Siklista, sinalpok ng bus sa u-turn slot ng EDSA

ni Lolet Abania | December 24, 2020

Isang siklista ang nasalpok ng bus sa kabubukas lamang na U-turn slot sa EDSA, malapit sa Quezon City Academy ngayong Huwebes.

Pansamantala munang isinara ang nasabing U-turn slot dahil sa aksidente.

"Na-cut po 'yung bus dahil sa may nag-u-turn, biglang lumusot 'yung nagbibisikleta... Hindi napansin ng bus. Lumusot po doon sa area na hindi puwedeng mag-u-turn, nasaktan po siya," ani Quezon City traffic chief Lester Cardenas.

Ayon kay Cardenas, agad na isinugod sa ospital ang siklista na hindi naman malubhang nasaktan. Hindi na nagbigay pa ng detalye ang opisyal tungkol sa insidente.

Pasado alas-10:35 ng umaga kanina, muling binuksan ang u-turn slot para sa mga motoristang bumibiyahe sa EDSA.

Maraming u-turn slots ang isinara dahil sa EDSA Busway Project. Partikular na nangyari ang aksidente sa u-turn slot na malapit sa Quezon City Academy na binuksan noong isang linggo upang mabawasan ang matinding traffic sa lugar dahil sa konstruksiyon ng isang busway sa pagitan ng Balintawak at Quezon Avenue.

9-anyos na bata, nagbalik ng napulot na P32K

ni Lolet Abania | December 23, 2020

Isang 9-anyos na batang taga-Alfonso Lista, Ifugao ang umani ng paghanga mula sa mga netizens at pulisya dahil sa kanyang katapatan matapos na isauli ang isang pouch na naglalaman ng pera at mga importanteng dokumento.

Ang bata na kinilalang si Gernan Garcia ay nagbalik ng bag na kanyang natagpuan na may lamang P32,000 cash, ID at importanteng dokumento.

Ayon sa Philippine National Police (PNP) Alfonso Lista, nakita umano ni Gernan ang pouch sa gilid ng kalsada nang pauwi na ito ng bahay. Kinuha ni Gernan ang pouch at nang makauwi ay ibinigay sa kanyang nanay.

Kasama ang kanyang ina, nagtungo sila sa police station upang i-surrender ang mahalagang bag at laman nito, kung saan agad ding naibalik sa may-ari.

Bilang pasasalamat sa katapatan ng bata, binigyan ng may-ari si Gernan ng pera. Pinasalamatan din ng may-ari ng pouch ang magulang ni Gernan sa mahusay na pagpapalaki sa anak na may mabuting puso.

Samantala, may mga netizens ding nagpahayag ng paghanga sa ginawa ni Gernan at sa mga magulang nito. Nais ng ilang netizens na magbigay ng tulong sa bata kung saan inaalam na ang kanyang kinaroroonan.

Death penalty sa mga drug lords at mamamatay-tao – Año

ni Lolet Abania | December 23, 2020

Nararapat lang na patawan ng parusang kamatayan ang mga police officers na nakagawa ng heinous crimes sakaling maibalik na ang capital punishment sa bansa, ayon sa pahayag ni Department of Interior and Local Government Sec. Eduardo Año.

"Kung mayroon nga lang tayong death penalty, gusto ko 'yung mga pulis na siyang nagpapatupad, eh, siyang lumalabag ng ganyang heinous crimes, eh, talagang death penalty para sa akin, 'yun ang parusa dapat," sabi ni Año sa isang interview ngayong Miyerkules.

"Para sa akin, ang death penalty, puwedeng i-impose sa drugs, 'yung mga drug lord, drug syndicates at dito sa mga heinous crimes na ginawa ng mga pulis or men in uniform na dapat magpatupad, eh, sila 'yung gumawa ng heinous crime, dapat death penalty 'yan..." dagdag ng kalihim.

Muling nabuksan ang tungkol sa death penalty matapos ang insidente ng pamamaril at pagpatay sa mag-ina sa Paniqui, Tarlac ng suspek na si Jonel Nuezca, isang pulis na naka-assign sa Parañaque City Police's Crime Laboratory.

Ayon sa Malacañang, ang muling pagbuhay sa death penalty ay nakasalalay sa Kongreso kung saan ilan sa mga mambabatas ay nagpahayag ng suporta tungkol dito.

Matatandaang nagkaroon ng alitan si Nuezca at ang kapitbahay na si Sonya Gregorio at anak nito na si Frank Antonio Gregorio na nagtapos sa malagim na kamatayan dahil sa pagbaril sa ulo nang dalawang beses sa mag-ina ng nasabing pulis.

Naiulat na si Nuezca ay nasampahan din ng criminal at administrative cases at idinemote sa kanyang mga unang taon sa serbisyo ng National Police Commission mula sa pagiging senior master sergeant ay naging police master sergeant dahil sa kaso ng extortion noong 2014.

Nahaharap sa kasong 2 counts ng murder si Nuezca dahil sa insidente ng pamamaril sa Tarlac.