Validity ng expired na lisensya, rehistro, extended — LTO

ni Jeff Tumbado @News | August 1, 2026

Photo: File

Inanunsyo ng Land Transportation Office (LTO) nitong Biyernes ang pagpapalawig ng bisa ng mga motor vehicle registration, driver's license, conductor's license, student permit, at medical certificate na nag-expire simula Hulyo 1, 2026.

Nakasaad sa Memorandum Circular No. MVL-2026-5271 na ipinatupad ang extension matapos makaranas ng sunud-sunod na problema ang Land Transportation Management System (LTMS), na nakaapekto sa pagproseso ng mga transaksyon ng LTO sa buong bansa.

Tiniyak din ng ahensya na walang ipapataw na late renewal fee, surcharge, o anumang multa sa mga dokumentong saklaw ng memorandum habang umiiral ang extension.

Car, motorcycle dealers na pasaway sa rehistro, lagot sa LTO

ni Jeff Tumbado @News | July 24, 2026

Photo: File

Nagbabala ang Land Transportation Office (LTO) na papatawan nito ng mahigpit na parusa ang mga accredited car at motorcycle dealers na mapatutunayang paulit-ulit na lumalabag sa mga patakaran sa pagpaparehistro ng mga bagong sasakyan na nagiging dahilan ng pagkaantala sa paglabas ng Official Receipt (OR), Certificate of Registration (CR), at rehistradong plaka.

Ito ang naging direktiba ni LTO Chief Assistant Secretary Markus V. Lacanilao, sa ginawang pagpupulong sa mga kinatawan ng mga accredited car at motorcycle dealers sa LTO Central Office sa East Ave., Quezon City.

Sa pulong, sinabi ni Lacanilao na obligasyon ng bawat accredited dealer na tiyaking kumpleto, tama, at agad na naipapasa sa LTO ang lahat ng kinakailangang dokumento para sa pagpaparehistro ng mga bagong sasakyan.

Binigyang-diin niya na hindi dapat mapunta sa mga motorista ang epekto ng kapabayaan o hindi pagsunod ng mga dealer sa itinakdang proseso.

Ayon sa LTO, pananagutin ang mga dealership na magsusumite ng kulang o maling dokumento o magdudulot ng hindi makatwirang pagkaantala sa pagproseso ng OR, CR, at plaka.

Kabilang sa maaaring ipataw na administratibong parusa ang suspensyon o pagpapasara ng mga mapapatunayang lumalabag.

2 jeep nagkarerahan habang may mga estudyante sa bubong, huli

ni BRT @News | July 20, 2026

Photo: LTO / Viral

Pinagpaliwanag ng Land Transportation Office (LTO) ang dalawang jeepney driver na tila nag-drag racing sa kalsada habang may mga estudyante pa sa bubong sa Naguilian, Isabela.

Naglabas na ang LTO Region 2 ng show-cause order laban sa may-ari at driver ng dalawang jeep.

Suspendido rin pansamantala ang rehistro ng mga jeepney at ang lisensiya ng mga tsuper sa loob ng tatlong buwan.