LRT1, LRT2, MRT3, PNR, walang taas-pasahe — DOTr

ni Lolet Abania | March 17, 2022

Walang pagtataas ng pamasahe sa mga railway lines sa bansa gaya ng LRT1, LRT2, MRT3, PNR sa kabila ng patuloy na pagsirit sa presyo ng mga produktong petrolyo, ayon sa Department of Transportation (DOTr).

“Maigting na paalala, instruction ni [Transportation] Secretary [Arthur] Tugade na walang inaasahan at walang pinaplano na pagtaas-pasahe sa linya ng ating mga tren,” pahayag ni DOTr Undersecretary for Railways Timothy John Batan sa Laging Handa briefing ngayong Huwebes.

“Alam natin na may pagtaas ng presyo sa langis na maaaring makaapekto sa presyo ng ating mga ibang bilihin, kung kaya’t sinisiguro natin… na sa sektor ng riles walang kinokonsidera na taas pasahe,” giit ni Batan.

Sa ulat, ang presyo ng mga produktong petrolyo ay tumaas ng 11 magkakasunod na linggo simula pa lamang ng taon, kung saan umabot ang year-to-date adjustments para sa diesel sa net increase ng P30.65 kada litro, gasoline ng P20.35 kada litro, at kerosene ng P24.90 kada litro.

Gayunman, naglabas na ang gobyerno ng pondo para sa fuel subsidies sa parehong public transportation at agriculture sectors upang makaiwas sa anumang tinatawag na inflationary impact dahil sa pagtaas ng presyo ng langis.

Signaling system upgrade ng LRT1, oks na – LRMC

ni Lolet Abania | February 1, 2022

Ipinahayag ng Light Rail Manila Corp. (LRMC), ang private operator ng Light Rail Transit Line 1 (LRT-1), na natapos na nila ang pag-upgrade ng signaling system ng naturang railway system.

Sa isang statement na inilabas ng LRMC, sinabi nito na ang completion ng pag-upgrade ng signaling system ng LRT1 sa Alstom ay naging posible matapos ang sunud-sunod na test runs at trial runs noong Nobyembre 28, 2021, Enero 23, 2022, at Enero 30, 2022.

Ayon sa kumpanya, nag-adopt ang LRT-1 ng tinatawag na advanced communication at modernong technolohiya upang patuloy na kontrolin at i-monitor ang operasyon ng kanilang mga tren.

“The upgrading of signaling system will improve capacity and performance across the line, enabling more trains with better connections and greater reliability,” pahayag ng LRMC.

Gayundin, sinabi ng kumpanya na ang bagong signaling system sa kahabaan ng umiiral nang linya – ang Baclaran hanggang Balintawak Station – ang magpa-facilitate ng testing, commissioning, at operasyon para sa revenue service ng ikaapat na henerasyon nang train sets, kung saan target na simulan ito sa kalagitnaan ng 2022.

“We are happy to inform you that we have reached another milestone at LRMC as we have successfully migrated to the new Alstom signaling system. We have carefully planned these works to also improve the total traffic control system of LRT-1 while the operation was suspended on three Sundays,” sabi ni LRMC chief operating officer Enrico Benipayo.

“We would like to thank our passengers for their understanding and patience as this initiative will surely result to a more modern and reliable system at LRT-1,” ani pa ni Benipayo.

LRT-1, may special train schedule sa Disyembre 24 at 31

ni Jasmin Joy Evangelista | December 21, 2021

Nag-abiso ang LRT-1 private operator Light Rail Manila Corporation (LRMC) sa mga commuter na nakatakdang paikliin ang operating hours ng tren sa bisperas ng Pasko at Bagong Taon.

Sa inilabas na abiso ng Light Rail Manila Corporation (LRMC), sa December 24 o Christmas Eve, ang last trip mula sa Baclaran Station ay aalis ganap na 8:15 p.m. mula sa dating 9:15 p.m. na departure sa regular weekends/holiday schedule.

Sa December 31 naman, ang last trip mula sa Baclaran Station ay aalis ganap na 7:00 p.m. at ang last train mula Balintawak Station ay aalis nang 7:15 p.m.

Magsisimula naman ang operasyon ng LRT-1 sa mga nasabing petsa ng alas-4:30 ng madaling araw.

Nilinaw din ng pamunuan na mananatili ang operasyon ng tren sa December 25, December 30, at January 1 alinsunod pa rin sa schedule ng regular weekends/holiday.

Samantala, mananatili pa rin na pansamantalang suspendido ang operasyon sa Roosevelt Station upang magbigay-daan sa isinasagawang Unified Grand Central Station na magko-connect sa mga istasyon ng LRT-1, MRT (Metro Rail Transit System)-3, at MRT-7.