Pasahero nakatulog, ibinaba sa ibang lugar... Taxi driver, pinatawan ng lifetime ban

by Jeff Tumbado @News | September 19, 2026

Photo: LTO

Inirekomenda ng Land Transportation Office (LTO) ang lifetime ban sa isang driver ng GSM Green Taxi na inireklamo ng isang pasahero kaugnay ng umano’y maling pag-uugali matapos itong ibaba sa lugar na hindi ang tamang destinasyon sa Parañaque City noong Setyembre 12, 2026.

Agad na nagsagawa ng imbestigasyon ang LTO at naglabas ng Show Cause Order laban sa driver matapos makatanggap ng reklamo.

Batay sa reklamo ng pasahero, nakatulog umano siya habang bumibiyahe sakay ng taxi at hindi siya naibaba sa kanyang itinakdang drop-off point.

Sa halip, dinala umano siya sa ibang lugar.

Ginamit ng LTO bilang bahagi ng ebidensiya ang CCTV footage at impormasyon tungkol sa driver na nakapaloob sa booking details ng pasahero upang matukoy ang taxi driver na sangkot sa insidente.

Inatasan ng LTO ang driver at ang rehistradong may-ari o operator ng taxi na humarap sa Intelligence and Investigation Division (IID) ng LTO Central Office sa Setyembre 24, 2026, para sa imbestigasyon.

Maaari ring patawan ng kaukulang pananagutan ang may-ari o operator ng sasakyan sa ilalim ng Joint Administrative Order (JAO) 2014-01, kabilang ang paglabag sa probisyon hinggil sa employing an insolent or discourteous driver at breach of franchise conditions, kung mapatutunayang nagkasala.

Sakay ang MMDA official, dumaan sa busway, plaka fake, may blinker, wang-wang, etc... Drayber ni Torre, binawian ng lisensya

ni BRT @News | September 8, 2026

Photo:LTO

Pormal nang ni-revoke o binawi ng Land Transportation Office ang lisensya ng driver ni Metropolitan Manila Development Authority (MMDA) General Manager Nicolas Torre III na nahuling dumaan sa EDSA Busway.

Lumabas sa pagsusuri ng ahensya na sangkot ang driver sa ilan pang paglabag tulad ng paggamit ng plakang nakatalaga sa ibang sasakyan at pagkakabit ng ‘di awtorisadong kagamitan at marka.

Nananatiling naka-impound sa LTO Central Office ang nabanggit na sasakyan. 

Una nang inamin ni Torre na sakay siya ng SUV nang mangyari ang insidente at sinabi niyang siya ang may-ari ng sasakyan. 

Ayon sa mga ulat, isa itong armored vehicle na nabili niya sa halagang P3.5 milyon mula sa isang religious organization. Sinabi rin niyang binili niya ito sa marketplace.

Fixer sa LTO, timbog uli

by Benjamin Chavez @News | August 26, 2026

Photo: LTO Region 4A Calabarzon - Timemark

Muling naaresto ang isang indibidwal na umano'y sangkot sa illegal fixing activities sa isinagawang joint entrapment operation ng Land Transportation Office (LTO) Cabuyao District Office at Philippine National Police-Criminal Investigation and Detection Group (PNP-CIDG) Laguna.

Ayon sa LTO, nahuli ang suspek na kinilala lang sa pangalang Kevin, matapos umano itong mag-alok ng "palakad" o hindi awtorisadong pagproseso ng transaksyon kapalit ng bayad sa isang poseur-client. 

Lumabas din sa ulat na ikalawang beses na umanong naaresto ang naturang indibidwal kaugnay ng parehong alegasyon.