Distribusyon ng unang bahagi ng fuel subsidy, kumpleto na sa mid-May – LTFRB

ni Lolet Abania | April 30, 2022

Ipinahayag ng Land Transportation Franchising and Regulatory (LTFRB) ngayong Sabado na ang pamamahagi ng P2.5-billion fuel subsidy para sa mga public utility vehicle (PUV) drivers at operators ay makukumpleto na sa ikalawang linggo ng Mayo.

Sa isang interview, sinabi ni LTFRB Executive Director Kristina Cassion na sa ngayon nasa 180,000 PUV sector beneficiaries mula sa 264,000 na nai-record ng ahensiya ang nai-credit na para sa P6,500 fuel subsidy sa kanilang cash cards.

“We really wanted to fast-track this one… by the second week of May fully matapos na ito,” ani Cassion.

Ayon kay Cassion, ang first tranche ng fuel subsidies ay kailangang maipamahagi muna ang kabuuan bago mai-release ang second tranche.

Ang fuel subsidy program ng gobyerno – dalawang tranches ng P2.5 billion bawat isa – ay layong makapagbigay ng P6,500 cash grants sa 377,000 benepisyaryo, kabilang ang LTFRB-supervised PUV drivers at operators, tricycle drivers at operators sa ilalim ng Department of the Interior and Local Government (DILG), at delivery riders sa ilalim naman ng Department of Trade and Industry (DTI).

Una nang sinabi ni Cassion na ang LTFRB ay naghihintay pa sa listahan ng mga kuwalipikadong tricycle drivers at operators.

Para sa delivery riders sa ilalim ng DTI, ayon sa opisyal, may 27,777 benepisyaryo na ang pinoproseso ng Landbank para mai-credit ang fuel subsidy sa kanilang GCash o PayMaya accounts.

6 prov’l bus operators, inisyuhan ng show-cause orders ng LTFRB

ni Lolet Abania | April 23, 2022

Nag-isyu na ang Land Transportation Franchising and Regulatory Board (LTFRB) ng show-cause orders sa anim na provincial bus operators para ipaliwanag nito kung bakit libu-libong mga pasahero ang na-stranded sa Pampanga bus stations ngayong linggo.

Una nang isinisi ng LTFRB at Metropolitan Manila Development Authority (MMDA) ang nangyaring pagkalito o confusion hinggil sa ipinatutupad ngayong window hour scheme mula sa ilang bus companies anila, “they were ‘sabotaging’ the policy”.

Ayon sa LTFRB, ang mga provincial bus operators na umano’y lumabag sa kanilang Certificate of Public Convenience ay ang mga sumusunod:

• Victory Liner Inc.

• Genesis Transport Service Inc.

• Bataan Transit Bus Co. Inc.

• Five Star Bus Inc.

• First North Luzon Transit Inc.

• Maria De Leon

Nabatid ng mga awtoridad na batay sa LTFRB, ang mga naturang bus operators ay hindi umano nagkaroon ng anumang biyahe o trips patungong Manila, na naging dahilan kaya libu-libong pasahero ang na-stranded mula sa mga sumusunod na terminals sa Pampanga:

• Dau Terminal, Mabalacat, Pampanga

• Robinsons Mall Terminal, San Fernando City, Pampanga

• Victory Liner Terminal, San Fernando City, Pampanga

• Bataan Transit Terminal, San Fernando City, Pampanga

• Genesis Terminal, San Fernando City, Pampanga

• Bus Stop in Mexico, Pampanga

Samantala, itinakda ang hearing kaugnay dito sa Mayo 10 via teleconference.

“Ang mga [public utility bus] operators ay natukoy ng LTFRB Region III na hindi nag-operate sa mga terminal sa Pampanga na nagdulot ng mahahabang pila ng libo-libong pasaherong hindi makabiyahe papunta ng Metro Manila noong ika-20 ng Abril... dahil sa kawalan ng pampublikong bus,” batay sa notice.

“Kasunod niyan ay inaatasang magbigay ng paliwanag ang anim na PUB operators dahil sa nangyaring insidente at kung bakit sila hindi nag-operate noong ika-20 ng Abril,” ayon pa sa notice.

Nitong Biyernes, sinabi ni MMDA Chairman Romando Artes na ang window hours policy ay mananatili alinsunod ito sa development plan ng gobyerno.

Maraming provincial bus operators ang naglimita ng kanilang operasyon sa gabi dahil sa bagong ipinatupad na window hour scheme, subalit nilinaw naman ng transport authorities na ang polisiya ay patungkol lamang sa paggamit ng mga private terminals sa loob ng Metro Manila.

Libreng sakay, aarangkada uli sa Abril 11 — LTFRB

ni Lolet Abania | April 9, 2022

Inianunsiyo ng Land Transportation Franchising and Regulatory Board (LTFRB) na ang service contracting program, kung saan kabilang dito ang libreng sakay sa mga pasahero, ay sisimulan na ulit sa Lunes, Abril 11, 2022.

“We are preparing for Monday implementation nationwide for the service contracting program pero hindi pa siguro lahat ng ruta, gradual pa lang, kasi nagko-complete pa naman ang ibang operators ng kanilang requirements din,” pahayag ni LTFRB Executive Director Maria Kristina Cassion sa isang interview ngayong Sabado.

Sa ilalim ng service contracting program ng LTFRB, ang mga public utility vehicle (PUV) operators at drivers na makikiisa sa free ridership program ng gobyerno ay makatatanggap ng isang one-time payout at weekly payments base sa bilang ng kilometro na ibiniyahe nila bawat linggo, may pasahero man sila o wala.

Ayon kay Cassion, ang ruta ng EDSA Bus Carousel ay kabilang sa mauunang ruta na may libreng biyahe sa Lunes.

Gayundin aniya, sa susunod na mga araw ay bubuksan ng LTFRB ang NLEX hanggang sa Metro Manila service route para sa free ridership program. Binanggit naman ng opisyal na ang service contracting program ay mayroong budget na P7 bilyon sa ilalim ng 2022 General Appropriations Act.

Sakop ng programa aniya, ang 1,000 ruta sa buong bansa na lalahukan ng 13,000 hanggang 15,000 units ng PUVs gaya ng modern at traditional jeepneys, bus at UV Express. Ayon pa kay Cassion, ang service contracting program ay tatagal ng 45 hanggang 60 araw depende ito sa rehiyon.

Gayunman, ang Metro Manila aniya ay tatagal ng 60 araw. Sinabi naman ng opisyal na ang service contracting program, katulad ng fuel subsidy program, ay nag-secure ng exemption mula sa Comelec sa gitna ng election public spending ban.