Sa SONA — LTFRB.. Bawi-prangkisa sa tigil-pasada

ni Mai Ancheta @News | July 16, 2023

Nagbabala ang Land Transportation Franchising and Regulatory Board (LTFRB) na babawian ng prangkisa ang mga lalahok sa tatlong araw na tigil-pasada upang tapatan ang ikalawang State of the Nation Address (SONA) ni Pangulong Ferdinand Marcos, Jr. sa July 24.

Ayon kay LTFRB Chief Teofilo Guadiz III, may obligasyon ang mga operator ng public utility jeepney bilang franchise holder na huwag ilagay sa alanganin na sitwasyon ang mga pasahero o ang pampublikong transportasyon.

Ang tatlong araw na tigil-pasada ay inianunsyo ng grupong MANIBELA nitong nakalipas na linggo upang ipakita umano sa kasalukuyang administrasyon ang kanilang pagkadismaya sa isinusulong na modernisasyon sa mga pampublikong sasakyan.

Tiniyak naman ng LTFRB Chief na hindi maaapektuhan ang mga pasahero sa ikinakasang tatlong araw na tigil-pasada dahil hindi sasali sa kilos-protesta ang "Magnificent 7" na mas maraming miyembro kumpara sa grupong MANIBELA.

Kabilang sa mga grupong nagpahayag na hindi sasali sa tatlong araw na transport strike ang Pasang Masda, ALTODAP, PISTON, ACTO, FEJODAP, Stop and Go at LTOP.

Sinabi rin ni Guadiz na magde-deploy ang ahensya ng mga libreng sakay sakaling may mga pasaherong maapektuhan ng tigil-pasada sa July 24, 25 at 26.

LTFRB, bawal manghuli, mag-impound at mag-dispose ng kolorum na sasakyan — DOJ

ni Madel Moratillo | June 8, 2023

Hindi umano puwedeng manghuli, mag-impound at mag-dispose ng kolorum na sasakyan ang Land Transportation Franchising Regulatory Board (LTFRB).

Ito ang nakasaad sa legal na opinyon ni Justice Secretary Jesus Crispin Remulla, kung saan nakasaad na ang maaari lamang gawin ng LTFRB ay makipag-ugnayan sa ibang ahensya ng pamahalaan para sa paghuli ng mga kolorum na sasakyan.

Ang legal opinion ay inilabas ng Department of Justice (DOJ) matapos humingi ng paglilinaw si noo’y Transportation Sec. Arthur Tugade hinggil sa kung sakop ba ng hurisdiksyon ng LTFRB ang paghuli ng mga kolorum na sasakyan.

Puwede lang umanong manghuli ang LTFRB ng kolorum kung binigyan siya ng kapangyarihan ng Land Transportation Office (LTO) o ng Philippine National Police (PNP).

Batay aniya sa nakasaad sa Republic Act 4136, o ang Land Transportation and Traffic Code na inamyendahan ng RA 6975, o Department of the Interior and Local Government Act of 1990, tanging ang LTO at PNP lamang ang maaaring magsagawa ng enforcement pagdating sa mga traffic rules at hindi kasama ang LTFRB.

Hindi rin umano puwedeng gamitin ng LTFRB ang kanilang Joint Administrative Order para magkaroon enforcement power maliban na lamang kung may nakasaad sa batas.

Transaksyon sa LTFRB, balik-face-to-face

ni Jeff Tumbado | June 6, 2023

Ipinag-utos ng Land Transportation Franchising and Regulatory Board (LTFRB) na gawin na lamang opsyonal ang online na pagkuha ng dokumento o paghahain ng iba pang request para sa ilang piling transaksyon sa ahensya.

Alinsunod ito sa Memorandum Circular No. 2023-019 na inilabas ng LTFRB Board upang amyendahan at baguhin ang Memorandum Circular No. 2020-016 na unang inisyu noong ika-19 ng Abril 2020.

Sa unang inilabas na memorandum, kinakailangan na isagawa online ang paghahain ng request para sa ilang transaksyon tulad ng Request for Special Permit, Request for Confirmation of Units, Request for Franchise Verification, Correction of Typographical Error, at Request for Issuance of Extension of Provisional Authority. Ito ay sa gitna ng pagpapatupad ng general community quarantine sa mga lugar na itinuturing na "low" o

"moderate risk areas" dahil sa COVID-19.

Gayunman, sa bagong inilabas na memorandum, pinahihintulutan na ngayon ang personal na paghahain ng request para sa mga nabanggit na transaksyon.

Sa kabila nito, inihayag ng LTFRB Board na kinakailangan pa ring bayaran ang filing fees para sa mga nasabing transaksyon, personal man o online ito isinagawa.

Nakasaad din sa bagong memorandum na bagama't umiiral pa rin ang COVID-19, lubos namang nababawasan ang epekto nito sa iba't ibang aspeto, partikular na sa kakayahang kumilos ng mga tao.