Simula sa Marso 23... 50% discount sa MRT, LRT

by Mai Ancheta @News | March 20, 2026

Photo: File / DOTr-MRT

Inanunsyo ng Department of Transportation (DOTr) na magkakaroon ng 50% discount sa pamasahe sa mga tren ng Metro Rail Transit Line 3 (MRT-3) at Light Rail Transit Line 2 (LRT-2), simula sa Marso 23, 2026.

Alinsunod umano ito sa direktiba ni Pangulong Ferdinand Marcos, Jr. na pagaangin ang pasanin ng mga pasahero sa gitna ng taas-presyo ng langis dulot ng gulo sa Middle East.

Ang 50% discount sa MRT-3 at LRT-2 ay maaaring awtomatikong makuha ng mga may hawak ng asul na Beep card.

Para naman sa mga sasakay gamit ang single journey tickets, ang pamasahe ay awtomatikong mababawasan ng 50% sa bayad.

Bukod dito, mananatili pa rin ang 50% diskwento na tinatamasa ng mga may hawak ng puting Beep card—kabilang ang mga senior citizen, persons with disabilities (PWD), at mga estudyante.

Sinabi ng DOTr na mananatili ang diskwento sa pamasahe sa MRT-3 at LRT-2 hanggang sa susunod na ilalabas na abiso. 

Operasyon ng LRT, balik-normal na

ni Madel Moratillo @News | August 27, 2023

Balik na ulit sa normal ang operasyon ng LRT Line 1 na biyaheng Baclaran (Parañaque)-Fernando Poe Jr. Station (Quezon City) vice versa.

Sa isang advisory, sinabi ng Light Rail Manila Corporation na nakumpleto na ang track inspection kasama na ang operational test at safety clearance.

Ayon sa LRMC, walang pagbabago sa regular na service schedule ng tren sa kanilang last trip.

Ang huling biyahe ng tren mula sa Baclaran station ay alas-9:30 ng gabi, habang sa Fernando Poe Jr. Station ay alas-9:45 ng gabi.

Matatandaang noong Agosto 20, nagkaroon ng limitado at half day operations ang LRT 1 dahil sa system upgrade. Nagpasalamat naman ang pamunuan ng LRMC sa pang-unawa ng kanilang mga mananakay.

Roosevelt sa LRT-1, FPJ Station na

ni Mylene Alfonso @News | August 20, 2023

Papalitan na ang Roosevelt Station sa Light Rail Transit (LRT) Line 1 at isusunod na sa pangalan ng yumaong si Fernando Poe, Jr. (FPJ).

Pangungunahan ni Senador Grace Poe, anak ng kilalang personalidad, ang renaming rites, kasama sina dating Senate President Vicente "Tito" Sotto III at Sen. Lito Lapid, alas-10 ng umaga.

"I hope people remember FPJ whenever they board this train. Public service has always been in FPJ's heart. Giving commuters a safe and comfortable ride is a way of keeping his legacy alive," wika ni Poe sa isang pahayag.

Kaugnay nito, pasisinayaan din ang bagong marker para sa screen icon, na 84-taong gulang na sana ngayong araw, maging ang pop-up exhibit para kay FPJ sa event.

Ayon kay Poe, dadalo rin sina Transportation Secretary Jaime Bautista at LRT Management Corporation president at CEO Juan Alfonso sa event.

Nabatid na makalipas ang isang taon nang lagdaan ni dating Pangulong Rodrigo Duterte ang batas na nagpapalit ng pangalan ng Roosevelt Avenue sa Quezon City sa ngalan ng pumanaw na Filipino screen icon.

Matatandaang bumida si FPJ sa mahigit 300 pelikula, sa kanyang 46 taon sa entertainment industry. Dahil dito, kinilala siya bilang “King of Philippine Movies".

Matatagpuan ang dating tahanan ng National Artist sa kahabaan ng 2.9-kilometer Roosevelt Avenue, sa pagitan ng EDSA at Quezon Avenue.