2 LPA, namataan sa Batanes at Eastern Samar

ni Lolet Abania | September 5, 2021

Dalawang low pressure area (LPA) ang namataan sa Philippine Area of Responsibility (PAR) ngayong Linggo, ayon sa PAGASA. Sa 24-oras na forecast ng PAGASA, ang isa sa LPAs ay nasa layong190 kilometro kanluran timog-kanluran ng Basco, Batanes ng alas-3:00 ng hapon, habang ang isa pang LPA ay nasa layong 465 kilometro silangan ng Guiuan, Eastern Samar.

Ayon sa PAGASA, madudulot ang LPA ng maulap na papawirin na may kalat-kalat na pagbuhos ng ulan at thunderstorms sa buong Eastern Visayas, Caraga, Batanes at Babuyan Islands.

Samantala, ang Metro Manila at ang natitirang bahagi ng bansa ay makararanas ng bahagyang maulap hanggang sa maulap na papawirin na may kasamang pulo-pulong pag-ulan sanhi ng localized thunderstorms.

Paalala ng PAGASA ang mga apektadong residente na paghandaan ang posibleng flash floods o landslides habang nakararanas ng matinding thunderstorms. Gayundin, mahina hanggang sa katamtamang bugso ng hangin at bahagya hanggang sa katamtamang coastal water conditions ang mararanasan sa buong bansa.

LPA, namataan sa Northern Luzon

ni Lolet Abania | June 20, 2021

Namataan ang isang low pressure area (LPA) na nasa 1,285 kilometro silangan hilagang-silangan ng extreme northern Luzon ngayong Linggo, ayon sa Philippine Atmospheric, Geophysical and Astronomical Services Administration (PAGASA). Sa 24-hour forecast ng PAGASA, ang LPA ay namataan bandang alas-3:00 ng hapon.

“Wala itong direktang epekto sa anumang bahagi ng ating bansa at maliit ang tsansang maging bagyo, subalit patuloy tayong magmo-monitor at magbibigay ng update dito,” ayon sa video report ng meteorologist na si Chris Perez ng weather bureau ngayong alas-4:00 ng hapon.

Ayon pa sa PAGASA, ang Southwest Monsoon ay magdadala ng mga pag-ulan sa buong Northern at Central Luzon. Makararanas naman ng maulap na papawirin na may kalat-kalat na pag-ulan at thunderstorms sa buong Ilocos Region at mga lalawigan ng Zambales, Bataan, Occidental Mindoro, at Palawan dahil din sa Southwest Monsoon.

Paalala ng PAGASA sa mga residente na maging handa sa posibleng flash floods o landslides sanhi ng katamtaman at kung minsan ay malalakas na buhos ng ulan.

Ang Metro Manila at natitirang bahagi ng bansa ay bahagyang maulap hanggang sa maulap na papawirin na may kasamang pulu-pulong pag-ulan dahil sa Southwest Monsoon o localized thunderstorms. Ayon sa PAGASA, posibleng magkaroon ng flash floods o landslides dahil sa severe thunderstorms.

Makararanas din ang Northern at Central Luzon ng katamtaman hanggang sa malakas na bugso ng hangin at katamtaman hanggang sa maalong kondisyon ng coastal water.

Mahina hanggang sa katamtamang bugso ng hangin habang mahina hanggang katamtamang mga pag-alon ang mararanasan sa natitirang bahagi ng bansa.

Eastern Visayas, Bicol atbp, uulanin

ni Ronalyn Seminiano Reonico | February 10, 2021

Inaasahang makararanas ang Eastern Visayas, Bicol Region, CALABARZON, Oriental Mindoro, Marinduque, Romblon, at Aurora ng katamtaman hanggang sa malakas na pag-ulan na dulot ng binabantayang low pressure area (LPA) at ang tail-end ng isang frontal system, ayon sa PAGASA.

Huling namataan ang LPA sa layong 125 km sa silangan ng Catarman, Northern Samar at nagbabala rin ang PAGASA sa posibleng pagbaha at landslides.

Samantala, inaasahan din ang pag-ulan sa Metro Manila, Cagayan Valley, Cordillera Administrative Region, at iba pang bahagi ng Central Luzon dahil sa hanging amihan.