LPA magdudulot ng pag-ulan sa Kalayaan Islands

ni Jasmin Joy Evangelista | March 30, 2022

Inaasahang magdudulot ng pag-ulan sa Kalayaan Islands ngayong Miyerkules ang low-pressure area o LPA sa kanluran-hilagang kanluran ng Puerto Princesa City ayon sa latest forecast ng Philippine Atmospheric, Geophysical and Astronomical Services Administration (Pagasa).

Gayunman, patuloy namang makararanas ng mainit na panahon ang mga natitirang bahagi ng bansa.

“Sa Kalayaan Islands, asahan pa rin ang mga kalat-kalat na pag-ulan dulot ng LPA,” ani Pagasa weather specialist Samuel Duran.

Ayon pa sa state weather service, namataan ang LPA 235 kilometro kanluran-hilagang kanluran ng Puerto Princesa o 295 kilometro silangan ng Pagasa Island.

Inaasahang lalabas ang LPA sa Philippine Area of Responsibility sa susunod na 24 oras.

“Samantalang ang nalalabing bahagi ng Luzon ay makakaranas pa rin ng maalinsangang panahon na may mga tiyansa ng thunderstorms pagdating ng hapon at gabi,” ani Duran.

Ang mga parte naman ng Visayas at Mindanao ay makararanas ng mainit na panahon, ayon sa Pagasa, bagama’t posible ring makaranas ng panaka-nakang pag-ulan sa tanghali o gabi, dala ng epekto ng easterlies.

Naglabas din ang Pagasa ng temperature sa mga sumusunod na lugar:

• Metro Manila: 25 to 34 degrees Celsius

• Baguio City: 17 to 25 degrees Celsius

• Laoag City: 25 to 33 degrees Celsius

• Tuguegarao: 23 to 34 degrees Celsius

• Legazpi City: 25 to 32 degrees Celsius

• Puerto Princesa City: 25 to 31 degrees Celsius

• Tagaytay: 23 to 30 degrees Celsius

• Kalayaan Islands: 25 to 30 degrees Celsius

• Iloilo City: 26 to 32 degrees Celsius

• Cebu: 24 to 32 degrees Celsius

• Tacloban City: 26 to 32 degrees Celsius

• Cagayan De Oro City: 24 to 30 degrees Celsius

• Zamboanga City: 25 to 33 degrees Celsius

• Davao City: 25 to 34 degrees Celsius

Wala namang itinaas na gale warning sa lahat ng seaboards sa bansa, ayon sa bulletin ng Pagasa as of 4 p.m. nitong Martes.

LPA, namataan sa Davao City — PAGASA

ni Lolet Abania | March 27, 2022

Isang low pressure area (LPA) ang namumuo kasabay ng Intertropical Convergence Zone (ITCZ), kung saan magdudulot ng maulap na papawirin na may kalat-kalat na pagbuhos ng ulan at thunderstorms sa buong Palawan, Eastern at Central Visayas, at Mindanao, batay sa ulat ng PAGASA ngayong Linggo.

Sa kanilang 4PM weather bulletin, ayon sa PAGASA ang LPA ay namataan sa layong 60 km east-northeast ng Davao City.

Gayunman, sinabi ng PAGASA, ang tsansa ng LPA na maging isang tropical depression ay napakababa. Makararanas naman ng bahagyang maulap hanggang sa maulap na papawirin na may isolated rain showers at thunderstorms sa buong Metro Manila at sa natitirang bahagi ng bansa.

Batay din sa weather bureau, posibleng magkaroon ng mga flash floods o landslides sa severe thunderstorms. Mahina hanggang sa katamtamang bugso ng hangin mula timog-silangan patungong hilagang-silangan ang mararanasan sa buong northern Luzon, na magdudulot ng bahagya hanggang sa moderate coastal waters.

Ang natitirang bahagi ng bansa ay makararanas ng mahina hanggang sa katamtamang east-to-northeast wind flow, na magdudulot ng mahina hanggang sa moderate coastal waters. Ayon pa sa PAGASA, ang maximum temperature ay nasa 33.4 °C nitong alas-3:00 ng hapon at ang minimum temperature ay nasa 25.2 °C ng alas-5:15 ng hapon.

LPA, magdudulot ng pag-ulan sa Visayas, Caraga at Davao Region — PAGASA

ni Lolet Abania | March 5, 2022

Huling namataan ang isang low pressure area (LPA) na nasa layong 540 kilometro silangan ng Surigao City bandang alas-3:00 ng hapon ngayong Sabado, ayon sa PAGASA.

Batay sa 24-hour weather forecast ng PAGASA, inaasahang magdudulot ang LPA ng maulap na papawirin na may kalat-kalat na pag-ulan sa bahagi ng Visayas, Caraga, at Davao Region.

Ayon sa PAGASA, makararanas din ang Central Visayas at Eastern Visayas, maging ang Caraga at Davao regions ng maulap na papawirin na may kalat-kalat na pagbuhos ng ulan at thunderstorms na posibleng may kasamang flash floods o landslides dahil sa katamtaman hanggang sa malakas na mga pag-ulan dulot ng LPA.

Makararanas naman ang Metro Manila at ang natitirang bahagi ng bansa ng bahagyang maulap hanggang sa maulap na papawirin na may pabugsu-bugsong pag-ulan o thunderstorms dahil sa easterlies o localized thunderstorms na posibleng may kasamang flash floods o landslides sa severe thunderstorms.

Sa wind speed forecast naman ng PAGASA para sa Northern Luzon ay mahina hanggang sa katamtaman habang ang coastal water conditions ay bahagya hanggang sa katamtaman.

Ang natitirang bahagi ng bansa ay makararanas ng mahina hanggang sa katamtamang wind speed at bahagya hanggang sa katamtamang coastal water conditions.