Dahil sa P13.3B siningil sa mga motorista — Ombudsman... Mendoza at Guadiz, suspendido

ni Jeff Tumbado @News | August 19, 2026

Photo: LTFRB Chairman Vigor Mendoza II at OTC Chairperson Teofilo Guadiz III - LTFRB / Office of Transportation Cooperatives

Iniutos ng Office of the Ombudsman ang anim na buwang preventive suspension na walang sweldo laban kina Land Transportation Franchising and Regulatory Board (LTFRB) Chairman Vigor Mendoza II at Office of Transportation Cooperatives (OTC) Chairperson Teofilo Guadiz III kaugnay ng mga kasong administratibo na nag-ugat sa kanilang panunungkulan bilang mga dating pinuno ng Land Transportation Office (LTO).

Ang suspension order na inilabas noong Agosto 18, 2026 ay may kaugnayan sa patuloy na paggamit ng lumang information technology (IT) system na pinapatakbo ng Stradcom kahit na naipatupad na ang kapalit nitong Land Transportation Management System (LTMS).

Ayon sa Ombudsman, may “malakas na ebidensya” na nagpapakita na maaaring managot sina Mendoza at Guadiz sa kasong grave misconduct at conduct prejudicial to the best interest of the service.

Batay sa Ombudsman, ang patuloy na sabayang paggamit ng Stradcom-operated system ay nagresulta sa karagdagang computer fees na tinatayang aabot sa P13.37 bilyon, na siningil sa mga motorista mula 2019 hanggang 2025.

Sentro ng kaso ang kabiguan na ganap na mailipat ang operasyon ng LTO sa LTMS, dahilan upang manatiling ginagamit ang lumang sistema kahit na naipatupad na ang bagong platform.

Ipinataw ng Ombudsman ang preventive suspension habang nagpapatuloy ang administrative proceedings.

Layunin ng hakbang na maiwasan ang posibleng impluwensya ng mga respondent sa mga testigo o panghihimasok sa imbestigasyon habang nilulutas ang kaso.

Dati nang nagsilbi sina Mendoza at Guadiz bilang mga pinuno ng LTO bago sila umupo sa kasalukuyang posisyon sa LTFRB at OTC, ayon sa pagkakasunod.

Samantala, sinabi naman sa isang pahayag ni Mendoza na iginagalang niya ang desisyon ng Ombudsman habang nangako namang ipagtatanggol ang kanyang mga naging hakbang at lilinisin ang kanyang pangalan.

Gayunman, sinabi ni Mendoza na hindi pa niya natatanggap ang kopya ng opisyal na kautusan ng Ombudsman.

9 UV Express, luma, marumi, mabaho, huli

ni Jeff Tumbado @News | August 16, 2026

Photo: LTFRB

Nasa siyam na UV Express ang hinuli ng Land Transportation Franchising and Regulatory Board (LTFRB) dahil sa umano’y luma, marumi, mabaho at hindi komportableng kondisyon ng kanilang mga sasakyan na ipinapangpasada.

Batay sa isinagawang operasyon, karamihan sa mga nahuli ay bumibiyahe sa mga rutang Bulacan-Metro Manila.

Isinagawa ang operasyon matapos mag-deploy ang LTFRB ng mystery riders noong August 12 para aktuwal na masuri ang kondisyon at serbisyo ng mga UV Express.

Kabilang sa mga reklamo ng mga pasahero ang mahina o hindi maayos na air-conditioning, kupas na mga marking at hindi magandang amoy sa loob ng mga sasakyan.

Dahil dito, naglabas ang LTFRB ng Show Cause Order (SCO) laban sa siyam na operator.

Inaatasan silang magpaliwanag kung bakit hindi dapat suspendihin o bawiin ang kanilang prangkisa dahil sa kabiguang magbigay ng maayos at komportableng serbisyo sa mga pasahero.

Ayon kay LTFRB Chairman Atty. Vigor Mendoza, hindi na dapat pinapayagang bumiyahe ang mga dilapidated, marumi at mabahong PUV.

Hindi lamang UV Express ang target ng LTFRB. Kasama rin sa pinaigting na inspeksyon ang mga taxi, bus, jeepney at ride-hailing vehicles.

Hinimok naman ng LTFRB ang mga commuter na i-report ang mga PUV na hindi maayos ang kondisyon, pati na ang mga abusado o lumalabag na driver, sa LTFRB hotline 1342 o sa official social media accounts ng ahensya.

May dagdag-pasahe pa — LTFRB... P20/litro ayuda sa petrolyo

ni Mervin Reyes @News | August 4, 2026

Photo: Senate of the Philippines / File

Inihayag ng Land Transportation Franchising and Regulatory Board (LTFRB) na magsusumite ito ng rekomendasyon para sa pansamantalang dagdag-pasahe sa lahat ng public utility vehicles (PUVs) habang dinidinig pa ang mga petisyon para sa fare hike.

Ayon kay LTFRB Chairperson Vigor Mendoza, kasalukuyang kinukuwenta ng ahensya ang posibleng provisional fare increase batay sa mga datos na iniharap ng iba't ibang transport groups sa isinagawang pagdinig.

Bukod dito, isinumite na rin ng LTFRB sa Malacañang ang rekomendasyon para sa P20 kada litrong fuel subsidy para sa lahat ng PUV sa loob ng isang buwan, na mangangailangan ng tinatayang P4.5 bilyong pondo.

“I think there will be some decisions within the week... nakikita natin 'yung urgency ng mga 'to,” dagdag niya.

Sinabi rin ni Mendoza na halos pitong porsyento na lamang ng pondo para sa kasalukuyang P10 fuel subsidy ang natitira at inaasahang tatagal hanggang Agosto 15.

Pinag-aaralan din ng LTFRB ang iba't ibang opsyon depende sa uri ng pampublikong sasakyan, kabilang ang kombinasyon ng fuel subsidy at fare increase. 

Nakikipagpulong din ang ahensya sa mga bangko upang matugunan ang mga suliranin sa pagbabayad ng utang ng mga PUV operator.