Para sa Semana Santa… LTFRB naka-heightened alert na mula April 8

ni Jasmin Joy Evangelista | April 7, 2022

Inanunsiyo ng Land Transportation Franchising and Regulatory Board (LTFRB) nitong Miyerkules na naka- “heightened alert” na sila mula April 8, para sa Semana Santa at summer season.

Ayon sa LTFRB, naka-“heightened alert” sila hanggang April 18, 2022, bilang pagtalima sa direktiba ng Department of Transportation: “Oplan Biyaheng Ayos: Summer Vacation 2022.”

Kaugnay nito, ipinag-utos ni LTFRB Chairman Martin Delgra III sa lahat ng agency leaders na siguruhin ang safety at security ng lahat ng pasahero at pagsunod ng mga Bus Terminals sa guidelines ng LTFRB, kung saan inaasahan ang mabigat na daloy ng trapiko dahil sa Semana Santa.

Magsasagawa rin ng random inspections ang LTFRB sa mga bus upang matiyak ang “road worthiness” at kaligtasan ng mga commuter.

Sinabi rin ng LTFRB na maaaring pumunta ang mga pasaherong pauwi ng probinsiya sa mga sumusunod na terminal sa Metro Manila: Parañaque Integrated Terminal Exchange (PITX), Santa Rosa Integrated Terminal (SRIT), North Luzon Expressway Terminal (NLET), at Araneta Center Terminal.

Ang mga pribadong terminal naman sa Metro Manila ay maaaring ma-access ng bus operators mula 10 p.m. hanggang 5 a.m. base sa “window scheme” na ipinatutupad ng Metropolitan Manila Development Authority.

“Maglalagay din ng mga Malasakit Help Desk na maaaring pagtanungan o pagsumbungan ng mga mananakay,” ani LTFRB.

“Ipoposte ang mga Malasakit Help Desk sa mga naitalagang Integrated Terminal Exchange na nauna nang nabanggit at sa mga lugar malapit sa mga pribadong terminals,” dagdag pa nito.

Fuel subsidy, sinuspinde muna dahil sa election spending ban – LTFRB

ni Lolet Abania | April 4, 2022

Sinuspinde pansamantala ng Land Transportation Franchising and Regulatory Board (LTFRB) ang alokasyon ng fuel subsidy para sa mga public utility vehicle (PUV) drivers at operators dahil ito sa election public spending ban.

Sa isang interview ngayong Lunes, sinabi ni LTFRB executive director Maria Kristina Cassion na tinatayang 110,200 ng kanilang PUV beneficiaries ang nakatanggap na ng subsidies hanggang nitong Marso 29.

Ayon kay Cassion, mayroon namang tinatayang 22,000 taxi at UV Express na mga benepisyaryo ang sumasailalim sa document validification, habang ang Department of Trade and Industry (DTI) ay nakatakdang magbigay ng subsidy sa tinatayang 27,000 delivery services.

Para sa mga tricycle drivers, sinabi ng LTFRB na hinihintay pa nila ang listahan ng mga benepisyaryo mula sa Department of the Interior and Local Government (DILG).

Subalit, ang disbursement o pagbibigay ng fuel subsidy para sa mga PUV drivers at operators ay pansamantalang itinigil dahil sa election public spending ban na ipinatutupad ng Commission on Elections (Comelec) mula Marso 25 hanggang Mayo 8, 2022.

Sa ilalim ng Comelec’s Resolution No. 10747, kailangan ng isang certificate of exemption para maisagawa ang mga aktibidad at mga programa kaugnay sa social welfare projects at mga serbisyo sa gitna ng naturang ban.

“Before the ban, nagkaroon tayo ng application sa Comelec for exemption at nagkaro’n na po tayo ng hearing. Right now, we are just waiting for the result of our application for exemption sa ban so we can continue distribution,” paliwanag ni Cassion.

Gayunman, habang naghihintay sa desisyon ng Comelec, ayon kay Cassion, ipagpapatuloy nila ang produksyon ng ilang 86,000 Pantawid Pasada Program (PPP) cards para sa ibang mga benepisyaryo.

Una nang sinimulan ng LTFRB nitong Marso ang distribusyon ng P6,500 fuel subsidies sa mahigit 377,000 kuwalipikadong PUV drivers at operators upang makatulong na maibsan ang kanilang kalagayan sanhi ng sunud-sunod na pagtaas sa presyo ng langis na dulot ng nagaganap na sigalot sa pagitan ng Ukraine at Russia.

Ang mga subsidy ay kanilang makukuha sa pamamagitan ng cash cards na inisyu ng Landbank of the Philippines na maaari naman nilang gamitin sa mga accredited fuel stations.

P703M fuel subsidy, naipamahagi na sa mga benepisyaryo – LTFRB

ni Lolet Abania | March 22, 2022

Inianunsiyo ng Land Transportation Franchising and Regulatory Board (LTFRB) ngayong Martes na nasa P703 milyon halaga ng fuel subsidies ang nai-release na sa gitna ng sunud-sunod na pagtaas sa presyo ng mga produktong petrolyo.

Ayon kay LTFRB Executive Director Tina Cassion, sakop ng fuel subsidies ang kabuuang 108,164 benepisyaryo na nakatanggap ng P6,500 per unit kaugnay sa Pantawid Pasada Program ng gobyerno.

Ang pamahalaan ay naglaan ng inisyal na P2.5 bilyon para makapagbigay ng mga fuel vouchers sa 377,000 kuwalipikadong mga public utility vehicle (PUV) drivers sa buong bansa sa gitna ng magkakasunod na pagtaas ng pump prices.

“Pinapaalalahanan ang mga operators /drivers, na ang halaga na kanilang matatanggap na fuel subsidy sa ilalim ng programang ito ay maaari lamang gamitin para sa pagbili ng kailangan nilang krudo,” giit ni Cassion sa isang statement na inilabas sa mga reporters.

Sa ilalim ng Pantawid Pasada Program, ang mga drayber ng PUVs ay mabibigyan ng financial aid na magiging pantakip sa mas mataas na presyo ng mga prduktong petrolyo, kung saan umabot na ito sa 11 na magkakasunod na pagtaas mula sa nakalipas na 12 linggo.

Bagaman ang mga kumpanya ng langis ay nagpatupad ng rollback ngayong Martes, hindi pa rin ito sapat para makabawi sa 11 linggong sunud-sunod na pagtaas ng presyo ng krudo noong mga nakaraang linggo.

“Patuloy ang LTFRB sa pagproseso ng fuel subsidy sa iba pang mga benepisyo. Nakikipag-ugnayan ang ahensya sa Land Bank of the Philippines para mapabilis ang implementasyon ng buong programa,” sabi pa ni Cassion.

Noong nakaraang linggo sinabi ng Department of Transportation (DOTr) na ang mga jeepney drivers ang unang mga benepisyaryo ng naturang programa, subalit ang ibang uri ng transportasyon ay maghihintay naman hanggang sa ikalawang quarter dahil sa tinatawag na logistical issues.