South Korean Ambassador Han, binigyan ni P-Duterte ng Order of Sikatuna

ni Lolet Abania | December 11, 2020

Kinilala ni Pangulong Rodrigo Duterte ang mga ginawang pagtulong ng South Korea sa Pilipinas lalo na sa paglaban sa COVID-19, ayon sa Malacañang.

Sa naganap na pulong kay outgoing South Korean Ambassador to the Philippines Han Dong-man kahapon, pinasalamatan ni Pangulong Duterte ang nasabing bansa dahil sa suporta nito na tinawag niyang “timely emergency and humanitarian assistance” tulad ng pagbibigay-donasyon ng face masks at iba pang personal protective equipment, mga gamot, test kits at bigas.

“The President also acknowledged ROK’s [Republic of Korea] assistance in the repatriation of 2,137 Filipinos from Korea,” ayon sa statement ng Malacañang.

Samantala, sinasabing ang South Korea ay may mababang record ng COVID-19 infections kumpara sa ibang mga bansa dahil sa mahigpit nilang pagpapatupad ng testing at contact tracing at ang mandatory quarantine para sa lahat ng inbound travelers.

Tulad din sa bansa, ang South Korea ay nagsasagawa ng restrictions sa mga social gatherings at curfews upang maiwasan ang pagkalat ng virus.

Labis din ang pasasalamat ni Pangulong Duterte sa South Korea para sa pagsuporta nito sa Pilipinas sa mga infrastructure drive, pagtulong sa ekonomiya, at pagpapatatag ng kooperasyon ng dalawang bansa sa pamamagitan ng depensa, seguridad at ang maritime domain awareness.

Sa naganap na farewell call, pinagkalooban ni Pangulong Duterte ng Order of Sikatuna si Ambassador Han para sa kanyang ‘natatanging diplomatikong paglilingkod’. Nagsimula ang tour of duty ni Han sa bansa noong January 2018.

P-Duterte, nagpatawag ng cabinet meeting, agenda secret pa

ni Lolet Abania | December 10, 2020

Nagpatawag si Pangulong Rodrigo Duterte ng isang full cabinet meeting na gaganapin sa December 14 subali't wala pang inilabas na detalye tungkol sa agenda nito, ayon sa Malacañang.

Sinabi ni Presidential Spokesperson Harry Roque, Jr. na gagawin ang pulong ni Pangulong Duterte kasama ang mga gabinete bago ang kanyang lingguhang address to the nation.

Matatandaang nagsasagawa si P-Duterte ng buwanang pulong kasama ang mga cabinet members subali't nahinto ito dahil sa COVID-19 pandemic noong March.

“I think that’s [COVID-19] a very good reason,” sabi ni Roque sa isang press briefing.

Gayunman, sinimulan muli ng pangulo ang cabinet meetings noong October upang talakayin ang pagpapasigla sa ekonomiya at pagbubukas ng public transport sa kabila ng nararanasang health crisis ng bansa.

Si Pangulong Duterte at ang mga cabinet officials na dumalo noong October 12 meeting ay nakasuot ng face mask at naglagay sila ng plexiglass table dividers para masigurong ipinatutupad ang social distancing.

Ayon pa kay Roque, nais ni P-Duterte ng face-to-face meetings kaysa sa online interaction.

Torotot at pito, bawal sa Pasko at Bagong Taon! — DOH

ni Lolet Abania | December 10, 2020

Hindi ipinapayo ng Department of Health (DOH) sa publiko ang paggamit ng torotot para sa pagsalubong sa Pasko at Bagong Taon dahil sa maaaring pagmulan ito ng COVID-19 transmission.

Sa halip, iminungkahi ni DOH Sec. Francisco Duque III na gumamit ng alternatibong pagsasaya at pag-iingay tulad ng drums at busina ng mga sasakyan.

“Maliban sa paputok, iwasan din natin ang mga paggamit ng mga torotot at mga katulad nito upang mapigilan natin ang posibleng pagkakahawa sa COVID-19 at iba pang sakit,” sabi ni Duque sa isang press briefing para sa Christmas campaign ngayong Huwebes.

“Humanap tayo ng ibang alternatibo sa paputok gaya ng mga tambol, busina o 'di kaya pagpalakpak,” dagdag ng kalihim.

Hindi tulad ng mga nakalipas na taon, ipinapayo ng ahensiya na dapat nang iwasan sa ngayon ang ganitong klase ng pampaingay dahil maaaring ang Coronavirus ay mailipat sa pamamagitan ng mga torotot.

Ayon kay DOH Usec. Myrna Cabotaje, ang mga ganitong instrumento ay posibleng maging sanhi para maisalin-salin ang laway ng gagamit nito sa iba.

“Huwag po tayong gagamit ng pampaingay na gumagamit sa bibig that will cause the transfer of saliva,” sabi ni Cabotaje sa press briefing.

“So 'yung mga pito (whistle), ‘yung mga torotot, bawal po ngayon 'yan. Kailangan naka-mask pa rin at nagso-social distancing,” dagdag niya.