DTI Sec. Lopez, nagpositibo sa COVID-19

ni Lolet Abania | December 9, 2020

Sumailalim na sa full isolation si Department of Trade and Industry (DTI) Sec. Ramon Lopez matapos na magpositibo sa COVID-19 test.

Sa isang statement ngayong Miyerkules, sinabi ni Lopez na sumailalim siya sa test noong weekend matapos na ma-expose sa isang indibidwal na nagpositibo sa COVID-19 noong December 2.

"Am asymptomatic naman but am on full isolation already," sabi ni Lopez subali't hindi na siya nagbigay pa ng detalye.

Si Lopez ang ika-apat na Cabinet official na tinamaan ng COVID-19. Ang mga nagpositibo sa test sa COVID-19 ay sina Department of Interior and Local Government (DILG) Sec. Eduardo Año, Department of Education (DepEd) Sec. Leonor Briones at Department of Public Works and Highways (DPWH) Sec. Mark Villar, gayunman, lahat sila ay nakarekober na.

6 na turista sa Boracay, arestado sa pekeng swab test result

ni Lolet Abania | December 9, 2020

Anim na turista ang ipinasok sa isang quarantine facility sa Boracay matapos na magpakita ang mga ito ng diumano’y peke nilang swab test results ng COVID-19.

Ayon kay Lt. Col. Jonathan Pablito, Malay police chief, ang mga nasabing turista ay nagmula sa Metro Manila subali't hindi niya binanggit ang pagkakakilanlan ng mga ito.

Sa inilabas na ulat, dumating sa Boracay noong weekend ang apat na babae at dalawang lalaki na mga residente ng Quezon City, Parañaque at Makati.

Sa report ng awtoridad, may nakitang discrepancy sa serial number nang suriin nila ang totoong oras ng polymerase chain reaction (RT-PCR) test results na ibinigay ng anim na turista. Agad na nakipag-ugnayan si Pablito sa Mandaluyong City Police para i-check ang Safeguard DNA Diagnostic Center na naka-address sa nasabing lungsod kung saan sumailalim umano sa swab testing ang anim na turista.

Sinabi ni Pablito na nakatanggap sila ng isang certification mula sa naturang diagnostic center noong Lunes na nagpapatunay na nag-iisa lamang sa anim na RT-PCR test results na kanilang ipinasuri ang authentic. Ang ibang test results ay mga photocopies at binagu-bago lang.

Inaresto ng Malay police ang anim na turista dahil sa falsification of documents at paglabag sa Republic Act 11332 o ang Mandatory Reporting of Notifiable Diseases and Health Events of Public Health Concern Act at RA 11469 o ang Bayanihan to Heal as One Act.

Gayunman, dinala ang anim na turista sa Aklan Training Center, ang COVID-19 facility ng lalawigan sa Barangay Old Buswang sa Kalibo, Aklan. Magsasagawa sa mga ito ng swab testing at isasailalim doon sa 14-day quarantine.

Tiniyak naman ni Col. Esmeraldo Osia, Jr., Aklan police chief, na ang lokal na pulisya at ang Inter-Agency Task Force for the Management of Emerging Infectious Diseases (IATF) ay patuloy na nagpapatupad ng minimum health protocols para sa kaligtasan ng mga turista at residente ng lalawigan.

Samantala, sa datos ng Malay municipal tourism office, umabot na sa 4,154 turista ang bumisita sa Boracay noong nakaraang buwan.

75 poker chip sets at gambling items, nakumpiska sa NAIA

ni Lolet Abania | December 8, 2020

Nakasabat ang Bureau of Customs-Ninoy Aquino International Airport (BOC-NAIA) ngayong Martes ng 38 kargamento na naglalaman ng 75 poker chip sets at iba pang gambling paraphernalia sa Pasay City.

Nadiskubre ang imported items sa Central Mail Exchange Center ng Philippine Postal Corporation (PPC).

Sa isang pahayag, sinabi ng BOC na ang nasabing items ay walang kaukulang permit mula sa Philippine Amusement and Gaming Corporation (PAGCOR) at lumabag sa ipinatutupad na batas na Republic Act 10863 o ang Customs Modernization and Tariff Act.

Ayon sa BOC, nakatakda ang mga nasabat na poker sets, dealer chips at ibang gambling paraphernalia na dalhin sa cargo disposal division habang naghihintay pa ng seizure at forfeiture proceedings.

Kasunod nito, ang nakumpiskang paraphernalia ay ite-turn-over naman sa PAGCOR para sa kaukulang disposal nito.