Libreng sakay sa jeep at bus hanggang Hulyo na lang — LTFRB

ni Lolet Abania | June 21, 2022

Magtatapos na ang libreng sakay sa ilang public utility jeepneys (PUJs) at buses sa Metro Manila sa ilalim ng service contracting program (SCP) ng gobyerno sa Hulyo, ayon sa Land Transportation Franchising and Regulatory Board (LTFRB) ngayong Martes.

Base sa datos mula sa LTFRB, nasa 146 National Capital Region (NCR) public utility jeepney (PUJ) cooperatives at mga korporasyon ang hihinto na sa pagbibigay ng free rides sa Hunyo 30.

“For the buses, Busway will end by July pa as well as Commonwealth Route 7 bus from Montalban to Quezon Avenue,” pahayag ni LTFRB Executive Director Tina Cassion sa mga reporters.

Noong Abril 11, nagsimula ang EDSA Busway Carousel sa pagbibigay ng free rides para sa mga commuters sa ilalim ng third phase ng service contracting program (SCP) ng Department of Transportation (DOTr).

Sa ilalim ng SCP, ang mga public utility vehicle (PUV) operators at drivers na lalahok sa free ridership program ng gobyerno ay makatatanggap ng one-time payout at weekly payments base sa bilang ng kilometro na kanilang biniyahe per week, may sakay man silang pasahero o wala.

Ang mga ruta para sa free ride program ng mga PUVs gaya ng modern at traditional jeepneys, UV Express, at mga bus ay pinalawig naman nationwide noong Abril.

Ayon sa DOTr, nabigyan ang programa ng P7-billion budget ng General Appropriations Act (GAA) of 2022, sakop nito ang inisyal na 515 buses mula sa 532 units na registered sa program.

Noong Mayo 25, inanunsiyo naman ng DOTr ang extension ng free rides sa Metro Rail Transit Line 3 (MRT3) hanggang Hunyo 30.

2nd tranche ng fuel subsidy, inihahanda na — LTFRB

ni Lolet Abania | June 11, 2022

Ipinahayag ng Land Transportation Franchising and Regulatory Board (LTFRB) na ang pamamahagi ng second tranche ng P5-billion fuel subsidy program para sa public utility vehicle (PUV) drivers at operators ay nakatakda sa huling linggo ng Hunyo o unang bahagi ng Hulyo.

Sa isang interview ngayong Sabado, sinabi ni LTFRB Executive Director Tina Cassion na inihahanda na ng ahensiya ang mga dokumento para sa distribusyon ng isa pang P6,500 fuel subsidy sa bawat benepisyaryo ng PUV sector.

Ayon kay Cassion, hanggang nitong nakaraang linggo mas mababa sa 5,000 lamang mula sa 377,000 benepisyaryo ang nakatanggap pa lang ng unang tranche ng fuel subsidy.

“[By] last week of June or early July [we’ll] implement the second tranche,” ani Cassion, kung saan aniya, ang mga benepisyaryo ng ikalawang tranche ay pareho sa mga nakatanggap na ng unang tranche.

Samantala, naglabas na rin ang LTFRB ng listahan ng mga benepisyaryong may credited fuel subsidy.

Mula sa hinating bahagi sa dalawang magkatumbas na tranches, ang P5-B fuel subsidy program ng gobyerno ay layong mag-extend ng P6,500 cash grants sa bawat 377,000 benepisyaryo, kabilang dito ang mga LTFRB-supervised PUV drivers at operators, tricycle drivers at operators sa ilalim ng Department of the Interior and Local Government (DILG), at delivery riders sa ilalim naman ng Department of Trade and Industry (DTI).

Ayon sa LTFRB, ang fuel subsidy program ay nagsisilbi bilang isang stopgap measure na kanilang tugon sa hinihinging dagdag sa minimum na pamasahe sa gitna ng pagtaas sa presyo ng produktong petrolyo.

Gayunman ani Cassion, nagpasya ang LTFRB na i-review ang nauna nilang desisyon na i-reject ang mga petisyon na P1 provisional minimum jeepney fare hike sa gitna ng walang humpay na pagtaas sa presyo ng petrolyo.

Nito lamang linggo, inaprubahan ng ahensiya ang P1 provisional increase sa minimum na pamasahe sa mga jeepney sa Metro Manila, Region 3 at Region 4.

P1 dagdag-pasahe sa jeepney, aprub ng LTFRB

ni Lolet Abania | June 8, 2022

Inaprubahan na ng Land Transportation Franchising and Regulatory Board (LTFRB) ngayong Miyerkules ang P1 provisional increase na pamasahe sa mga public utility jeepneys.

Ayon sa LTFRB, sakop ng taas-pasahe sa mga jeep na bumibiyahe sa Metro Manila, Region 3 at Region 4. Ito ay kasunod ng mga petisyon ng iba’t ibang transport organizations sa gitna ng walang prenong pagtataas ng presyo ng petrolyo.

Dahil dito, magiging P10 na ang minimum fare sa mga jeepney, kung saan epektibo ito bukas.