Interior and Local Government (DILG) Undersecretary Martin Diño ang inirekomendang permit sa bawat mag-oorganisa ng community pantry.

Sabi pa ni Belmonte, “This is something that grew and sprung out of community love so dapat as much as possible, the government must stay away from this... para the people can do their good acts.”

Ipinaliwanag din niya kung bakit hindi siya pumupunta sa Maginhawa Community Pantry, "Purposely, hindi ko siya binisita kasi ayoko maging epal. Ayokong mahaluan 'yung ginagawa niya ng pulitika kasi ang dalisay-dalisay ng kanyang intention, ng kanyang ginagawa."

Sa kabuuan ay mahigit 70 community pantries na ang inoorganisa sa Quezon City.