May 10-taon validity... Pag-iisyu ng driver’s license, start na – P-Duterte

ni Lolet Abania | November 3, 2021

Inanunsiyo ni Pangulong Rodrigo Duterte na sisimulan na sa lahat ng opisina ng Land Transportation Office (LTO) sa buong bansa ang pag-iisyu ng driver’s license na mayroong 10-taon validity sa Disyembre.

Noong Oktubre 28, ang LTO licensing office na matatagpuan sa East Avenue, Quezon City ay nagsimula na ng pag-iisyu ng naturang lisensiya.

Ayon sa Pangulo, ang iba pang opisina ng LTO sa Metro Manila ay uumpisahan naman ang proyekto ngayong buwan, kasunod nito ang lahat ng iba pang rehiyon.

“By December 2021, the LTO commits that all its offices nationwide will be issuing licenses with a 10-year validity,” ani Pangulong Duterte sa pre-recorded address na ipinalabas ngayong Miyerkules ng umaga.

Sa ilalim ng Republic Act 10930 na nilagdaan ni P-Duterte noong 2017 ay nakasaad, “any holder of a professional or nonprofessional driver’s license who has not committed any violation of Republic Act 4136 and other traffic laws, rules and regulations during the five-year period shall be entitled to a renewal of such license for 10 years, subject to the restrictions as may be imposed by the LTO.”

Samantala, ini-require ng LTO sa mga renewal applicants na sumailalim sa isang tinatawag na comprehensive driver’s exam.

Ang eksaminasyon ay maaaring gawin ng face-to-face o online sa portal.lto.gov.ph.

Unang ipinatupad ang proyekto sa Quezon City, habang isasagawa ito sa iba pang lugar ngayong Nobyembre 3.

Paliwanag naman ni LTO chief Assistant Secretary Edgar Galvante, ang mandatory Comprehensive Driver’s Education Program (CDEP) ay hindi magdudulot ng anumang tinatawag na “undue delay” at “hardship” para sa mga indibidwal na magre-renew ng driver’s license dahil aniya, “this is free and readily available through multiple channels.”

Mag-mask kahit sa loob ng sasakyan — Palasyo

ni Lolet Abania | February 5, 2021

Pinanindigan ng pamahalaan ang itinakdang polisiya na kailangang nakasuot ng face mask ang lahat ng nasa loob ng sasakyan kahit pa magkasama sa bahay o hindi ang nakasakay dito.

Sa isang joint statement, ayon sa Department of Transportation (DOTr) at sa Department of Health (DOH), dapat na sundin at ipatupad ang sumusunod na guidelines sa pagsusuot ng face mask sa loob ng sasakyan:

• Kung mag-isa lamang bumibiyahe, maaaring tanggalin ng driver ang kanyang face mask.

• Kung ang driver ay may kasamang pasahero o mga pasahero, mandatory na lahat ng indibidwal na nasa loob ng sasakyan ay maayos na nakasuot ng face mask, kahit pa magkasama sa isang bahay ang nakasakay dito.

Ang polisiya ay alinsunod sa naging desisyon ng Inter-Agency Task Force on Emerging Infectious Diseases (IATF-EID).

Sa isang Viber message naman ni DOTr Assistant Secretary Goddess Libiran, sinabi nitong ang mga policy-makers ang siyang magpapaliwanag kung paano maayos na ipatutupad ang policy at kung ano ang mga fines and penalties na ipapatupad sa mga pasaway.

Nakapaloob sa joint statement ng DOH-DOTr na ang hakbang ay nabuo sa koordinasyon at pagtutulungan sa pagitan ng Land Transportation Office (LTO), Land Transportation Franchising and Regulatory Board (LTFRB), Metropolitan Manila Development Authority (MMDA), Inter-Agency Council for Traffic (IACT), Philippine National Police-Highway Patrol Group (PNP-HPG), iba pang law enforcement agencies, at local government traffic offices/units, na ayon pa sa statement, “Concerning the proper implementation of the Resolution, and the imposition of appropriate fines and penalties for violations thereof, in accordance with existing laws, rules and regulations.”

Solo sa sasakyan, oks nang walang mask

ni Lolet Abania | February 3, 2021

Nilinaw ng Land Transportation Office (LTO) na hindi nila huhulihin o pagmumultahin ang mga pasaherong nakasakay sa isang sasakyan nang walang suot na face mask, magkasama man o hindi sa bahay.

Bagama’t, ayon kay LTO chief, Transportation Assistant Secretary Edgar Galvante, pinag-aaralan na ng Inter-Agency Task Force on COVID-19 (IATF) at Department of Health (DOH) ang nasabing polisiya.

“Pero pansamantala po kung kayo ay masisita hindi naman pagmumultahin agad o whatever. Ipaliliwanag lang ang kahalagahan ng pag-observe ng protocol,” ani Galvante.

Matatandaang sa isang radio interview kahapon, binanggit ni LTO Director Clarence Guinto na ang mga pasahero na nasa loob ng pribado o pampublikong sasakyan ay kinakailangang magsuot ng face mask upang maprotektahan ang sarili laban sa COVID-19.

Ayon kay Guinto, ang mga lalabag na may-ari ng mga private vehicles ay papatawan ng P2,000 multa habang sa mga public vehicle violators ay P5,000.

Samantala, ipinahayag ni Cabinet Secretary Karlo Nograles na ang mga drivers na nag-iisa sa kanilang sasakyan ay hindi na kailangan pang magsuot ng mask habang nagmamaneho.

Ayon kay Nograles, co-chairperson ng IATF, naglabas na ng advisory ang DOH patungkol dito at sinasabing, “those driving alone may remove their masks while inside their vehicle." "I think that is only logical; if there is no one in the vehicle with you, you cannot infect anyone else,” ani Nograles.