Libreng sakay para sa mga babaeng pasahero ng LRT2, bukas

ni Lolet Abania | March 7, 2022

Libre ang sakay para sa mga pasaherong babae ng Light Rail Transit Line 2 (LRT-2) habang may special treats sa kanila bukas, Marso 8, kasabay ng pagdiriwang ng International Women’s Day.

Ang free ride ay magagamit ng mga female passengers sa peak hours, mula alas-7:00 ng umaga hanggang alas-9:00 ng umaga at alas-5:00 ng hapon hanggang alas-7:00 ng gabi sa anumang LRT-2 station.

Magsasagawa rin ang Department of Transportation (DOTr) at Light Rail Transit Authority (LRTA) katuwang din ang Philippine Red Cross-Marikina at Manila chapters ng blood typing test, blood pressure checking, at random blood sugar test sa Recto at Araneta Center-Cubao stations mula alas-8:00 ng umaga hanggang alas-5:00 ng hapon.

“These activities aim to honor and recognize the indispensable role of women in our society as well as reaffirm DOTR and LRTA’s commitment to gender equality and women empowerment,” sabi ni LRTA administrator Jeremy Regino.

Sinisiguro ng LRTA, sa pamamagitan ng Gender and Development Committee (GAD) nito, na may probisyon ng gender-responsive rail services para sa lahat ng mga mananakay sa pamamagitan ng kanilang mga proyekto, programa at mga serbisyo gaya ng pagsasagawa ng iba’t ibang pagsasanay na layong madagdagan ang kamalayan ng mga empleyadong babae sa kanilang mga karapatan at mabatid ang kanilang potensiyal bilang isang active agent ng societal change.

Ang 2022 National Women’s Month Celebration, na may temang “We Make Change Work for Women,” ay layong maipakita ang mga nakakamit at napagtagumpayan ng mga babae, at suriin ang mga ginagawang aksyon tungo sa gender equality, habang patuloy na isinusulong ang mga gawain para sa tinatawag na women empowerment.

3 istasyon ng LRT2, balik-operasyon na

ni Lolet Abania | January 20, 2021

Balik-operasyon na ang Santolan, Katipunan at Anonas Stations ng Light Rail Transit 2 (LRT2) ngayong linggo matapos ang isang taong suspensiyon nito.

Ayon sa LRT2 spokesperson na si Atty. Hernando Cabrera, natapos na ng kanilang contractor at engineering department ang paglalagay ng temporary power facilities para sa mga istasyon. Matatandaan noong October, 2019, sinuspinde ang operasyon ng tatlong istasyon matapos na ang power rectifier sa Katipunan area ay masunog at mawalan ng power supply ang mga tren. “Natapos na kasi natin 'yung temporary power facilities natin na ginawa ng ating contractor at ating engineering department para maibalik natin agad 'yung operasyon nitong tatlong istasyon,” sabi ni Cabrera.

Sinabi noon ni Cabrera na ang rehabilitasyon nito ay hindi tatagal ng siyam na buwan dahil mayroon at agad naihanda ang ilang spare parts na kailangan.

Nagsagawa na rin ng testing sa tatlong istasyon upang masigurong ligtas na gamitin bago ibalik ang serbisyo at operasyon ng mga tren.

“Kailangan nating i-test naman ang ating mga tren, ‘yung takbo nila. I-prepare na rin natin 'yung mga staff, 'yung ating personnel sa ticketing, sa security, sa maintenance para makuha natin 'yung tinatawag nating safety clearance,” ani Cabrera.

“Ang target natin makuha natin within the week ‘yung tinatawag natin na safety clearance. Within the week din mabalik natin ang operasyon na kasama na 'yung mga pasahero,” dagdag niya.

Gayunman, dahil sa gagamit lang ang mga istasyon ng temporary power supply, ayon kay Cabrera, mabagal ang magiging takbo ng mga tren at matagal ang interval ng bawat biyahe ng mga ito.

“Kailangan mong i-balance o i-maintain, bantayang mabuti 'yung number of trains na nandito sa segment na ito, magmula Anonas hanggang Santolan,” paliwanag niya.

“Kasi kapag nasobrahan mo ‘yung tren na nandito sa loob ng segment na 'yun, puwedeng maiwasan 'yung power tripping nu’ng ating sistema,” sabi pa niya.

Ayon kay Cabrera, ipapatupad pa rin ang mga health protocols sa mga istasyon gaya ng physical distancing, pagsusuot ng face masks at face shields at temperature checks para maiwasan ang pagkalat ng COVID-19.