110 pamilya inilikas dahil sa pagguho ng bundok

ni Lolet Abania | November 19, 2020

Nasa 110 pamilya ang inilikas at pansamantalang naninirahan sa eskuwelahan dahil sa pangambang muling gumuho ang lupa mula sa bundok sa isang barangay sa Baggao sa Cagayan.

Ayon kay Mayor Joan Dunuan, nagpatupad na sila ng forced evacuation sa mga residente ng Barangay Taytay dahil posible na tuluyang gumuho ang bundok, kung saan una nang nagkaroon ng landslide matapos ang pananalasa ng Bagyong Ulysses.

“May crackings na po at unti-unti nang pabagsak 'yung bundok, ‘yung lupa so, kailangan silang i-relocate,” sabi ni Dunuan.

Gayunman, dinala ang mga evacuees sa eskuwelahan dahil sa walang evacuation center ang nasabing bayan.

“Hirap din po ako doon sa 110 families, 362 family members, kailangang mabigyan ng tulong din kahit papaano higit lalo po 'yung malilipatang bahay siguro o livelihood po,” sabi niya.

Plano rin ng alkalde na magkaroon ng livelihood program para sa mga apektadong residente nang sa gayon ay hindi na sila bumalik pa at manirahan sa bundok upang magtanim ng mais.

“Sira lahat ng pangkabuhayan nila, umaapela po ako sa national government ng livelihood (program) para sa nawalan ng bahay,” sabi ni Dunuan.

“May apat kaming namatay dahil sa pagbagsak ng bundok, natabunan ang kanilang bahay. Nakatira kasi sila sa foot ng bundok, ‘di nila sukat akalain, mga ala-1 (ng madaling-araw) bumagsak 'yung bundok at sila ‘yung nabagsakan, natabunan,” sabi ni Dunuan patungkol sa naunang insidente.

Labis naman ang pasasalamat ng lokal na pamahalaan ng Baggao sa mga naghatid ng tulong sa mga residente ng kanilang bayan matapos ang Bagyong Ulysses.

Zero COVID-19 case sa mga evacuees — DOH

ni Lolet Abania | November 18, 2020

Wala ni isang evacuee ang nagpositibo sa test sa COVID-19, ayon sa Department of Health (DOH).

Ito ang inanunsiyo ni DOH Usec. Maria Rosario Vergeire matapos na magsagawa ang gobyerno ng antigen COVID-19 test sa lahat ng nagsilikas lalo na ang mga nakitaan ng sintomas ng COVID-19.

Nagbigay din sa mga evacuees ng medical at mental health assistance dahil sa epekto ng sunud-sunod na bagyo habang may pandemya.

“Wala pa po sa ating mga evacuees ang nagpositibo sa COVID-19. Makakaasa po kayo na patuloy naming imo-monitor ang ating mga evacuees at sisiguraduhin natin na oobserbahan nila ang minimum health standards habang sila [ay] displaced,” sabi ni Vergeire sa isang online forum.

“Priority po natin [sa testing] 'yung may sintomas. Kung may nararamdaman po ang ating mga kababayan sa evacuation centers, puwede po kayong pumunta sa mga health and safety officers sa evacuation centers para kayo ay mabigyan ng lunas,” dagdag ng kalihim.

Bukod sa testing, nag-deploy din ang ahensiya ng Health Emergency Response Teams sa mga lugar na tinamaan ng bagyo para magsagawa ng COVID-19 surveillance, medical, sanitation at mental/psychosocial support sa mga evacuees.

“We have also provided supplementary ready to eat food as well as medicines such as ferrous sulfate and calcium carbonate,” sabi ni Vergeire.

Aniya pa, base sa Department of Social Welfare and Development (DSWD) records, ang bilang ng mga nagsilikas na naitala noong November 18 ay umabot sa 55,921 pamilya o 223,378 indibidwal na nananatili sa 1,570 evacuation centers sa Regions 2, 3, 4A, 5 at National Capital Region (NCR).

Immigration airport staff, bawal mag-leave simula Disyembre

ni Lolet Abania | November 18, 2020

Naglabas ng anunsiyo ang Bureau of Immigration (BI) ngayong Miyerkules para sa lahat ng kanilang airport personnel kung saan hindi papayagang mag-on leave simula December ang mga ito dahil nais tiyakin ng ahensiya na mabibigyang serbisyo ang mga travelers lalo na’t paparating ang holiday season.

Sa isang statement ni Immigration Commissioner Jaime Morente, binanggit niyang lahat ng BI port personnel ay hindi maaaring magsumite ng kanilang vacation leave mula December 1 hanggang January 15, 2021.

Kabilang sa hindi papayagan munang magbakasyon na Immigration personnel ay mga nakatalaga sa Ninoy Aquino International Airport, airports ng Mactan Cebu, Clark, Pampanga; Kalibo, Iloilo, Davao at Laoag; at Zamboanga international seaport, ayon kay BI Port Operations Division Chief Candy Tan.

“Thus, we are confident that the number of Immigration officers currently deployed at the ports are enough to facilitate the efficient conduct of immigration formalities for arriving and departing passengers,” ani Morente.

Inaasahan naman ng BI na kakaunti ang mga darating na pasahero hanggang sa matapos ang taon dahil sa matinding epekto ng pandemya ng COVID-19 sa industriya ng turismo sa buong mundo.

Ayon sa Immigration records, nasa 3.5 milyong pasahero lamang ang dumating mula January hanggang September, kung saan napakababa kumpara sa halos 13 milyong travelers na pumasok sa bansa sa parehong panahon noong nakaraang taon.