Imbes na papel — LTO.. Driver's license, digital na

ni Jeff Tumbado | May 9, 2023

Nakatakdang ilunsad ng Land Transportation Office (LTO) at Department of Information and Communications Technology (DICT) ang online o electronic na bersyon ng driver's license sa bansa.

Bilang pagsunod ito sa direktiba ni Pangulong Ferdinand "Bongbong" Marcos, Jr. na ipatupad ang digitalization sa mga ahensya ng gobyerno.

Ayon kay LTO Chief Jay Art Tugade, ang digital driver's license ang magsisilbing alternatibo sa pisikal na license card at maaari itong ma-access o makita sa isang "super app" na nilikha ng DICT.

"We also appreciate the way the super app functions similarly to a wallet, containing all government IDs, among other things, within your mobile device," dagdag pa nito.

Ipinunto pa ni Tugade na may mapagpipilian na rin ang publiko mula sa paggamit ng papel na Official Receipt (OR) bilang pansamantalang driver's license sa gitna ng kinakapos nang suplay ng plastic cards.

Maliban sa digital na driver's license, sinabi ng LTO Chief na maaaring magamit ng publiko ang "super app" para sa iba't ibang transaksyon sa ahensya tulad ng license registration at renewal gayundin ang online payments.

Kaugnay naman ng usapin ng seguridad, nabatid mula kay Tugade na ang ginagamit na security features ng pisikal na driver's license ay kasama na rin sa digital na bersyon nito, maliban pa sa sariling security measures ng "super app".

Noong Marso ay pormal na pumasok ang LTO at DICT sa isang e-governance partnership na layong magkaroon ng pagtutulungan tungo sa pagpapabuti at pagpapalakas ng digitalization ng mga sistema at proseso sa ahensya para sa pangkalahatang kahusayan at epektibong serbisyo sa publiko.

Exam para sa driver's license, paiikliin

ni Jeff Tumbado | May 5, 2023

Aktibong naghahanap ng mga solusyon ang Land Transportation Office (LTO) na layong simplehan ang mga proseso sa ahensya upang hindi makaporma ang mga fixer at kabilang sa mga pinag-aaralan ngayon ay posibilidad na paikliin ang pagsusulit para sa mga kukuha ng lisensya ng pagmamaneho.

Aminado si LTO Chief Jay Art Tugade na ang mahaba at matagal na proseso sa ahensya ay isa sa mga dahilan kaya’t tinatangkilik ng ilang aplikante ang alok na mga serbisyo ng fixer.

Makaraang mabatid na ang kasalukuyang pagsusulit para sa kumukuha ng lisensya sa pagmamaneho ay inaabot ng isang oras, agad na iniutos ni LTO Chief Tugade ang pagbuo ng komite na susuri sa hanay ng mga tanong at kung maaari ay mapaikli ito nang hindi nakokompromiso ang kalidad ng drayber na makakapasa.

Kabilang sa mga pinag-aaralang pagsusulit ay para sa mga bagong kumukuha ng non-professional license at conductor's license, pinababagong klasipikasyon mula non-professional tungong professional driver's license, at pagdaragdag ng driver's license code.

Maliban sa pagpapaikli sa oras ng pagsusulit, inaaral na rin ng komite na gawing "customized" ang mga tanong, depende sa klasipikasyon ng lisensya o driver's license code na kinukuha ng aplikante.

Dahil sa sunud-sunod na kapalpakan.. LTO at DOTr, kinasuhan ng transport groups

ni Jeff Tumbado | May 3, 2023

Sinampahan ng transport groups ng kasong sibil ang ilang matataas na opisyal ng Land Transportation Office (LTO) at Department of Transportation (DOTr) kasunod ng umano'y ilegal na pagpapalabas ng mga polisiya kaugnay ng pagpapatupad ng Public

Motor Vehicle Inspection Center (PMVIC).

Batay sa inihaing reklamo ni Atty. Israelito Torreon, legal counsel ng transport groups, sinampahan ng kaso sina DOTr Secretary Jaime Bautista, Usec. Reinier Paul Yebra, LTO Asec. Jose Arturo Tugade at iba pa.

Inihain ni Atty. Torreon ang Petition for Certiorari Prohibition sa Regional Trial Court ng Lupon, Davao Oriental upang ideklara ng korte na walang bisa ang mga naunang ipinalabas na Department Order/memorandum circular kaugnay ng umano'y ilegal na implementasyon ng PMVIC.

Ipinababasura rin ng iba't ibang transport group at road safety advocates ang pagpapairal ng PMVICs system na ginawa lamang sa bisa ng Department Order.

Sa isinampang reklamo ng lead counsel ng grupo laban sa LTO at DOTr sa Regional Trial Court (RTC) sa Lupon ng Davao Oriental, sinabi nito na layon lamang na gipitin hanggang sa nawala ang Private Emission Testing Center (PETC) gayong ito ay alinsunod umano sa mga umiiral na batas.

Bukod pa rito, ipinarerebisa rin ng grupo ang implementasyon ng Land Transportation Management System (LTMS) bunsod ng sunud-sunod na kapalpakan na naranasan ng kanilang hanay.

Magkasanib pwersang nagsampa ng kaso ang mga grupong Ang Kaligtasan sa Kalsada; National Confederation of Tricycle Operators and Drivers Association of the Philippines (NACTODAP); National Public Transport Coalition (NPTC); Association of Committed Transport Organizations Nationwide Corporation (ACTONA); Arangkada Riders Alliance Inc. (Motorcycle Riders) at Lupon Pedicab Operators Drivers Association at iba pang transport group sa Davao Region.