Singil sa tubig, bababa sa 2021

ni Lolet Abania | December 2, 2020

Para sa mga kostumer ng Maynilad Water Services, Inc. at Manila Water Company, Inc. asahan ang pagbaba ng mga bayarin sa water bill sa unang tatlong buwan ng 2021, kasabay ng pag-apruba ng Metropolitan Waterworks and Sewerage System (MWSS) ng isang quarterly adjustment para sa mga water distribution utilities.

Ngayong Miyerkules, nagpalabas ng anunsiyo ang MWSS Regulatory Office (RO) kung saan inaprubahan ng MWSS Board of Trustees ang rekomendasyong ipatupad sa first quarter ng 2021 ang foreign currency differential adjustment (FCDA) na magiging epektibo sa January 1, 2021, base ito sa naging pagsusuri sa FCDA proposals ng mga concessionaries.

Ang FCDA ay isang mekanismo na responsable sa accounts ng foreign exchange losses o gains na nakukuha mula sa mga loans ng MWSS at mga private sector concessionaires para sa capital expenditures at concession fees.

Ito ay nagsisilbi ring corrective mechanism sa mga nabuo o nagawa ng MWSS upang maiwasan ang under recovery o over recovery dahil sa mga forex movements.

Ang East zone concessionaire na Manila Water ay magpapatupad ng FCDA ng 0.66% para sa 2021 average basic charge ng P28.52 kada cubic meter o P0.19 kada cubic meter.

“This is a downward adjustment of P0.14 per cubic meter from the previous FCDA of P0.33 per cubic meter,” ayon sa pahayag ng MWSS.

Habang ang West zone concessionaire na Maynilad ay magpapatupad naman ng FCDA ng negative 0.39% para sa 2021 sa average basic charge na P36.24 kada cubic meter o -P0.14 kada cubic meter.

“This is also a downward adjustment of P0.05 per cubic meter from the previous FCDA of -P0.09 per cubic meter,” sabi pa ng MWSS.

Covid positive sa Congress, 98 na

ni Lolet Abania | December 1, 2020

Umabot na sa 98 indibidwal ang nagpositibo sa House of Representatives matapos ang isinagawang mass testing.

Ayon kay House Sec. Gen. Mark Llandro Mendoza, kabilang dito ay mga kongresista at empleyado na nasa Batasan Complex, kung saan sumailalim sa reverse transcription-polymerase chain reaction (RT-PCR) testing mula noong Nobyembre 10.

Subali’t hindi niya binanggit kung ilan dito ang kongresista, staff at empleyado na tinamaan ng Coronavirus.

Dagdag pa ni Mendoza, karamihan sa mga nagpositibo sa COVID-19 ay asymptomatic.

Gayunman, agad na ipinatupad ang self-isolation sa mga nagpositibo para maiwasan na mahawa ang iba pang House members at empleyado.

Nagsasagawa na rin ng extensive contact tracing sa Batasan at patuloy ang pakikipag-ugnayan ng Kamara sa pamahalaang lokal ng Quezon City.

Matatandaang nakapagtala na ng mahigit 80 kaso ng infected ng virus sa Kongreso noong Marso kung saan dalawang kongresista at tatlong empleyado ang namatay.

Aprub na face-to-face classes kay Duque, sinopla ni Año

ni Lolet Abania | December 1, 2020

Pinag-iisipang ibalik ang face-to-face classes sa mga lugar na may mababang panganib ng COVID-19 kasabay ng pagpapatupad pa rin ng minimum health standards, ayon sa pahayag ni Department of Health (DOH) Sec. Francisco Duque III.

“Kung ang lugar naman ay COVID-free for two weeks or four weeks, I am not sure, but zero case, walang COVID, walang risk halos, mababa ang risk, baka doon puwedeng pagbigyan,” sabi ni Duque sa isang interview ngayong Martes.

Ito ang tugon ng kalihim sa magiging rekomendasyon niya kay Pangulong Rodrigo Duterte patungkol sa pagbabalik ng face-to-face classes.

“Basta very low risk or minimal risk, I think that should be considered in the decision whether face-to-face classes would be allowed,” sabi ni Duque.

Samantala, noong Linggo, nagpahayag ng pagtutol si Department of Interior and Local Government (DILG) Sec. Eduardo Año para sa panawagan ng pagbabalik ng face-to-face classes.

"Ang sinasabi natin, huwag na lang natin munang i-rush. Kasi ang tanong diyan, ikaw gusto mong gawin 'yan pero sino ba ang responsable diyan? Ikaw ba? Ang galing mong magrekomenda pero wala ka naman palang responsibilidad diyan," sabi ni Año.

"Kung magkasakit at magkaroon ng spike, ikaw ba ang gagamot diyan, ikaw ba magsasagot ng gastos diyan? Pangalawa, sino'ng magiging accountable?" mariing sabi pa ni Año.