LRT1 at LRT2, may libreng sakay sa Araw ng Kalayaan

ni Lolet Abania | June 10, 2022

May libreng sakay para sa mga commuters na ipapatupad ang Light Rail Transit Lines 1 (LRT1) at LRT2 sa Hunyo 12, kasabay ng pagdiriwang ng bansa sa ika-124 Araw ng Kalayaan.

Sa isang statement ngayong Biyernes, ayon sa Light Rail Manila Corp. (LRMC), ang private operator ng LRT1, ang mga pasahero ng railway line ay mabibigyan ng free rides sa Hunyo 12, mula alas-7:00 ng umaga hanggang alas-9:00 ng umaga at mula alas-5:00 ng hapon hanggang alas-7:00 ng gabi.

Ayon sa LRMC, ang mga beep card holders ay kailangang dumaan sa karaniwang Automated Fare Collection System (AFCS) gates at i-tap lamang ang kanilang cards upang ma-avail ang libreng sakay at wala itong charge, habang ang mga pasahero na walang beep cards ay maaaring kumuha nang libre ng single journey tickets mula sa LRT1 teller booths.

Sinabi rin ng kumpanya na ang LRT 1 ay magpapatuloy sa kanilang normal operating hours sa Araw ng Kalayaan, kung saan ang first trips na parehong aalis mula sa Baclaran at Balintawak stations ay alas-4:30 ng madaling-araw habang ang last trips naman ay alas-9:15 ng gabi sa Baclaran Station at alas-9:30 ng gabi sa Balintawak Station.

Inanunsiyo rin ng Light Rail Transit Authority (LRTA) na ang free rides ay ipapatupad sa LRT2 mula alas-7:00 ng umaga hanggang alas-9:00 ng umaga at mula alas-5:00 ng hapon hanggang alas-7:00 ng gabi.

Patuloy naman ang MRT3 na nagpapatupad ng free rides para sa buong buwan ng Hunyo upang makabawas sa pinansiyal na pasanin ng mga commuters sa gitna ng nararanasang pagtaas sa presyo ng produktong petrolyo.

LRT1, suspendido ang biyahe mula Holy Thursday hanggang Easter Sunday

ni Lolet Abania | April 6, 2022

Suspendido ang operasyon ng Light Rail Transit Line 1 (LRT1) mula Abril 14 hanggang 17 dahil sa annual maintenance nito, ayon sa Light Rail Manila Corporation (LRMC) ngayong Miyerkules.

“LRMC is set to conduct its annual maintenance activities to continuously provide safe and reliable transportation system. There will be a temporary suspension of LRT1 operations from 14 April (Maundy Thursday) to 17 April 2022 (Easter Sunday),” pahayag ng LRMC sa isang Facebook post.

Para sa kanilang natitirang Holy Week schedule, ayon sa LRMC, patuloy ang kanilang regular operating hours, kung saan ang first train ay bibiyahe ng alas-4:30 ng madaling-araw mula Abril 11 hanggang 13.

Ang last train naman mula Baclaran Station ay mag-o-operate ng alas-9:15 ng gabi, habang sa Balintawak Station ay hanggang alas-9:30 ng gabi.

Magbabalik sa normal operating hours ang LRT1 sa Abril 18.

Una nang nag-anunsiyo ang Metro Rail Transit Line 3 (MRT3) management na ang kanilang train operations ay suspendido mula Abril 13 hanggang 17 para magbigay-daan sa kanilang annual maintenance at ang normal operations ay magpapatuloy sa Abril 18.

LRT1, LRT2, MRT3, PNR, walang taas-pasahe — DOTr

ni Lolet Abania | March 17, 2022

Walang pagtataas ng pamasahe sa mga railway lines sa bansa gaya ng LRT1, LRT2, MRT3, PNR sa kabila ng patuloy na pagsirit sa presyo ng mga produktong petrolyo, ayon sa Department of Transportation (DOTr).

“Maigting na paalala, instruction ni [Transportation] Secretary [Arthur] Tugade na walang inaasahan at walang pinaplano na pagtaas-pasahe sa linya ng ating mga tren,” pahayag ni DOTr Undersecretary for Railways Timothy John Batan sa Laging Handa briefing ngayong Huwebes.

“Alam natin na may pagtaas ng presyo sa langis na maaaring makaapekto sa presyo ng ating mga ibang bilihin, kung kaya’t sinisiguro natin… na sa sektor ng riles walang kinokonsidera na taas pasahe,” giit ni Batan.

Sa ulat, ang presyo ng mga produktong petrolyo ay tumaas ng 11 magkakasunod na linggo simula pa lamang ng taon, kung saan umabot ang year-to-date adjustments para sa diesel sa net increase ng P30.65 kada litro, gasoline ng P20.35 kada litro, at kerosene ng P24.90 kada litro.

Gayunman, naglabas na ang gobyerno ng pondo para sa fuel subsidies sa parehong public transportation at agriculture sectors upang makaiwas sa anumang tinatawag na inflationary impact dahil sa pagtaas ng presyo ng langis.